Jeremia 26 - Tshwa Bible

A kukanela ka Jeremia lomu tempeleni.

¹ Lomu kusanguleni ka kufuma ka Jehoiakimu, hosi ya ka Juda, ku tile mhaka leyi hi ka Jehova, yiku:

² Jehova i ngalo: Yima hi laha hubyeni ya yindlu ya ka Jehova, u wulawula ka vanhu ya miti ya ka Juda, lava va tako ku ta khozela ndlwini ya ka Jehova, a timhaka tontlhe leti nzi ku layileko a ku ti kanela kabye, u nga siyi yo siya. Deut. 4:2; Jer. 7:2

³ Kutani va ta ingisa, munwe ni munwani a hunzuluka ndleleni yakwe yo biha, lezaku kasi nzi nga va neheli a khombo legi nzi xuvileko a ku va mahela hi kota ya zimaho zabye zo biha. Jer. 18:8, 11; Jona 3:10

⁴ Va byele, uku: Jehova i ngalo: Loku mu nga nzi ingisi, mu famba hi nayo wa mina, lowu nzi mu nyikileko wona,

⁵ kasi ku ingisa a timhaka ta malanza ya mina a vaprofeti, lava nzi va rumeleko ka nwina, na ga hi mixo nzi va rumela, kanilezi nwina a mu ingisangi;

⁶ mina nzi ta maha leyi yindlu kota Xilo, ni muti lowu nzi ta wu maha xiruko ka tontlhe tixaka ta misava.

⁷ Va lo zizwa a vapristi, ni vaprofeti, ni vontlhe vanhu, loku Jeremia a kanela timhaka leti ndlwini ya Jehova.

⁸ Loku Jeremia a gumesile ku kanela zontlhe lezo Jehova a mu layileko zona a ku tivisa vanhu, a vapristi ni vaprofeti ni vontlhe vanhu va lo mu khoma, vaku: Futsi u tafa.

⁹ Hikuyini wena u profetileko hi vito ga Jehova, uku: Leyi yindlu yi ta kota Xilo, lowu muti wu tava rumbi, ku nga hi na muaki ke? Ni vontlhe vanhu va lo tsombana ka Jeremia lomu ndlwini ya Jehova.

¹⁰ A tihosana ta ka Juda, loku ti zwile lezo, ti lo kanziha hi ndlwini ya hosi tiya ndlwini ya Jehova, ti ya tshama hi laha wuenghenweni ga nyangwa yiswa ya Jehova.

¹¹ A vapristi ni vaprofeti va lo byela a tihosana ni vanhu vontlhe, vaku: Loyi munhu i fanelwe hi kufa, hakuva i profetile a vukela lowu muti, kota mu zi zwileko hi tindleve ta nwina. Miti. 6:13

¹² Jeremia i lo hlamula tontlhe tihosana ni vanhu vontlhe, aku: Jehova i nzi rumile ku profeta hi yindlu leyi ni muti lowu, hi tontlhe a timhaka leti mu ti zwileko.

¹³ Hikwalaho sasisani makunu a mahanyela ya nwina ni zimaho za nwina, mu ingisa a gezu ga Jehova a Nungungulu wa nwina, zonake Jehova i ta hunzuluka ka khombo legi a gi wulileko ha nwina.

¹⁴ Kanilezi hi tlhelo ga mina, nzi le ntanwini wa nwina; mahani ha mina lezi zi wonekako na zi sasekile kuwoneni ka nwina.

¹⁵ Ntsena tivani lezaku, loku mu nzi daya, mu neha a nkhata wu nga hiko na nanzu hehla ka wutsumbu ga nwina, ni hehla ka muti lowu, ni hehla ka vontlhe va akileko ka wona; hakuva hi Jehova a nzi rumileko a ku ta kanela ka nwina tontlhe leti timhaka. Mat. 23:35

¹⁶ Zonake a tihosana ni vontlhe vanhu vaku ka vapristi ni ka vaprofeti: Loyi munhu a nga faneli kufa, hakuva i kanela ka hina hi vito ga Jehova a Nungungulu wa hina.

¹⁷ Zonake ku lo suka a vo kari va masingalakati ya tiko, va wula ka wontihe a hlengeletano wa vanhu, vaku;

¹⁸ Mika wa le Moraxi i lo profeta masikwini ya Hezekia hosi ya ka Juda, a byela vontlhe vanhu va ka Juda, aku: Jehova wa tiyimpi i ngalo: Zioni gi ta rimiwa kota simu, Ni Jerusalema gi tava nhulu ya maribye, Ni xitsunga xa tempeli xi tava xitsunga xa khwati. Mika 3:12

¹⁹ Xana Hezekia hosi ya ka Juda, ni gontlhe tiko ga Juda, va mu dele ke? Xana a nga chavangi Jehova, a kombela thomo ga yena, kasi Jehova a hunzuluka a ka khombo lego a nga wa wulile ha vona? Kanilezi hina hi mahela a mihefemulo ya hina a kubiha ka hombe.

²⁰ Kambe ku wa hi kona munwani munhu loyi a nga profeta vitweni ga Jehova, i wa hi Uria, nʼwana Xemaia, wa le Kiriat-Jearimu, a wihi a nga profeta a vukela muti lowu ni tiko legi, a ku ringana ni tontlhe a timhaka ta Jeremia.

²¹ A hosi Jehoiakimu ni tinhenha takwe tontlhe, ni tihosana tontlhe, loku va zwile a timhaka takwe, a hosi yi lo hlota ku mu daya. Loku Uria a zi zwile i lo chava, a pfowola aya Gipite.

²² Hosi Jehoiakimu i lo rumela a vanhu va mu lanza le Gipite, hi Elna-tani a nʼwana Akbori, ni vavanuna vo kari zinwe naye.

²³ Va lo humesa Uria le Gipite, va mu wuyisa ka hosi Jehoiakimu, loyi a nga ta mu daya hi supado, a hoxa xirumbi xakwe minkeleni ya cumbu hi vanhu.

²⁴ Kanilezi a woko ga Ahikamu, a nʼwana Xafani, gi wa hi zinwe na Jeremia, lezaku a nga nyikelwi mandleni ya vanhu a dawa. 2 Tih. 22:12, 14