Jeremia 25 - Tshwa Bible

Xiprofeto xungetano ni kuhlula ka Nebukadrezzare.

¹ A gezu legi gi ngata ka Jeremia xungetano hi vanhu va ka Juda hi lembe ga wumune ga kufuma ka Jehoiakimu, a nʼwana Josia, hosi ya ka Juda, gi nga hi lembe go ranga ga kufuma ka Nebukadrezzare, hosi ya Babuloni;

² a gezu legi muprofeti Jeremia a nga byela tiko gontlhe ga ka Juda ni ka vontlhe a vaaki va Jerusalema, aku:

³ A kusukela ka lembe ga wukhume ni manharu ya Josia, a nʼwana Amoni, hosi ya ka Juda, kala legi siku, a ka malembe laya ya 23 a gezu ga Jehova gi tile ka mina, nzi gi kanele ka nwina na ga hi mixo, kanilezi nwina a mu ingisangi.

⁴ Kambe Jehova i rumele ka nwina a malanza yakwe wontihe hi kusimamisilweko, va nga vaprofeti; kanilezi nwina a mu ingisangi hambu aku phuhunha tindleve kasi kuzwa. 2 Tih. 17:13

⁵ Va waku: Hunzulukani munwe ni munwani a ndleleni yakwe yo biha, ni ka kubiha ka zimaho za nwina, kasi ma aka tikweni legi Jehova a nyikileko nwina ni vararu va nwina, kusukela kaleloko ku kala kupinzuka.

⁶ Mu nga lanzeli vanwani vanungungulu, kasi mu va tirela ni ku va khizamela, mu nga vindlusi a khulo ga mina hi mitiro ya mandla ya nwina, kasi mina nzi nga mu maheli kubiha.

⁷ Hambu lezo a mu nzi ingisangi, ku wula Jehova, lezaku kasi mu vindlukisa a zanga ya mina hi mitiro ya mandla ya nwina, kasi ku ti hala khombo ha nwece.

⁸ Hikwalaho Jehova wa tiyimpi i ngalo: Kotisa lezi mu nga ingisiko a timhaka ta mina,

⁹ nzi ta rumela nzi ya lava a tixaka tontlhe ta le Nwalungu, ku wula Jehova, ni ka Nebukadrezzare, a nanza ga mina a nga hosi ya Babuloni; nzi ta va tisa a kulwa ni tiko legi ni vaaki va gona, ni matiko wontihe ma gamekeneko; nzi ta va lovisela magumo, nzi ta va maha a xirewukiso, ni xiruko, ni marumbi ya kala kupinzuka.

¹⁰ Nzi ta miyeta xikari kabye a gezu ga kutsaka ni kuhlakana, a gezu ga muteki ni mutekiwa, a guwa ga maribye ya xigayo, ni kuwonekela ka kandiya. Jer. 7:34; Kuv. 18:22

¹¹ Gontlhe legi tiko gi tava marumbi ni xirewukiso; ni matiko laya ma ta tirela a hesi ya Babuloni a 70 wa malembe.

¹² Kanilezi loku ku hunzile a 70 wa malembe, nzi ta tsayisa a hosi ya Babuloni ni tiko ga kona hi kota ya kusoholoka kabye, ku wula Jehova, ni tiko ga maKaldea nzi ta gi maha giva xiwula kala kupinzuka. 2 Kro. 38:21; Ezra 1:1; Dan. 9:2

¹³ Nzi ta tatisa hehla ka tiko lego tontlhe a timhaka ta mina, leti nzi ti wulileko ha gona, zontlhe lezi zi tsalilweko ka legi bhuku, lezi Jeremia a profetileko hi wontihe lawa matiko.

¹⁴ Hakuva na vonawu va ta khoziswa hi matiko manyingi ni tihosi ta hombe; nzi ta va tlhelisela ku ringana ni zimaho zabye ni mitiro ya mandla yabye.

¹⁵ Hakuva Jehova a Nungungulu wa Israeli i te ngalo ka mina: Teka a gombe legi ga vinya ga zanga canjeni ga mina, u nwisa wontihe a matiko nzi to ku rumela ka wona. Kuv. 14:10; 16:19

¹⁶ Va tanwa lezaku va dedereka ni ku hunguka, hi kota ya supado leyi nzi to yi rumela xikari kabye.

¹⁷ Nzi lo teka a gombe canjeni ga Jehova, nzi gi nyikela ka wontihe matiko manwa, lawo Jehova a nga nzi rumele ka wona.

¹⁸ Hi Jerusalema ni miti ya ka Juda, ni tihosi ta kona ni tihosana tabye, lezaku ma maha marumbi, ni xirewukiso, ni xiruko, kota ma nga zona nyamutlha;

¹⁹ na Faro a hosi ya le Gipite, ni malanza yakwe, ni tihosana takwe ni vanhu vakwe vontlhe;

²⁰ ni valuveli va kona; ni tihosi tontlhe ta tiko ga Uzi, ni tihosi tontlhe ta tiko ga maFilistia, ni Askeloni ni Gaza, ni Ekroni ni salela wa Axdodi;

²¹ na Edome, na Moabi, ni vana va Amoni;

²² ni tontlhe tihosi ta Tire ni Sidoni, ni tihosi ta zihlale zi nga le tlhatuko wa bimbi;

²³ na Dadani, na Tema, na Buzi ni vontlhe va nga ni misisi yi kayilweko mareveni;

²⁴ ni tontlhe tihosi ta Arabia, ni tontlhe a tihosi ta valuveli lava va tshamako xiwuleni;

²⁵ ni tontlhe tihosi ta Zimri, ni tontlhe tihosi ta Elami, ni tontlhe tihosi ta Media;

²⁶ ni tihosi tontlhe ta le Nwalungu, leti ti nga kusuhi ni ta le kule, a yinwe ni yinwani, ni mifumo yontlhe ya misava, yi nga kona misaveni. Ni hosi ya le Xexaki yi tanwa a gombe anzhako kabye.

²⁷ U ta va byela, uku: Jehova wa tiyimpi a Nungungulu wa Israeli, i ngalo: Nwanani mu popiwa, ni ku paleka, muwa mu nga ha vuki kambe, hi kota ya supado nzi to yi rumela xikari ka nwina.

²⁸ Kanilezi loku va ala ku teka a gombe mandleni ya wena vanwa, u taku kabye: Jehova wa tiyimpi i ngalo: Hizinene mu yimelwe hi kunwa!

²⁹ Hakuva, hi nga wonani a muti lowu wu vitiwako hi vito ga mina, nzi sangula ha wona nzi wu tsayisa; xana nwina mu ta tsikiwa mu nga tsayiswi ke? Mu nga ta tsetselelwa, hakuva nzi ta hloma supado, yiba a vaaki vontlhe va misava, ku wula Jehova wa tiyimpi. Ezek. 9:6; 1 Ped. 4:17

³⁰ Hikwalaho u ta profeta kabye leti timhaka, uku: Jehova wa dzuma-dzuma hi le hehla, A zwata gezu gakwe hi lomu ndlwini yakwe yo basa; Wa dzumela wuriselo gakwe hi kuchavisileko, Waba huwa kukotisa vakhuwuti va mauva, Na vukela vaaki vontlhe va misava. Joeli 3:16; Am. 1:2

³¹ A guwa gi ta zwala kala magumelweni ya misava; Hakuva Jehova i ni zunga ni matiko, I ta lamula nyama yontlhe; I ta nyikela a vabihileko ka supado, ku wula Jehova.

³² Jehova wa tiyimpi i ngalo: A khombo gi taya ka tiko ginwe ni ginwani, A xingulu xi chavisekako xi ta huma le magemetamusi ya misava.

³³ Lava va delweko hi Jehova va ta mbambamela misaveni kusukela mbhirini kala ka yinwani mbhiri ya misava; va nga ta rilelwa, hambu ku hlengeletiwa, hambu ku lahliwa, va te maha koho misaveni.

³⁴ Nwina varisi,: huwelelani mu rila; Puluwunzani khumeni nwina vahombe va ntlhambi; Hakuva a masiku ya kuchabyiwa ka nwina ma tshinele. Nzi ta mu hangalasa, mu tawa Kota a xibya xa lisima.

³⁵ A varisi va ta vumala ndlela yo pfowola ha yona, Ni vahombe va tlhambi va nga ta pona.

³⁶ Hi nga zwani a kurila ka varisi, Ni kubuwelela ka vahombe va ntlhambi! Hakuva Jehova wa onha a wuriselo gabye,

³⁷ Ni magelo ya kurula ma lobyisiwa Hi kota ya kuhisa ka zanga ya Jehova.

³⁸ Yena i humele kota nghala yi humako nghuleni ya yona. A tiko gabye gi mahile marumbi, Hi kota ya kutshisa ka supado ya Jehova, Ni kota ya kuhisa ka zanga yakwe.