Jeremia 5 - Tshwa Bible

A zionho za Jerusalema.

¹ Tsenzelekani maruweni ya Jerusalema, Mu hlotisisa, mu wona lomu maphangweni; Loku mu zi kota ku kuma munhu, Hambu ni munwe loyi a mahako kululama, ni ku tsumbeka, Mina nzi ta tsetselela a muti wontihe.

² Hambu lezi va nge ngalo: Jehova wa hanya; Vona va hlambanya hi mawunwa.

³ O Jehova, xana a mahlo ya wena a ma cuwukeli a zinene ke? Wena u va bile, kanilezi a va zwangi kubayisa. U va lovisile, kanilezi a va vumelangi ku layiwa. Va nonohisile a tinghohe tabye a ku hunza ni ribye, Va ala ku hunzuluka. Isa. 1:5; 9:13

⁴ Zonake nzi wa alakanya ku ngalo: Hizinene, lava i vanhu va tsongwani, vona zipumbu, Hakuva a va yi tivi a ndlela ya Jehova Ni milayo ya Nungungulu wabye.

⁵ Nzi taya ka vahombe, nzi ta ya xuxa navo; Hakuva va tiva a ndlela ya Jehova, ni milayo ya Nungungulu wabye. Kanilezi vona vontlhe va wa panzile muyoko, ni ku phewula magota.

⁶ Hi lezo-ke a nghala ya lomu khwatini yi ta va daya, Ni hlolwa ga lomu xiwuleni gi ta va hlakahla, A yingwe yi ta nyanimela a miti yabye; Munwe ni munwani a ta nga huma handle i ta hanzulelwa. Hakuva a zihambunyeto zabye zi tele, Ni zigoho zabye zinyingi. Jer. 4:7; Hos. 13:7

⁷ Xana nzi nga ku tsetselelisa kuyini? A vanana va wena va nzi tsikile, va hlambanya hi lava va nga hiko vanungungulu. Hambu loku nzi va xurisile hi gi eneleko, vona va mahile wubhayi, va lo tsombana lomu ndlwini ya wuoswi na va tele nguvu.

⁸ Vona va kota a vamatsune va mahaxi ma xureko; a munwe ni munwani a yimba hi ku navela a sati wa muakelane.

⁹ Xana mina nzi nga ta tsayisa lezi zilo ke? ku wula Jehova. Nzi nga ta ti photela a ka tiko go khwatsi hi legi ke?

¹⁰ Kanzihani a makhurisi yakwe, mu ma khungumula, kanilezi mu nga mbhetiseli magumo. Suselelani a tihlambuti takwe, hakuva tona a hi ta Jehova.

¹¹ Hakuva a yindlu ya Israeli ni yindlu ya ka Juda ti nzi khohlisile nguvu, ku wula Jehova.

¹² Va kanetile Jehova, vaku: A hi yena. Cima ku nga tawa khombo hehla ka hina; hambu supado ni ndlala hi nga ta zi wona. Deut. 29:19; Isa. 28:15

¹³ A vaprofeti i mheho ntsena, a Gezu a gi kona kabye; lezi va zi wulako zi ta humelela kabye.

¹⁴ Hikwalaho Jehova Nungungulu wa tiyimpi i ngalo: Hi kota ya lezi mu wulileko lezo, nzi ta hunzula a timhaka ta mina tiva nzilo a nonwini wa wena, nzi hunzula tiko legi giva tihunyi, ni nzilo wu ta va khadamula,

¹⁵ Mangabye nwina yindlu ya ka Israeli, rizi ta mu tisela a tiko ga le kule, ku wula Jehova: a tiko ga ntamu a tiko ga kale, legi u ta nga kohlwa hi lirimi la gona, u nga ta zi pima lezi va zi wulawulako. Deut. 28:49; Isa. 5:26

¹⁶ A kocelo wabye wu khwatsi i tshisa gi vululekileko, vontlhe tinhenha.

¹⁷ Vona va taga a mavele ya wena ni xibaba xa wena, va taga vafana va wena ni vanhanyana va wena, va taga tiyivu ta wena ni tihomu ta wena, va taga zivina za wena ni mikuwu ya wena; a miti ya wena ya makhokhola, leyi u yi tsumbako, va ta yi lovisa hi supado. Levi 26:16; Deut. 28:31

¹⁸ Hambu zi hi tano, ku wula Jehova, nzi nga ta ku fuvisela magumo a ka lawo masiku.

¹⁹ Loku nwina mu taku ngalo: Hikuyini Jehova Nungungulu wa hina a hi maheleko lezi zilo ke? u ta va byela uku: Kotisa lezi nwina mu nzi tsikileko, mu khozela a vanungungulu vanwani tikweni ga nwina, hizalezo mu ta tirela a vamatiko a tikweni gi nga hiko ga nwina. Deut. 29:24; Jer. 16:10

²⁰ Tlhatlhambutelani ka yindlu ya Jakobe, muba hungu ka Juda, muku:

²¹ Ingisani makunu, nwina vanhu va hungukileko, mu nga hiko ha kupima; mu nga ni mahlo ma nga woniko, na mu hi ni tindleve ti nga zwiko.

²² Xana a mu nzi chavi ke? ku wula Jehova; mu nga ta rurumela mahlweni ka mina ke? Mina loyi nzi nga veka a seke a kuva mbhingano wa bimhi wa kala kupinzuka, lezaku gi nga zi koti ku wu hunza. Hambu loku a mabyandlati ma gobhoza hi ntamu a ma zi koti ku hlula, hambu loku gi nga dzinza-dzinza hi ntamu, cima gi nga ta hunza. Joba 26:10; Tis. 104:9

²³ Kanilezi lava vanhu va nzi hluwukile ni kuva ni mbilu ya wukaneti; va hluwukile va famba.

²⁴ A va wuli timbilwini tabye ku: A hi chaveni Jehova Nungungulu wa hina, loyi a nyikako vula yo ranga ni ya wuxika hi tinguva ta yona, a wihi a hi hlayiselako a maviki ya kutshovela ka hina. Deut. 11:14; Miti. 14:17

²⁵ Hi zionho za nwina zi hambukisileko lezi zilo, mu vumala makatekwa hi kota ya zigoho za nwina.

²⁶ Hakuva lomu tikweni ga mina va kona vanhu va bihileko, va nyanimela kota vaxiyi va zinyanyani; va demba mitlhamu, va phasa vanhu.

²⁷ Kota a xikayila xi teleko hi zinyanyani, zinghaho ni tiyindlu tabye ti tele hi wukhohlisi. Hi kota ya lezi va mahile vahombe ni kuva vafumileko.

²⁸ Va kulukile, va tolile mafura; a kubiha kabye a ku na magumo; a va yimeli mhaka ya zisiwana lezaku zi vuvuma; a va tsemi mhaka ya vavumali hi fanelo.

²⁹ Xana mina nzi nga ta tsayisa lezi zilo ke? ku wula Jehova. Nzi nga ta ti photela a ka tiko go khwatsi hi legi ke?

³⁰ A zilo za mahanjalati ni manyala zi mahiwa tikweni legi.

³¹ A vaprofeti va profeta mawunwa, ni vapristi va fumela na va layiwa hi vona; hi lezo a vanhu va mina va zi lavako. Kanilezi mu ta maha yini a magunweni ya kona ke? Ezek. 13:6; Mat. 23:1