Joxua 2 - Tshwa Bible

A tihloli ti rumelwa mahlweni.

¹ Joxua nʼwana Nuni i lo ruma tihloli timbiri hi le xihundleni, na a hi le Xitime, aku kabye: Fambani muya hlola a tiko ni Jeriko. Vona va lo suka va famba, zonake va lo enghena lomu ndlwini ya xibhayi, a vito gakwe hi Rahabi, va etlela lomo. Mitse. 25:1; Maheb. 11:31; Jak. 2:25

² Ni hesi ya le Jeriko yi wa lo byeliwa lezaku: Languta, ku tile vavanuna va ka Israeli wusiku legi ku ta hlola tiko.

³ Zonake a hosi ya le Jeriko yi lo rumela ka Rahabi, yiku: Humesa a vanhu lavo va tileko ka wena, lava va enghenileko lomu ndlwini ya wena, hakuva va tela ku ta hlola tiko gontlhe.

⁴ Kanilezi a wasati i lo teka vavanuna vambiri a Va fihla, zonake aku: Hi zona a vavanuna va wa tile ka mina, kanilezi nzi wa nga tivi lomo va tako ha kona;

⁵ ni xikhatini xa kuvalwa ka nyangwa ya muti na gi pelile, a vanhu lavo va lo huma; a nzi ku tivi lomu va yileko; hatlisani mu va lanza, mu ta va kuma.

⁶ Kanilezi yena i lo va kanzihisa le langweni, a va fihla lomu ka tinyanza ta wukene, leti a nga wa ti anekile le langweni.

⁷ Zonake a vavanuna va lo va lanza hi ndlela yi yako mapelweni ya Jordani zalezo na va humile a valanzi, a nyangwa yi lo valiwa.

⁸ Na ti nga se etlela a tihloli, a wasati i lo kanziha aya ka vona le hehla ka langwa;

⁹ na yena i te ngalo kabye: Nza zi tiva lezaku Jehova i mu nyikile legi tiko, hina hi na ni manyeho hi nchavo lowu mu wu vuxileko, ni vontlhe vaaki Va tiko va mbhelile ntamu hi kota ya nwina. Ekso. 15:14; 23:27

¹⁰ Hakuva hi zwile hi lezi Jehova a omisileko zotia a mati ya Bimbi go Pswhuka mahlweni ka nwina: xikhati lexo mu nga wa huma hi le Gipite, ni lezi mu mahisileko zona ka tihosi timbiri ta maAmori le tlhatuko wa Jordani, yena Sihoni na Ogi, lava mu va lovisileko.

¹¹ Na hi zwile lezo a timbilu ta hina ti lo nyeka; a ha hi na kutiya ka nchumu hi kota ya nwina; hakuva Jehova Nungungulu wa nwina hi Nungungulu loyi a nga le hehla tilweni, ni lahasi misaveni.

¹² Hikwalaho mina nza mu khongotela lezaku mu hlambanya ha Jehova lezaku kota lezi nzi mu hawukeleko, na nwinawu mu fela ku hawukela a yindlu ya dadani wa mina, mu nzi nyika xiwoniso xa zinene,

¹³ lezaku nwina mu ta hanyisa dadani na mamani, ni vanakulori ni vamakweru, ni vontlhe va ngango wabye, mu ponisa wutomi ga hina.

¹⁴ Ni vavanuna va te ngalo kakwe: A wutomi ga hina ga nwina kala kufeni, loku nwina mu nga puxisi timhaka ta hina; kasi loku Jehova a hi nyika legi tiko, hina hi ta ku hawukela hi maha kusasa ha nwina.

¹⁵ Zonake i lo va chikisa hi gota hi laha njhaneleni, hakuva a yindlu yakwe yi wa akilwe hi laha khurisini ga khokhola ga muti.

¹⁶ Na yena i te ngalo ka vona: Nwina yanani le xitsungeni kasi lava va mu lanzako mu nga tlhangani navo, mu ta ya fihlala leyo kala ku hunza masiku manharu, kala va tlhela lava va mu lanzako; zonake mu ta famba ndlela ya nwina.

¹⁷ Ni vavanuna va te ngalo ka yena: Loku u nga mahi lezi hi ku byelako hi ta tlhatlheka ka xifungo lexi u hi Hambanyisileko ha xona:

¹⁸ loku hi chikela lomu tikweni legi, u ta boha a ngoti leyi yo pswhuka laha ka njhanela leyi u nga hi chikisa ha yona; ni lezaku u ta tsombanyisa lomu ndlwini ya wena, a raru wa wena, ni mamani wa wena, ni vamakabye va wena, ni wontihe a ngango wa raru wa wena.

¹⁹ Kani hi wihi loye a ta nga huma lahandle laha nyangweni ya yindlu ya wena, a nkhata wakwe wu tava hlokweni yakwe, hina hi nga tava ni nanzu. Kanilezi kani hi wihi a ta nga dawa na a hi lomu ndlwini ya wena, a nkhata wakwe wu tava hehla ka tihloko ta hina.

²⁰ Kanilezi loku wena u lanzula timhaka ta hina, hina hi ta tlhatlheka ka xifungo lexi u hi Hambanyisileko xona.

²¹ Na yena i te ngalo: A zive nghaho khwatsi mu wulileko! I lo va tsika va famba. Yena i lo sala a boha a ngoti yo pswhuka laha ka njhanela.

²² Zonake va lo famba vaya xitsungeni: va loya tshama leyo masiku manharu, kala lava va va lanzileko va tlhela va wuya; a valanzeli va lo va hlota lomu ka tindlela tontlhe, kanilezi a va va kumangi.

²³ Zonake a vavanuna lavo vambiri va lo famba, va relela hi le xitsungeni, va tlhatuka Jordani, va lo ya chikela ka Joxua, nʼwana Nuni, va mu hlawutela tontlhe timhaka leti ti nga va humelela.

²⁴ Na vona va te ngalo ka Joxua: Hakunene Jehova i nyikile tiko gontlhe mandleni ya hina, hakuva a vaaki va tiko va mbhelile ntamu hi kota ya hina.