Jona 1 - Tshwa Bible

Jona a vitanwa, a tsutsuma.

¹ A mhaka ya Jehova yi lota ka Jona nʼwana Amittai, yiku:

² Suka, uya Niniva, a mutini lowu wa hombe, u ya wu kanelela, hakuva a kubiha ka wona ku chikele mahlweni ka mina. Gen. 10:11; 18:20

³ Kanilezi Jona i lo suka a tsutsuma aya Tarxixi, kule ni nghohe ya Jehova. I lo relela le Joppa, a ya kuma a taru gi nga lava kuya Tarxixi; i lo rihela a pfhumba gakwe, a enghena tarwini, kasi kuya zinwe navo le Tarxixi, a suka mahlweni ka Jehova.

⁴ Kanilezi Jehova i lo vuxa a mheho ya hombe lomu bimbini, ku vuka a bhubhutsa ga hombe lomu bimbini, a taru gi ku khwatsi go lava ku panzeka.

⁵ Zonake a vamarinyero va lo chava, a munwe ni munwani a rila ka nungungulu wakwe; va lo hoxetela a zibya lezi zi nga hi lomu tarwini kasi ku gi hehukisa. Kanilezi Jona i lo relela lomo tarwini, a ya baramela kona, a etlela wurongo ga ntamu. Miti. 27:18

⁶ Lezo a nwinyi wa taru i loya kakwe, aku kakwe: Hikuyini u etlelako wena? Vuka u khongela ka Nungungulu wa wena, kutani i ta hi alakanya kasi hi nga lovi.

⁷ Va lo rambana xikari kabye, vaku: A hi hlahluveni, kasi ha tiva loyi a hi vangelako a khombo legi! Va lo hlahluva, a tihlolo ti si khoma Jona.

⁸ Zonake vaku kakwe: Hi nga hi byela, himani a hi vangelako a khombo legi? A ntiro wa wena i ntiro muni? U humela kwihi? A tiko ga nwina hi gihi? U lixaka muni?

⁹ Yena aku kabye: Nzi muHeberu; nzi chava Jehova, a Nungungulu wa matilo, loyi a mahileko a bimbi ni misava.

¹⁰ A vavanuna lavo va lo khomiwa hi hlenekera, vaku kakwe: Za kuyini u zi mahileko? Hakuva a vavanuna lavo va lo zi tiva lezaku i lo tsutsuma mahlweni ka Jehova, hi lezi i wa va byelile.

¹¹ Zonake vaku kakwe: Hi ta ku mahela yini kasi ha fela kuva ni malenga? Hakuva a bimbi gi wa engetelana ku vindluka hi ntamu.

¹² Yena aku kabye: Nzi tlakuleni, mu nzi hoxa lomu bimbini, kasi ma fela kuva ni malenga; hakuva nza zi tiva lezaku mu vukelwa hi bhubhutsa legi ga hombe hi kota ya mina.

¹³ Kanilezi a vavanuna va lo bonza makasiya hi ntamu va tlhelela muhanzeni, kanilezi a va zi kotangi, hakuva a bimbi gi engetelana ku va vindlukela.

¹⁴ Hikwalaho va lo rila ka Jehova, vaku: Jehova ha ku kombela lezaku u nga hi lovisi hi kota ya wutomi ga wanuna loyi, u nga hi rwexi a nkhata wu nga hiko na nanzu: hakuva wena Jehova u mahile a kuranza ka wena.

¹⁵ Zonake va lo tlakula Jona, va mu hoxa bimbini, ni bimbi gi lo rula,

¹⁶ A vavanuna lavo va lo mu chava nguvu Jehova, va mu mahela miphahlo ni zifungo.