Jeremia 31 - Tshwa Bible

¹ A xikhatini lexo, ku wula Jehova, nzi tava Nungungulu wa tontlhe tixaka ta ka Israeli, vona va tava vanhu va mina.

² Jehova i ngalo: A vanhu lava va ponileko matlhari va kumile tipswalo xiwuleni; Nzi ta ya nyika Israeli a kuhumula.

³ Jehova i wonekile ka mina hi le kule, aku: Nzi ku ranzile hi liranzo li nga gumelwiko; Nza ku hlayisela a tipswalo ta mina.

⁴ Nzi ta ku aketa, u tava u akilwe, wena nhwana wa Israeli; U ta tlhela u ti longisela a zikhitsi, U huma u ya kina hi kutsaka. Ekso. 15:20; Vala. 11:34; Tis. 68:25

⁵ Wa ha ta byala zivina zitsungeni za Samaria; Lava va byalako va taga a mihanzu ya kona.

⁶ Hakuva ku ta chikela a siku legi a varinzeli va le migangeni ya Efraime va to vitana ha gona, vaku: Sukani, a hi yeni Zioni ka Jehova, Nungungulu wa hina.

⁷ Hakuva Jehova i ngalo: Yimbelelani hi litsako ha Jakobe, Khanelani loyi a nga hosi ya matiko; Yimbelelani tisimu, muku: Jehova, hanyisa vanhu va wena, a misalelwa ya Israeli.

⁸ Nzi ta va wuyisa hi le tikweni ga Nwalungu, Nzi va tsombanyisela hi le magemeta-musi ya misava; Zinwe navo ku ni zikhumu ni zilema, A va tinyimba ni loyi a ha lunwako; Va ta wuya na va hi xidlemo xa hombe.

⁹ Va ta wuya na va kari va rila, Nzi va heleketa na va kari va khongela; Nzi ta va rangela micongweni ya mati, Hi ndlela yi basileko leyo va to kala a ku khunguvanyeka ha yona; Hakuva nzi dadani ka Israeli, Na Efraime hi matewula ya mina. Ekso. 4:22; Isa. 63:16

¹⁰ Ingisani a mhaka ya Jehova, nwina matiko, Tiyisani a zihlale za le kule ha yona, muku; Loyi a hangalasileko Israeli i ta mu hlengeleta, A mu hlayisa kota murisi a risako ntlhambi wakwe.

¹¹ Hakuva Jehova i tlhatlhisile Jakobe, A mu tirula canjeni ga wa ntamu ku hunza yena.

¹² Va tata na va yimbelela hi litsako le xitsungeni xa Zioni, Va tsutsumela a wunene ga Jehova; A ka tirigo, ni vinya, ni mafura, A ka tiyivana ni marole; A muhefemulo wabye wu ta fanana ni simu gi tsakamisilweko, Cima va nga ha ta hleleleka kambe.

¹³ Zonake a vanhanyana va ta ti xa lalisa hi kukina, A majaha ni zikhosana va tsaka khatiginwe; Hakuva nzi ta hunzulusa kurila kabye kuva litsako, Nzi ta ya tangalisa nzi va tsakisa kuxanisekeni kabye.

¹⁴ Nzi ta xurisa a vapristi hi mafura, Zonake a tiko ga mina gi ta xura hi wunene ga mina, ku wula Jehova.

¹⁵ Jehova i ngalo: A huwa ya zwala le Rama, Ya hlomulo ni mihloti ya xiviti, Hi Rakeli a rilelako zihlangana zakwe, Wa ala ku chavelelwa kota lezi a vana vakwe va teku bhi.

¹⁶ Kanilezi Jehova aku: U nga ha rili, A mahlo ya wena ma nga halati mihloti; Hakuva mitiro ya wena yi ta hakheliwa, ku wula Jehova; Va ta wuya hi le tikweni ga valala.

¹⁷ A kutsumba ku kona ka wena xikhatini xi tako, ku wula Jehova; Hakuva a vana va wena va ta wuyela tikweni gabye.

¹⁸ Nzi zwile Efraime ku ti tsetsa, aku: U nzi tsayisile, nzi kwapiwa A ku fanana ni nkuzana yi nga tolovelangiko a muyoko; Nzi hunzuluse, kasi nza wuya, Hakuva hi wena Jehova Nungungulu wa mina.

¹⁹ Anzhako na nzi hunzulukile, nza ti sola; Zonake loku nzi tivile a wutsumbu ganga nzi lo tiba tshambukhulu; Nzi si koyo tingana, nzi kanganyiseka, Hakuva nzi rwele a xisolo xa wuswa ga mina.

²⁰ Xana Efraime hi nwananga a ranzekako ke? a xiranzwa hi mbilu ke? Hakuva hambu loku nzi mu vukela nza mu khumbula hi ku tlula mpimo; A marumbu ya mina ma divitana hi kota ya yena, Futsi, nzi ta mu hawukela, ku wula Jehova.

²¹ Ti yimisele a zikombiso, u zimeka zikomba-ndlela; A mbilu ya wena yi kongoma a gonzo, A ndlela leyi u fambileko ha yona. Hunzuluka, wena nhwana wa Israeli, Wuya mitini ya wena.

²² Xana u ta pepetseka kala rini, wena nhwana wo tlula milayo? Hakuva Jehova i ta vanga xilo xiswa le misaveni, A wasati i ta hlayisa wanuna.

²³ Jehova wa tiyimpi, Nungungulu wa Israeli, i ngalo: Va ha ta wula gezu legi a tikweni ga Juda ni lomu mitini yabye, loku nzi wuyisile lavava nga wukhumbini, vaku: Jehova a ku katekise, wena wuako ga nongameto, Wena xitsunga xi basileko!

²⁴ A va ka Juda ni va miti yontlhe va ta aka lomo khatiginwe; a varimi ni varisi va mitlhambi.

²⁵ Hakuva nzi mahile a muhefemulo wu kareleko wuku retsevele, ni mihefemulo yontlhe yi xanisekako nzi yi xurisile. Tis. 107:9; Mat. 11:28

²⁶ (Makunu nzi lo khindlimuka, nzi cuwuka, a wurongo ga mina gi wa hi gi nene.)

²⁷ Langutani, a masiku ma hata, ku wula Jehova, lawa nzi to byaleta a tiko ga ka Israeli ni tiko ga ka Juda hi mbewu ya vanhu ni mbewu ya zihari.

²⁸ Khwatsi hi lezi nzi nga va rinzela kasi ku va tsuwula, ni ku ya pswhandlasa, ni ku va wisa, ni ku va hahlula, ni ku va xanisa; lezo nzi ta va languta loku va aka ni ku byala, ku wula Jehova.

²⁹ A ka lawo masiku va nga ta ha wula kambe, vaku: A vadadani va gile a mauva laʼmambisi, a meno ya vanana ma ni wureremeti.

³⁰ Kanilezi a munwe ni munwani i tafa hi xionho xakwe; a munhu ni munhu loyi a gako mauva mambisi, a meno yakwe ma ta telwa hi wureremeti.

³¹ Languta, a masiku ma tata, ku wula Jehova, Lawa nzi to maha a xivumelwano xiswa ni yindlu ya Israeli, ni yindlu ya ka Juda.

³² Na ku nga hi ku kota a xivumelwano lexi nzi xi mahileko ni vararu vabye, A sikwini legi nzi nga va khoma hi canja nzi va humesa a tikweni ga Gipite; A xivumelwano lexi va nga xi tshova, Kasi lezo nzi wa hi nwinyi wabye, ku wula Jehova.

³³ Kanilezi lexi hi xivumelwano nzi to xi maha ni yindlu ya ka Israeli Anzhako ka lawo masiku, ku wula Jehova: Nzi ta veka nayo wa mina nzeni kabye, Nzi wu tsala timbilwini tabye; Nzi tava Nungungulu wabye, Na vona va tava vanhu va mina. Ezek. 11:19; 2 Kor. 6:16

³⁴ A vaakelani va nga ta ha gonzisana, Munhu a nga ta gonzisa makabye, aku: Tiva Jehova! Hakuva vontlhe va ta nzi tiva, Kusukela ka vatsongwani vabye kala vahombe, ku wula Jehova. Hakuva nzi ta va tsetselela a kubiha kabye, Cima nzi nga ta ha alakanya a zionho zabye. Mika 7:18; Joh. 6:45; Rom. 11:27

³⁵ Jehova loyi a nyikako a gambo a ku woningela ni mumu, Loyi a vekileko a hweti ni tinyeleti a kuva zi woninga wusiku, Loyi a vindlusako a bimhi kasi a mabyandlati ya gona ma dzinza-dzinza; Jehova wa tiyimpi hi vito gakwe; i ngalo;

³⁶ Loku a milayo leyi yi nga have kona mahlweni ka mina, ku wula Jehova, Hi kona a lixaka la ka Israeli li ta nga gumesa A kuva tiko mahlweni ka mina kala kupinzuka.

³⁷ Jehova i ngalo: Loku ku pimiwa a wukulu ga matilo le hehla, Loku ziseketelo za misava zi kambiwa, Nzi ta tsika lixaka lontlhe la Israeli hi kota ya lezi va zi mahileko, ku wula Jehova.

³⁸ Languta, a masiku mata, ku wula Jehova, lawo a muti wu to akeliwa Jehova ha wona, a kusukela khokholeni ga Hananeli kala nyangweni ya khuzu.

³⁹ A lingoti la kupima li ta tshambulutwa liku gwirigwiri mugahgeni wa Garebi, li renzelekela liya Goa,

⁴⁰ Ni nkova wontihe wa zirumbi ni wa khuma, ni masimu wontihe kala congweni wa Kidroni, ni ku chikela gwitsini ga Livati la mahaxi ngomama wuceni, zi ta basiselwa ka Jehova; ku nga ta ha runzuwulwa hambu ku khungumulwa kala kupinzuka.