Jeremia 37 - Tshwa Bible

Jeremia a valelwa paxweni.

¹ Ku fumile hosi Zedekia nʼwana Josia, a wutshanwini ga Konia nʼwana Jehoiakimu, a mahiwa Hosi tikweni ga ka Juda hi Nebukadrezzare hosi ya Babuloni. 2 Tih. 24:17

² Kanilezi yena ni malanza yakwe ni vanhu va tiko, a va ingisangi timhaka ta Jehova leti a nga ti wula hi nomu wa muprofeti Jeremia.

³ Hosi Zedekia i, lo ruma Jehukali nʼwana Xelemia, na Zefania nʼwana Maaseya a mupristi, a ka Jeremia, aku: Hi kombelele makunu ka Jehova a Nungungulu wa hina.

⁴ A ka lexo xikhati Jeremia i wa enghena ni ku huma xikari ka vanhu, hakuva va wa nga se ku mu enghenisa paxweni.

⁵ A yimpi ya Faro yi lo huma hi Gipite, zonake a maKaldea lawa ma nga vimbezele Jerusalema, loku ma zi zwile ma lo andlamuka hi le Jerusalema.

⁶ Zonake a mhaka ya Jehova yi lota ka muprofeti Jeremia, yiku:

⁷ Jehova a Nungungulu wa Israeli i ngalo: Byelani hosi ya ka Juda loyi a nga mu rumela ka mina a ku ta nzi wutisa, muku: A yimpi ya Faro leyi yi humeleko a kuta mu vuna, yi ta tlhelela a tikweni ga yona a Gipite.

⁸ A maKaldea ma ta wuya, ma ta vukela a muti lowu, ma wu khozisa, ni ku wu hisa hi nzilo.

⁹ Jehova i ngalo; Mu nga ti kanganyisa muku: A maKaldea ma ta suka xikari ka hina, hakuva ma nga ta suka.

¹⁰ Hakuva hambu loku mu wa lo hihirita a yimpi yontlhe ya maKaldea lawa ma mu vukelako, na ku sele ntsena vo bayisiwa, a munwe ni munwani wabye i wa ta huma hi lomu tendeni gakwe, a ta hisa lowu muti hi nzilo.

¹¹ Kute loku a yimpi ya maKaldea yi sukile mahlweni ka Jerusalema hi ku chava a yimpi ya Faro,

¹² Jeremia i lo huma hi Jerusalema aya tikweni ga Benjamini, kasi ku ya hendleletwa xipetso kona xikari ka vanhu.

¹³ Kute na a ha chikela a nyangweni ya Benjamini, a nduna ya vanyakasani yi wa hi seyo, a vito ga yona hi Irija nʼwana Xelemia nʼwana Hanania; a wihi a nga khoma muprofeti Jeremia, aku: Kasi wena u ya ti nyikela ka maKaldea!

¹⁴ Jeremia a hlamula, aku: Mawunwa, a nzi pfowoleli ka maKaldea. Hambu lezo a nga mu zwangi, Irija i lo khoma Jeremia a mu yisa ka tihosana.

¹⁵ A tihosana ti lo zangara ha Jeremia, ti muba, ti mu khotsela paxweni, lomu ndlwini ya Jonatani a mutsali, hakuva va wa yi mahile a paxo.

¹⁶ Jeremia i lo engheniswa lomu ndlwini ya paxo, loku a tshamile makheleni ya kona a masiku yo hlaya,

¹⁷ hosi Zedekia i lo rumisa a ku ya mu humesa, zonake hosi yi lo mu vitana ndlwini ya yona xihundleni, yiku: Xana gi ngava kona a gezu hi ka Jehova ke? Jeremia a hlamula, aku: Gi kona. A engeta aku; Wena u ta nyikelwa a canjeni ga hosi ya Babuloni.

¹⁸ Zonake Jeremia i lo wutisa hosi Zedekia, aku; Xana nzi ku onhele yini, ni malanza ya wena, ni lava vanhu, kala mu nzi khotsela lomu paxweni ke?

¹⁹ Va kwihi makunu a vaprofeti va nwina lava va nga profeta ka nwina, vaku: A hosi ya Babuloni yi nga ta mu vukela hambu a ku vukela tiko legi ke?

²⁰ Makunu hosi, nwinyi wanga, ingisa mukombelo wa mina, u nga nzi tlheliseli a ndlwini ya Jonatani a mutsali, nzi nga fela kona.

²¹ Zonake hosi Zedekia a va laya lezaku Jeremia a vekiwa hubyeni ya vanyakasani; a nyikiwa a xibaba xinwe siku ni siku hi le ruweni ga vabhiki, kala a zibaba zontlhe zi mbhela mutini. Lezo Jeremia i lo tshama hubyeni ya vanyakasani.