Jona 4 - Tshwa Bible

Nungungulu a kawuka Jona.

¹ Kanilezi Jona i lo tsanwa nguvu, a zangara.

² I lo kombela ka Jehova, aku: Jehova, a hi zalezi nzi nga zi alakanya na nza hi tikweni ga mina ke? Hi lexi xi nga nzi maha nzi tsutsumela Tarxixi; hakuva nzi lo zi tiva lezaku wena u Nungungulu wa tipswalo, u teleko hi wuxinji, wa nonoka ku zangara, u tele hi kuhawukela, u hunzuluka u tsika tsayiselelo. Ekso. 34:6; 1 Sam. 15:29; Neb. 9:17

³ Hikwalaho, Jehova, teka a wutomi ga mina, hakuva a kufa i chukwana ka mina ku hunza ku hanya.

⁴ Jehova aku: Xana zi ku sasekele a ku zangara ke?

⁵ Zonake Jona i lo huma mutini, a ya tshama hi tlhelo ga Wuca ga muti, a ti akela a xaxa laho, a tshama nzhutini wa wona, kasi ku wona lexi xi ta nga maheka hi muti lowo.

⁶ Jehova Nungungulu i lo milisa a khungu, wu kulela hehla ka Jona, wu maha nzhuti hehla ka hloko yakwe, wu susa a kutsuva kakwe. Jona i lo tsakela nguvu a khungu lowo.

⁷ Kanilezi hi manziko wa kona ni mixo, Nungungulu i lo rumela a pungwani wu yaga a khungu, kasi wa fela ku wuna.

⁸ Laha gambo gi nga huma, Nungungulu i lo rumela a mheho yo hisa ya Wuca, A gambo gi lo hisa a hloko ya Jona kala a titivala, a kombela kufa, aku: A kufa i chukwana ka mina ku hunza ku hanya.

⁹ Zonake Nungungulu aku ka Jona: Xana zi ku sasekele a ku zangarela a khungu ke? Yena aku: Ina, nzi maha khwatsi hi ku zangara ni ku kala nzifa.

¹⁰ Jehova aku: Wena u tsetsa a khungu lowu u nga wu tirelangiko, u nga wu kulisangiko; lowu wu ti mileleko hi wusiku, wu tlhela wufa hi wusiku gi gamelako.

¹¹ Makunu mina ngha nzi nga tsetsi Niniva, a muti lowu wa hombe, lowu wu nga ni tsengo wa 120,000 wa vanhu va hlamusa, lava va nga zi tiviko a ku hambanyisa a woko gabye ga xinene ni leʼga xibhabha, ni zifuyo leʼzo tala ke?