Joxua 10 - Tshwa Bible

A yimpi ya le Dzongeni.

¹ Makunu laha Adoni-Zedeki, a hosi ya le Jerusalema, a nga wa zwile lezaku Joxua i tekile Ai a wu lovisa, ni lezaku le Ai ni hosi ya kona i mahile ku khwatsi hi lezi a mahileko le Jeriko ni hesi ya kona, ni lezaku a vanhu va le Gibeoni va mahile kurula zinwe ni va ka Israeli, ni lezaku va lomo xikari kabye,

² i lo chava nguvunguvu yena ni vanhu vakwe, hakuva a muti wa le Gibeoni wu wa hi muti wa hombe, kota ginwe ga mazinza, ni lezaku wu wa hunza a muti wa le Ai, ni lezaku a vavanuna va kona va wa hi tinhenha.

³ Hikwalaho Adoni-Zedeki, a hosi ya le Jerusalema, i lo rumela ka Hohamu, a hosi ya le Hebroni, ni ka Hiramu, a hosi ya le Jarmute, ni ka Jafia, a hosi ya le Lakixe, ni ka Debira, a hosi ya le Egloni, aku ka vona:

⁴ Ngonani ka mina mu ta nzi vunetela, hi hlengela hi hlasela Gibeoni, hakuva va zwanana na Joxua ni vanana va ka Israeli.

⁵ Zonake tihosi leto ta ntlhanu ta vaAmori a hosi ya le Jerusalema, ni hosi ya le Hebroni, ni hosi ya le Jarmute, ni hosi ya le Lakixe, ni hosi ya le Egloni, ti lo tlhangana ti famba zinwe ni tiyimpi tabye tontlhe, tiya gova mahlweni ka Gibeoni tilwa nawo,

⁶ Zonake a vanhu va le Gibeoni va lo rumela ka Joxua, le wugovelweni ga le Gilgale, vaku ka yena: U nga tsiki malanza ya wena, hatlisa u kanziha uta ka hina u ta hi tlhatlhisa, ni ku ta hi vunetela, hakuva tontlhe tihosi ta vaAmori, leti ti akileko leno zitsungeni, ti tsombene khatiginwe kuta hi vukela.

⁷ Zonake Joxua i lo suka le Gilgale zinwe ni vontlhe vavanuna va hlomileko ni tontlhe tinhenha.

⁸ Na Jehova i te ngalo ka Joxua: U nga chavi, hakuva nzi ta va nyikela canjeni ga wena, cima a nga kona wanuna a ta nga tiya mahlweni ka wena. Deut. 3:2

⁹ Zalezo Joxua i lo chikela kabye hi kuhatlisa; hakuva i lo famba wusiku gontlhe kusukela le Gilgale.

¹⁰ Nungungulu i lo va vilinganyisa mahlweni ka Israeli; zonake Israeli i lolwa navo, a va hlula nguvu kusuhani ni le Gibeoni, va panzanyeka; zonake Israeli i lo va hlongolisa hi ndlela leyi kanzihako kuya le Bete-Horoni, a va hlasela kala le Azeka ni le Makeda. Ekso. 14:24; 23:27

¹¹ Ku te na va ha chava va ka Israeli, na va relela le Bete-Horoni, Jehova i lo nisa maribye ya hombe hehla kabye mata hi le tilweni, kala le Azeka, vona va lo dawa, lava va nga dawa hi vula ya maribyana va wa tele nguvu ku hunza lava va nga dawa hi va ka Israeli hi matlhari. Ekso. 9:17

¹² Zonake Joxua i lo wulawula ka Jehova ka lego siku Jehova a nga nyikela vaAmori ka vanana va ka Israeli, aku; Gambo, yima hehla ka Gibeoni; Na wena hweti, le minzhelelweni ya Ajaloni.

¹³ Zonake a gambo gi lo yima, ni hweti yi lo yima, Kala a vanhu va ti photela ka valala vabye. Lezi a zi tsaliwangi lomu bhukwini ga Loyi a Lulamileko ke? A gambo gi lo yima le tilweni gi nga hatlisi ku pela siku gontlhe. 2 Sam. 1:18; Isa. 38:8

¹⁴ Cima a ku na ngava kona a siku go fanana ni lego hi mahlweni, hambu ni nzhako ka lezo, a kuva. Jehova a ingisa a gezu ga munhu, hakuva Jehova i wa lwela va ka Israeli.

¹⁵ Zonake Joxua i lo tlhelela le wugovelweni ga le Gilgale zinwe ni vontlhe va ka Israeli.

¹⁶ A tihosi leti ta ntlhanu ti chavileko, ti lo ya fihlala lomu mhakweni ya le Makeda.

¹⁷ Zonake Joxua i lo byeliwa ku ngalo: A tihosi leti ta ntlhanu ti kumilwe na ti fihlele lomu mhakweni ya le Makeda.

¹⁸ Joxua aku ngalo: Wumbulutani a maribye ya hombe laha nyangweni ya mhako, mu veka vavanuna va va rinzela.

¹⁹ Kanilezi nwina mu nga tshami, hlongolani valala va nwina, mu ta lanzela hi lenzhako mu va hlasela, mu nga va vumeli ku enghena mitini yabye; hakuva Jehova Nungungulu wa nwina i va nyikele mandleni ya nwina.

²⁰ Ni laha Joxua ni vanana va ka Israeli va nga wa va hlasele va kala va va mbheta, na vanwani va tsutsumele ka miti ya makhokhola.

²¹ Vontlhe vanhu va lo wuya ka Joxua le wugovelweni ga le Makeda hi kurula; cima ku wa nga hi kona ni munwe wa kuhleva a vanana va ka Israeli.

²² Zonake Joxua aku ngalo: Vululani a nyangwa ya mhako, mu humesa tihosi leto ta ntlhanu, mu ti neha ka mina.

²³ Na vona va lo maha lezo, va loya humesa tihosi leto ta ntlhanu va ti neha ka yena, a hosi ya le Jerusalema, ni hosi ya le Hebroni, ni hosi ya le Jarmute, ni hosi ya le Lakixe, ni hosi ya le Egloni.

²⁴ Ni laha va nga wa tisile tihosi leto mahlweni ka Joxua, Joxua i lo tsombanyisa vontlhe vavanuna va ka Israeli. Zonake aku ka tinduna ta vanhu va yimpi lava va fambako zinwe na yena: Tshinelani mu ta kanzihela hehla ka tinhamu ta leti tihosi hi mikonzo ya nwina. Va lo tshinela va ta kanzihela hehla ka tinhamu ta tona.

²⁵ Na Joxua i te ngalo kabye: Mu nga chavi, hambu ni ku tsemeka hlana, tiyani muva ni wunhenha, hakuva Jehova i ta maha 20 kota lezi ka vontlhe valala va nwina lava mu lwako navo.

²⁶ Anzhako ka lezo Joxua i lo va tlhava, a va daya, a va hayeka lomu ka ntlhanu wa tisinya, va lo tshama na va hayekilwe tisinyeni kala laha gambyeni. Deut. 21:22

²⁷ Makunu loku gambo gi pelile, Joxua i lo leletela lezaku a va susiwe lomu tisinyeni, va hoxiwa ka mhako leyo va nga wa fihlele ka yona, zonake va lo viringetela maribye ya hombe laha nyangweni ya mhako, laya ma nga kona kala inyamutlha.

²⁸ Ka lego siku Joxua i lo khozisa Makeda, i lo va hlasela hi matlhari zinwe ni hosi ya kona; i lo lovisa vontlhe lava va nga wa hanya ka wona; yena a nga siyangi hambu ni salela. I lo maha ka hosi ya le Makeda khwatsi hi lezi a mahileko ka hosi ya le Jeriko.

²⁹ Joxua ni vontlhe va ka Israeli va lo suka Makeda vaya le Libna va yalwa na Libna.

³⁰ Na Jehova i lo wu nyikela mandleni ya va ka Israeli, wona ni hosi ya kona, i lo hlasela hi tlhari vontlhe lavo va nga wa hanya lomo, a ku salangi hambu ni munhu wa ku tsutsuma. Yena i lo maha ka hosi ya kona khwatsi hilezi a mahileko ka hosi ya le Jeriko.

³¹ Joxua ni vontlhe va ka Israeli va lo suka le Libna vaya le Lakixe, va loya gova mahlweni ka wona, valwa nawo.

³² Jehova i lo nyikela Lakixe canjeni ga ka Israeli, zonake hi siku ga wumbiri va lo khozisa a muti, va lo hlasela hi tlhari vontlhe lava va nga wa hanya lomo, khwatsi hi lezi va mahileko le Libna.

³³ Makunu Horama a hosi ya le Gezera i lota ku ta vunetela Lakixe; kanilezi Joxua i lo mu daya zinwe ni vanhu vakwe; laho a ku salangi hambu ni munwe.

³⁴ Joxua ni vontlhe va ka Israeli va lo suka le Lakixe vaya le Egloni, va loya gova mahlweni ka wona, valwa nawo.

³⁵ Va lo wu khozisa hi gwalego siku, va daya vanhu va kona hi tlhari; lego siku va lo lovisa vontlhe lava va nga wa hanya lomo, khwatsi hi lezi va mahileko le Lakixe.

³⁶ Zonake Joxua ni vontlhe va ka Israeli va lo suka le Egloni vaya le Hebroni va yalwa nawo.

³⁷ Va lo wu khozisa va wu hlasela hi tlhari, ni hosi ya kona zinwe ni yontlhe miti ya kona, ni vontlhe lava va nga wa hanya lomo ka yona, yena a nga siyangi ni munhu. I lo yi lovisa khwatsi hi lezi a mahileko le Egloni, i lo lovisa vontlhe lava va nga wa hanya lomo ka yona.

³⁸ Zonake Joxua ni vontlhe va ka Israeli va lo komama le Debira, va lo yalwa nawo.

³⁹ Va lo mu khozisa zinwe ni hosi ya kona, ni yontlhe miti ya kona, va lo yi hlasela hi tlhari, va lovisa vontlhe lava va nga hanya lomo, a va siyangi ni munhu. Khwatsi hi lezi a mahileko ka Hebroni i lo maha ka Debira ni hosi ya kona; kota lezi a mahileko kambe le Libna ni hosi ya kona.

⁴⁰ Lezo Joxua i lo hlasela a tiko gontlhe ga le zitsungeni ni Dzongeni, ni tikweni gontlhe ga minzhelelo, ni kureleleni ka zitsunga, ni tontlhe tihosi ta kona, a nga siyangi ni munwe wa ku huluka; kanilezi i lo lovisa zontlhe lezi zi hefemulako, khwatsi hi lezi Jehova Nungungulu wa ka Israeli a leleteleko.

⁴¹ Joxua i lo hlasela kusukela le Kadexe-Bernea kala le Gaza, ni tiko gontlhe ga le Goxeni kala le Gibeoni.

⁴² Joxua i lo khozisa khatiginwe tontlhe tihosi leti ni matiko ya tona, hakuva Jehova Nungungulu wa ka Israeli i lo lwela Israeli.

⁴³ Zonake Joxua ni vontlhe va ka Israeli va lo tlhelela le wugovelweni gabye le Gilgale.