Jeremia 33 - Tshwa Bible

A zitsumhiso zinwani hi kutlheliselwa.

¹ A mhaka ya Jehova yi lo engeta yita ka Jeremia na a ha valelwe hubyeni ya vanyakasani, yiku:

² Ku wula Jehova loyi a tirako ntiro wakwe, Jehova loyi a wu longisako ni ku wu maha; Jehova hi vito gakwe: Ekso. 15:3

³ Vitana ka mina, nzi ta ku hlamula, nzi ku komba zilo za hombe, leʼzi fihlilweko lezi u nga zi tiviko.

⁴ Hakuva Jehova, a Nungungulu wa Israeli, i wula xungetano hi tiyindlu ta lowu muti, ni xungetano hi tiyindlu ta tihosi ta ka Juda, leti ti khungumulweko kasi ku vikela muti ka tinhulu ni tisupado.

⁵ Va enghena ka tona kasi kulwa ni maKaldea, kanilezi ti ta tala ni zirumbi za vanhu lava nzi va dayako a zangeni ya mina, ni xiviti xa mina, lava nzi fihleleko muti lowu a nghohe ya mina hi kota ya kubiha kabye.

⁶ Languta, nzi ta wu bohelela nzi wu chuma, ni ku va holisa; nzi ta va kombisa a wunyingi ga kurula ni zinene.

⁷ Nzi ta wuyisa a vakhonwiwa va ka Juda na Israeli, nzi ta va akisa kota kale.

⁸ Nzi ta va basisa kubiheni kabye kontlhe loku va nzi onheleko ha kona; nzi va tsetselela a zigoho zabye zontlhe lezi va nzi vukeleko ha zona, lezi va nga hambuka ha zona mahlweni mina, Ezek. 36:25; Zak. 13:1; Miti. 10:43

⁹ A muti lowu wu tava litsako ni wudzunzo ni wudumo ka mina mahlweni ka tontlhe a tixaka ta misava, leti ti ta ngazwa wunene gontlhe nzi ta nga va mahela; ti ta chava ni ku rurumela hi kota ya gontlhe a wunene ni kuvuvuma kontlhe nzi to va mahela kona.

¹⁰ Jehova i ngalo: A ka wutshamu legi nwina mu nge xiwula, gi nga hiko na munhu hambu xihari, ni le mitini ya Juda, ni lomu maruweni ya Jerusalema lawa ma gohetelweko lezaku ku nga hi na munhu kona, hambu ni muaki ge ni xihari,

¹¹ ku ta zwala a gezu ga nkulungwani ni ga litsako, a gezu ga muteki ni ga mutekiwa, ni gezu ga lava vange: Khesani Jehova wa tiyimpi, hakuva i nene, hakuva a wuxinji gakwe ga kala kupinzuka; ni magezu ya lava va nehako minyikelo ya kubonga a ndlwini ya Jehova. Hakuva nzi ta wuyisa lava va khomilweko ka legi tiko, va ta kotisa xikhatini xa kale, ku wula Jehova.

¹² Jehova wa tiyimpi i ngalo: A ka legi wutshamu gi mahileko xiwula, gi nga hiko na munhu hambu xihari, ni ka miti yontlhe ya gona, ka ha tava kona a wuako ga varisi lava va mahako a mitlhambi yabye yi zumba kona.

¹³ Lomu mitini ya le zitsungeni, ni le mitini ya tiluwa, ni lomu mitini ya Dzonga, ni le tikweni ga Benjamini, ni lomu matlhelweni ya Jerusalema, ni lomu mitini ya Juda, a mitlhambi ya ha ta hunza hi mandleni ya vahlayi, ku wula Jehova.

¹⁴ Ma hata masiku, ku wula Jehova, lawo nzi to tatisa a mhaka yi nene nzi yi wulileko hi yindlu ya ka Israeli ni xungetano hi yindlu ya ka Juda.

¹⁵ A ka lawo masiku ni ka lexo xikhati nzi ta vuxela Davida a Hluke ga kululama; yena i ta lamula hi nongameto ni kululama lomu tikweni. Isa. 11:1; Zak. 3:8; 6:12

¹⁶ Juda i ta hanyiswa masikwini lawo, ni Jerusalema i ta tshama hi kurula. Legi hi vito va to mu vitana ha gona, Jehova hi kululama ka hina.

¹⁷ Hakuva Jehova i ngalo: Davida cima a nga ta vumala munhu a tshamako xitshanwini xa wuhosi xa yindlu ya Israeli; 2 Sam. 7:16; 1 Tih. 2:4; 8:25

¹⁸ ni vapristi va nga vaLevi, va nga ta vumala a mahlweni ka mina wo nyikela a minyikelo ya kuhiswa, ni ku hisa minyikelo ya tinzhoho, ni ku humesa miphahlo siku ni siku.

¹⁹ A mhaka ya Jehova yi tile ka Jeremia, yiku;

²⁰ Jehova i ngalo: Loku mu wa ta zi kota ku tshova a xivumelwano xa mina ni mumu, ni xivumelwano xa mina ni wusiku, lezaku laho ku ngave na mumu ni wusiku a zikhatini za kona;

²¹ zonake a xivumelwano xa mina zinwe na Davida a nanza ga mina xi nga tshoveka, lezaku a ngave na nʼwana wo fuma xitshanwini xakwe xa wuhosi; zinwe ni vaLevi va nga vapristi lava va nzi tirelako.

²² Khwatsi hi yimpi ya tilo yi nga hlayiwiko, ni seke ga bimbi gi nga hiko na ku pimiwa, zakunghahi nzi ta anzisa a pswalo wa Davida a nanza ga mina, ni vaLevi lava va nzi tirelako.

²³ A mhaka ya Jehova yi tile ka Jeremia, yiku:

²⁴ Xana u wonile lezi va zi wulako vanhu, vaku: A mingango yimbiri leyi Jehova a yi hlawuleko, i yi tsikile ke? lezo va kanyisa a vanhu va mina, lezaku a va ha hi tiko.

²⁵ Jehova i ngalo: Loku a xivumelwano xa mina nzi xi mahileko ni mumu ni wusiku xi nga ha tiyi, loku nzi nga yimisangi a milayo yo fumela tilo ni misava,

²⁶ zonake nzi ta tsika a pswalo wa Jakobe ni wa Davida a nanza ga mina, lezaku nzi nga ha dzuki nzi teka xikari ka vana vakwe loyi a ta nga fumela a lixaka la Abrahama, Isaka na Jakobe, hakuva nzi ta wuyisa a vakhomiwa vabye nzi va hawukela.