Joxua 22 - Tshwa Bible

¹ Zonake Joxua i lo vitana va ka Rubeni, ni va ka Gadi, ni khihlanya ga lixaka la ka Manasa, aku kabye;

² Nwina mu hlayisile zontlhe lezi Mosi, a nanza ga Jehova, a mu leleteleko zona, ni kambe mu ingisile a gezu ga mina ka timhaka tontlhe leti nzi mu leleteleko tona.

³ Nwina a mu tsikangi vamakabye va nwina ka masiku lawa yo tala kala inyamutlha, kanilezi mu hlayisile lezi zi faneleko ku hlayisiwa, wu nga wona a nayo wa Jehova Nungungulu wa nwina.

⁴ Makunu Jehova Nungungulu wa nwina i nyikile kuhumula ka vamakabye va nwina, khwatsi hi lezi a va byelileko: hikwalaho tlhelani makunu mu famba matendeni ya nwina, ni le tikweni ga tshomba ya nwina, leyi Mosi a nanza ga Jehova a mu nyikileko yona le tlhatuko wa Jordani. Mitse. 32:20; Deut. 3:18

⁵ Ntsena lezaku ti woneleni khwatsi, mu maha zileletelo ni nayo lowu Mosi a nanza ga Jehova a mu leleteleko wona, ni ku ranza Jehova Nungungulu wa nwina, ni ku namarela ka yena, ni ku mu khozela hi timbilu ta nwina tontlhe ni mihefemulo ya nwina yontlhe.

⁶ Zinghaho Joxua i lo va katekisa a va fambisa, zonake va lo famba matendeni yabye.

⁷ Makunu Mosi i wa nyikile ka khihlanya ga lixaka la ka Manasa a tikwana le Baxani, na Joxua i lo nyika ka ginwani khihlanya ga lixaka la ka Manasa a tikwana leno tlhatuko wa Jordani, hi le Muhlwa-gambo; hikwalaho Joxua i lo engeta a va rumela matendeni yabye, yena i lo va katekisa.

⁸ I lo wulawula ka vona, aku: Tlhelani matendeni ya nwina na mu hi ni pfuno wa hombe, ni zifuyo zo tala, ni siliva, ni nzalama, ni suku, ni ziketse, ni tinguwo to tala nguvu. Avelanani ni vamakabye va nwina lezi mu phangileko za valala va nwina. Mitse. 31:26; 1 Sam. 30:24

⁹ Zonake a vanana va ka Rubeni, ni vanana va ka Gadi, ni khihlanya ga lixaka la ka Manasa va lo famba, va lo siya a vanana va ka Israeli leyo Xilo le tikweni ga Kanani, va lo famba le tikweni ga le Gileade, a tiko legi va avelweko hi kuleletela ka Jehova hi nomu wa Mosi.

¹⁰ Ni laha va nga wa chikele mbhirini ya Jordani, a mbhinganweni wa tiko ga Kanani, a vanana va ka Rubeni, ni vanana va ka Gadi, ni khihlanya ga lixaka la ka Manasa va lo aka a alati laha mbhirini ya Jordani, a alati ga hombe go woneka kule.

¹¹ Zonake a vanana va ka Israeli va lozwa lezaku: Languta, a vanana va ka Rubeni, ni vanana va ka Gadi, ni khihlanya ga lixaka la ka Manasa va akile alati legi gi cuwukeneko ni tiko ga Kanani, hi le mbhirini ya Jordani, hi tlhelo ga vanana va ka Israeli.

¹² Laha a vanana va ka Israeli va nga wa zi zwile, va lo vitana a tlhangano wontihe wa vanana va ka Israeli le Xilo, a ku yalwa zinwe navo.

¹³ A vanana va ka Israeli va lo rumela a kuya ka vanana va ka Rubeni, ni ka vanana va ka Gadi, ni ka khihlanya ga lixaka la ka Manasa le tikweni ga le Gileade, Finiasi a nʼwana Eliazari mupristi,

¹⁴ ni khume ga tihosana, a hosana yinwe ka lixaka linwe ni linwani ka tontlhe tixaka ta ka Israeli; munwe ni munwani loyi a nga hosana lomu ndlwini ka tiyindlu ta vararu vabye lomu xikari ka matala ya ka Israeli.

¹⁵ Na vona va lota ka vanana va ka Rubeni, ni ka vanana va ka Gadi, ni ka khihlanya ga lixaka la ka Manasa, le tikweni ga le Gileade, va lo ta wulawula zinwe navo, vaku:

¹⁶ A tlhangano wontihe wa Jehova, wu ngalo: Xana kuhambuka ka kuyini loku mu ku mahileko mu vukela Nungungulu wa ka Israeli, lezi mu fularelako Jehova legi siku, mu ti akela a alati mu hluwuka Jehova legi siku ke?

¹⁷ Kaxana a xionho xa Peori a hi nchumu ka nwina, lexi ni nyamutlha lezi a hi se nga basiswa ka xona, hambu lezo a ntungu wu tsayisileko a tlhangano wa Jehova!

¹⁸ Laha kaku nwina mu fularela Jehova inyamutlha! Ku taku loku mu hluwuka Jehova inyamutlha, manziko Jehova i ta zangarela a tlhangano wontihe wa ka Israeli.

¹⁹ Loku a tiko ga tshomba ya nwina gi nga hlazekangi, tlhatukani muta tikweni ga tshomba ya Jehova, laho ku yimisilweko kona a Tabemakeli ga Jehova, mu tata kuma a tshomba xikari ka hina; mu nga dzuki mu hambuka ka Jehova, mu hambana zinwe na hina mu ti akela a alati ahandle ka alati ga Jehova Nungungulu wa hina.

²⁰ Kaxana Akana a nʼwana Zera, lezi a mahileko xikhunguvanyiso hi zilo zi phangilweko, a zanga a yi welangi hehla ka wontihe tlhangano wa ka Israeli ke? ni loye munhu cima a nga fangi yece hi xionho xakwe. 1 Kro. 2:7

²¹ Zonake a vanana va ka Rubeni, ni vanana va ka Gadi, ni khihlanya ga lixaka la ka Manasa va lo hlamula va ku ngalo ka tihosana ta matala ya ka Israeli:

²² Nungungulu Nyamintamu, Nungungulu Jehova, wa zi tiva, na yenawu Israeli i ta zi tiva! Loku hina hi mahile lezo zilo hi kuhluwuka hi vukela Jehova ni ku mu onhela, u nga hi ponisi inyamutlha.

²³ Loku hina hi akile a alati hi ku fularela Jehova ni ku nyikela a munyikelo wa kuhiswa, ni munyikelo, ni miphahlo ya kurula, ngha Jehova a hi yena a hi lamulako.

²⁴ Kanilezi hi zi mahile hi ku chava zinwani zilo, hi lezaku: Hi zikhati za ha tako a vana va nwina va taku ka vana va hina: Mu na ni ntiro muni na Jehova Nungungulu wa ka Israeli ke?

²⁵ Hakuva xikari ka hina na nwina, vanana va ka Rubeni, ni vanana va ka Gadi. Jehova i vekile a mbhingano, ku nga Jordani: hikwalaho nwina a mu na xiavelo na Jehova! Hi ndlela leyo a vanana va nwina va ta valela a vanana va hina ku chava Jehova.

²⁶ Hikwalahoke hi te ngalo: A hi akeni alati, na gi nga hi alati ga munyikelo wa kuhiswa ni miphahlo;

²⁷ kanilezi gi tava ga wukustumunyu xikari ka hina na nwina, ni le zizukulwaneni za hina anzhako ka hina, kasi hi khozela Jehova mahlweni kakwe hi minyikelo ya hina ya kuhiswa, ni miphahlo ya hina, ni miphahlo ya hina ya kubonga, kasi a vanana va nwina va nga wuli ka vanana va hina ginwani siku, vaku: A mu na xiavelo ka Jehova: Gen. 31:48

²⁸ Zi nga lezo hina hi ngaku: Loku ginwani siku va wula lezo ka hina kutani ka zizukulwana za hina, hi taku ka vona: Langutani xipimanyiso xa alati ga Jehova lexi vararu va hina va xi mahileko, xi nga hi xa munyikelo wa kuhiswa ni xa miphahlo, kanilezi xa wukustumunyu xikari ka hina na nwina.

²⁹ A zive kule na hina lezaku hi hluwuka ka Jehova ni ku fularela Jehova legi siku hi aka a alati ga minyikelo ya kuhiswa, ni miphahlo, ahandle ka alati ga Jehova Nungungulu wa hina, legi gi nga mahlweni ka tabemakeli gakwe.

³⁰ Mupristi Finiasi, ni tihosana ta tlhangano, ni tinduna ta mazanazana ya ka Israeli, lava va nga wa hi zinwe na yena, na va zwile timhaka leto ti nga wulawulwa hi vanana va ka Rubeni, ni vanana va ka Gadi, ni vanana va ka Manasa, ti lo va tangalisa khwatsi.

³¹ Zonake Finiasi nʼwana mupristi Eliazari i te ngalo ka vanana va ka Rubeni, ni ka vanana va ka Gadi, ni ka vanana va ka Manasa: Inymutlha ha zi tiva lezaku Jehova i kona xikari ka hina, hi lezi nwina a mu onhangi ka Jehova hi ndlela leyi: Makunu nwina mu ponisile a vanana va ka Israeli canjeni ga Jehova.

³² Na Finiasi nʼwana mupristi Eliazari, ni tihosana, va lo suka ka vanana va ka Rubeni, ni ka vanana va ka Gadi, ni le tikweni ga Gileade, va lo tlhelela tikweni ga le Kanani, le ka vanana va ka Israeli, va lo ya va hlawutela timhaka leti.

³³ Ni timhaka leto ti lo xalalisa mahlweni ka vanana va ka Israeli, zonake a vanana va ka Israeli va lo dumisa Nungungulu, na vona a va ha engetangi kambe va alakanya ku yalwa zinwe na vona, ni ku hlasela a tiko ga vanana va ka Rubeni, ni ga vanana va ka Gadi, lawa va nga wa akile ka wona.

³⁴ Ni vanana va ka Rubeni ni vanana va ka Gadi va lo chula alati a vito gaku Edi; hakuva va te ngalo: Gona gi ta kuva kustumunyu xikari ka hina lezaku Jehova i Nungungulu.