Jeremia 6 - Tshwa Bible

A kutsayiswa ka Jerusalema.

¹ Nwina vanana va Benjamini, tsutsumani mu huma xikari ka Jerusalema, Banani mpunzu le Tekoa, Yimisani a xikombiso xa nzilo le Betakeremi; Hakuva a khombo gita hi le Nwalungu, Ni lobyiselelo wa hombe.

² Nzi ta lovisa a nhwana wa Zioni, Loyi a nga lipswhitla ni njhenene.

³ A varisi va taya kakwe ni mitlhambi yabye, Va gwimba matenda yabye va mu renzelekela; Munwe ni munwani i ta risela wutshanwini gakwe.

⁴ Sangulani a kulwa naye! Vukani hiya kona ni hlikanhi. Yowe, a gambo gi hlwile, Ni minzhuti ya kupeta ka gona yi lehile.

⁵ Vukani, a hi mu kanziheleni ni wusiku, Hi ya hahlula tiyindlu takwe ta wuhosi.

⁶ Hakuva Jehova wa tiyimpi i ngalo: Tsemani tisinya, mu maha lihlavu la ku bhiyela Jerusalema. Hakuva i muti wu feleko ku tsayisiwa, Wu tele hi kutsimbeketa.

⁷ Kotisa a hlowo yi humesako a mati, Wu humesisa lezo a kubiha ka wona. A kuholova ni kuphanga za zwala ka wona, A wubabyi ni timbanga zi kona mahlweni ka mina.

⁸ Hunzuluka, O Jerusalema, kasi nzi nga ku fulareli, Nzi ku maha a rumbi, a tiko gi nga hiko na muaki.

⁹ Jehova wa tiyimpi i ngalo: Va ta kutsula a misalela ya Israeli Kotisa loku ku kutsuliwa vina. Tlhelisa a canja ga wena xirunzwini Kotisa muwungeleteli wa mauva.

¹⁰ Nzi ta byela mani, Nzi maha wumboni kasi va ingisa ke? A tindleve tabye makhuna, a va zi koti kuzwa. A mhaka ya Jehova i nzhukano kabye, a va yi ranzi.

¹¹ Hikwalaho nzi tele hi zanga ya Jehova, Nzi karele hi ku ti khoma. Yi chulule hehla ka vanana lomu maruweni, Ni hehla ka tihlengeletano ta majaha, A nuna ni sati va ta khonwa zinwe, A zikhosana ni loyi a teleko hi masiku.

¹² A tiyindlu tabye ti ta nyikiwa vanwani, Zinwe ni masimu yabye ni vasati vabye; Hakuva nzi ta tshambuluta a canja ga mina Hehla ka vaaki va tiko, ku wula Jehova. Deut. 28:30; Mik. 5:2

¹³ Hakuva va ti nyiketele kumbilukeleni, A vatsongwani ni vahombe, A vaprofeti ni vapristi, vontlhe va kanganyisa.

¹⁴ A va khatalangi ku chuma a ti mbanga ta vanhu va mina, Vaku: Ku rulile, ku rulile! Na ku nga hi na kurula. Mika 3:5; 1 Tes. 5:3

¹⁵ Xana va zwile tingana loku va mahile manyala ke? Kokwihi, a va zwangi tingana, Ne, a va tivi ku koyama tingana. Hikwalaho va tawa zinwe ni vanwani; Va tawa a xikhati nzi va tsavisako, ku wula Jehova.

¹⁶ Jehova i ngalo: Yimani tindleleni, mu languta; mu wutisela a tindlela ta kale, muku: Xana a ndlela yinene hi yihi ke? zonake fambani ha yona, mu ta kuma kuhumula ka mihefemulo ya nwina. Kanilezi vona va lo hlamula, vaku: A hi vumeli ku famba ha yona. Isa. 28:12; Mat. 11:29; 23:37

¹⁷ Nzi vekile varinzeli xikari ka nwina, nziku: Ingisani a gezu ga mpunzu. Kanilezi va hlamule, vaku: Hi nga ta gi ingisa.

¹⁸ Hikwalaho, nwina vamatiko, ingisani; na wena hlengeletano, tiva lezi zi va humelelako!

¹⁹ Ingisa, o misava: Nzi ta neha a khombo hehla ka tiko legi, wu nga mbhanzu wa maalakanyo yabye; hakuva a va ingisangi a timhaka ta mina, va kanyisile a nayo wa mina.

²⁰ Ma nzi vuna yini a makha ya le Xeba, ni mipepo ya tiko ga le kule ke? A minyikelo ya nwina ya kuhiswa a yi nzi xalalisi, ni miphahlo ya nwina a yi nzi tsakisi. Isa. 1:11; Am. 5:21; Mika 6:6

²¹ Hikwalaho Jehova i ngalo: Nzi ta vekela tiko legi a zikhunguvanyiso, a vapswali ni vanana va ta khunguvanyeka khatiginwe, a muakelwani ni munghana wakwe va ta lova zinwe.

²² Jehova i ngalo: Langutani, a vanhu va tako hi le tikweni ga le Nwalungu, A tiko ga hombe gi ta vuka le magemetamusi ya misava. Deut. 28:49

²³ Va welela mawura ni matlhari, Va na ni lunya, a va na tipswalo. A guwa gabye gi khwatsi ga bimbi, Va khilele mahaxi, na va hlomile a kulwa na wena, O nhwana wa Zioni.

²⁴ Hi zwile a wudumo gabye, a mawoko ya hina ma mbhela ntamu, Hi telwe hi hlanekera ni kubayisa ko kota wasati a lunwako.

²⁵ Mu ngayi masinwini, hambu ku famba tindleleni; Hakuva a supado ya nala yi kona lomo, Ka chavisa a matlhelo wontihe.

²⁶ O nhwana wa vanhu va mina, Ti ambexe hi sakwa, u puluwunza khumeni; Bana nkosi kota loku ku rilelwa a nʼwana munwe yece, A hlomulo wa xiviti; Hakuva a muhahluli i ta hi tela hi xitshuketi.

²⁷ Nzi ku vekile a kuva mukambi wa tiko ga mina, ni kuva khokhola; lezaku u tiva ni ku ringa a kufamba kabye.

²⁸ Vona vontlhe vahluwuki ni lava va ti alisako, va famba-famba va lumbeta; va nonohile ku fanana ni suku ni xiketse; vontlhe va bihile.

²⁹ A mivuvo yi buveta hi ntamu, a muthovu wu hisilwe hi nzilo; a munyekisi i nyekisile mahala, hakuva a vobiha a va susiwangi.

³⁰ Vona va ta wuliwa ku i siliva yi tsikilweko, hakuva Jehova i va tsikile.