Jeremia 42 - Tshwa Bible

Jeremia a kombela vaJuda lezaku va nga rureli Gipite.

¹ Zonake a tinduna tontlhe ta mabutho na Johannani nʼwana Karea, na Jezania a nʼwana Hoxaia, ni vontlhe vanhu, lava va tsongwani ni vahombe,

² va loya ka muprofeti Jeremia, va yaku kakwe: Ha ku kombela lezaku u amukela a xikombelo xa hina, xa kuva u hi kombelela ka Jehova a Nungungulu wa wena, hina hontlhe hi seleko; hakuva hi vatsongwani hi seleko khwatsi hilezi u zi wonako hi mahlo ya wena;

³ kasi Jehova a Nungungulu wa wena a ta hi komba a ndlela leyi hi telako ku famba ha yona, ni lezi hi telako ku zi maha.

⁴ Zonake muprofeti Jeremia aku kabye; Nzi mu zwile. Nzi ta mu kombelela ka Jehova a Nungungulu wa nwina kota lezi mu zi ranzako. Ni zihi lezi Jehova a ta nga mu hlamula nzi ta mu byela; nzi nga ta mu fihlela nchumu.

⁵ Vaku ka Jeremia: Ngha Jehova ava mboni ya zinene yi tsumbekileko, loku hi nga mahi zontlhe lezi Jehova a Nungungulu wa wena a ta nga ku ruma ku ta hi byela zona. Ekso. 19:8; 24:3, 7

⁶ Hambu za kuva zo saseka kutani zo biha, hi ta ingisa a gezu ga Jehova a Nungungulu wa hina, loyi hi ku rumako ka yena, kasi hi fela ku humelela loku hi ingisa a gezu ga Jehova a Nungungulu wa hina.

⁷ Anzhako ka khume ga masiku, a mhaka ya Jehova yi lota ka Jeremia.

⁸ Yena i lo vitana Johannani a nʼwana Karea, ni tinduna tontlhe ta mabutho lawa ma nga hi naye, ni vanhu vontlhe a vatsongwani ni vahombe,

⁹ aku kabye: Jehova a Nungungulu wa Israeli, loyi mu nzi rumileko kakwe a ku ya veka a xikombelo xa nwina mahlweni kakwe, i ngalo:

¹⁰ Loku mu nonohisa mu tshama tikweni legi nzi ta mu akisa nzi nga mu wisi hasi; nzi ta mu byala nzi nga mu tsuwuli; hakuva nza xaniseka hi kubiha loku nzi mu maheleko kona.

¹¹ Mu nga chavi a hosi ya le Babuloni, leyi mu yi chavako makunu; mu nga yi chavi, ku wula Jehova, hakuva nzi na nwina a ku mu hanyisa, nzi mu hlanguta canjeni ga yona.

¹² Nzi ta mu zwela wusiwana kasi yena a fela ku mu zwela wusiwana, a mu tlhelisa muya tikweni ga nwina,

¹³ Kanilezi loku muku: Hi nga ta tshama tikweni legi, mu nga ingisi a gezu ga Jehova a Nungungulu wa nwina,

¹⁴ muku; E, hi taya tikweni ga Gipite lomu hi to kala hi nga woni yimpi, ge hambu a kuzwa a guwa ga mpunzu, kutani kuzwa ndlala; hi lomo hi ta nga ya aka kona.

¹⁵ Loku zi hi tano zwanani a gezu ga Jehova, nwina misalela ya ka Juda, Jehova wa tiyimpi, a Nungungulu wa Israeli, i ngalo: Loku mu phika muya Gipite, mu ya luvela kona,

¹⁶ zonake a supado leyi mu yi chavako yi ta mu khamanyeta kwalomo tikweni ga Gipite, ni ndlala leyi mu yi tsutsumako yi ta mu lanzela yi mu tshingela kwalomo Gipite, mu fela kona.

¹⁷ A vanhu vontlhe lava va phikako vaya Gipite a ku ya luvela kona va ta dawa hi supado ni ndlala ni ntungu. A nga kona ni munwe wabye a ta nga pona a hlokiselelo lowu nzi ta nga va nehela.

¹⁸ Hakuva Jehova wa tiyimpi, a Nungungulu wa Israeli, i ngalo: Laha mu ta nga enghena Gipite nzi ta chulula a zanga ya mina hehla ka nwina, khwatsi hilezi nzi nga yi chululisisa zona hehla ka vaaki va Jerusalema. Mu tava xiruko ni xirewukiso, mu rukiwe ni ku xanziwa; mu nga ta ha wona legi wutshamu.

¹⁹ Jehova i mu byelile nwina misalela ya ka Juda, aku: Mu nga yeni Gipite! Tiveni lezaku nzi mu leletele nyamutlha lezi.

²⁰ Hakuva mu ti kanganyisile; hakuva mu nzi rumile ka Jehova a Nungungulu wa nwina, muku: Hi kombelele ka Jehova a Nungungulu wa hina, ni zihi lezi Jehova a Nungungulu wa hina a ta nga zi wula, hi byele hi ta zi maha.

²¹ Nzi mu byelile-ke nyamutlha, kanilezi a mu ingisangi a gezu ga Jehova a Nungungulu wa nwina ni ka xihi xilo lexi a nga nzi ruma xona ka nwina.

²² Hikwalaho zi tiveni khwatsi lezaku mu ta dawa hi supado, ni ndlala ni ntungu, a wutshanwini legi mu lavako ku ya luvela ka gona.