Jeremia 23 - Tshwa Bible

A kuta ka Hosi yi lulamileko.

¹ Khombo a ka varisi lava Va onhako ni ku hangalasa a tiyivu ta wuriselo ga mina! ku wula Jehova. Jer. 10:21; Ezek. 34:2

² Hikwalaho Jehova Nungungulu wa Israeli i ngalo xungetano hi varisi va risako a vanhu va mina: Nwina mu hangalasile a tiyivu ta mina, mu ti hlongola, a mu chelangi kota hi tona. Nzi ta mu tsayisa hi kota ya kubiha ka zimaho za nwina, ku wula Jehova.

³ Mina wutsumbu nzi ta hlengeleta a misalela ya tiyivu ta mina, ti huma matikweni wontihe lomu nzi ti hangalasileko kona, nzi ti tlhelisela marangeni ya tona; ti ta pswala ti enzeleka.

⁴ Nzi ta yimisa varisi hehla ka tona, lava va ta nga ti risa. Cima ti nga ta ha chava, hambu ku rurumela, ku nga ta vumaleka ni yinwe ya tona, ku wula Jehova. Isa. 40:11; Ezek. 34:11

⁵ A masiku mata, ku wula Jehova, lawo nzi to vuxela Davida a Hluke gi lulamileko. I tava hosi ya ngoma, a humelela, yena i ta lamula hi nongameto ni kululama lomu tikweni.

⁶ Juda i ta hanyiswa masikwini yakwe, na Israeli i ta tshama hi kurula. Legi hi vito gakwe a to vitanwa ha gona: Jehova hi kululama ka hina.

⁷ Hikwalaho, a masiku mata, ku wula Jehova, lawo ku to kala ku nga ha wuliwi kambe ku: Jehova wa hanya, loyi a humesileko a vanana va ka Israeli hi le tikweni ga Gipite;

⁸ kanilezi va taku: Jehova wa hanya, loyi a nga rangela a vana va yindlu ya ka Israeli va huma hi le tikweni ga Nwalungu, ni le matikweni wontihe lawo a nga va hlongolela kona; va ta ta aka tikweni gabye.

A vaprofeti va mawunwa.

⁹ Xungetano ni vaprofeti. A mbilu ya mina yi panzekile, A marambu ya mina wontihe ma gutlagutla; Nzi kotisa munhu loyi a popilweko, Ni loyi a dakilweko hi vinya, Hi kota ya Jehova ni timhaka takwe to basa.

¹⁰ Hakuva a tiko gi tele hi zibhayi, Ga rila hi kota ya nzhukano; A wuriselo ga xiwula gi swile; A mafambela yabye ma bihile, Leʼzo biha hi ntamu wabye.

¹¹ Hakuva a vaprofeti ni vapristi vontlhe a va basangi; Nzi kumile a kubiha kabye ni lomu ndlwini ya mina, ku wula Jehova.

¹² Hikwalaho a ndlela yabye yi tava ni matshamu ma retemukako munyameni, Va ta susumetiwa va wela kona. Nzi ta va nehela khombo a ka lembe ga kubiwa kabye, ku wu la Jehova.

¹³ Nzi wonile zo nyenyeza ni ka vaprofeti va Samaria; Va lo profeta vitweni ga Baali, Va hambukisa a vanhu va mina va Israeli.

¹⁴ Kanilezi hi ka vaprofeti va Jerusalema nzi wonile a zilo zo tshisa nguvu: Vona va maha wuoswi, va hemba mawunwa; Va tiyiseta a mawoko ya vamahi va kubiha, Lezaku kasi ku nga hunzuluki ni munwe kubiheni kakwe. A ka mina va fanana ni Sodoma, Ni vaaki va Jerusalema va kota Gomora. Gen. 13:13; Deut. 32:32; Ezek. 13:22

¹⁵ Hikwalaho zakunghahi a wulako Jehova xungetano hi vaprofeti: Nzi ta va gisa manonwe ni ku va gisa wutsulu; Hakuva a kungabasi ku thapela tiko gontlhe Na ku huma hi ka vaprofeti va le Jerusalema.

¹⁶ Jehova wa tiyimpi i ngalo: Mu nga ingisi a timhaka ta vaprofeti lava va profetako ka nwina, hakuva va mu kanganyisa; va kanela a miwoniso ya timbilu tabye wutsumbu, na zi nga humi nonwini wa Jehova. Ezek. 13:2; Mat. 7:15

¹⁷ Va kanela hi kusimamisilweko a ka lava va nzi kanyisako, vaku: Jehova i ngalo: Mu ta tshameka khwatsi. Ni ka vontlhe va fambako hi kunonoha ka timbilu tabye, vaku: Gi nga tata khombo hehla ka nwina!

¹⁸ Himani wa vona a yimileko makungwihi ya Jehova, lezaku a wona ni kuzwa gezu gakwe ke? Himani a xiyako a mhaka yakwe a yi ingisa ke? Joba 15:8; Rom. 11:34; 1 Kor. 2:16

¹⁹ Langutani, a xipupuri xa Jehova, xi nga xiviti xakwe, xi vindlukile hi ntamu, xi fana ni xingulu; xi ta wela hehla ka tihloko ta vabihileko.

²⁰ A zanga ya Jehova yi nga ta bohla na a nga se ku tatisa a mixuvo ya mbilu yakwe; a masikwini ma ha tako mu ta zi pimisisa khwatsi.

²¹ A nzi rumangi vaprofeti lavo, kanilezi va ti tsutsumele ha voce; a nzi xuxangi navo, kanilezi va lo profeta ha voce.

²² Loku va wa yimile hubyeni ya mina, ngha va tivisile a vanhu va mina a timhaka ta mina, va va hunzulusa ndleleni yabye yo biha, ni ka zimaho zabye zo biha.

²³ Xana nzi Nungungulu wa laha kusuhani ntsena, na nzi nga hi Nungungulu wa le kule ke? ku wula Jehova. Miti. 17:27

²⁴ Xana munhu a nga fihlala matshanwini ya zihundla lezaku nzi nga mu woni ke? ku wula Jehova. Xana a nzi tatisi a tilo ni misava ke? ku wula Jehova.

²⁵ Nzi zwile lezi a vaprofeti va zi wulako, lava va profetako mawunwa hi vito ga mina, vaku: Nzi lorile, nzi lorile!

²⁶ Xana lezi zi tava kona kala rini lomu timbilwini ta vaprofeti va profetako a mawunwa ke? lava va profetako a wukhohlisi ga timbilu tabye wutsumbu?

²⁷ Na va alakanya lezaku va ta maha vanhu va mina va rivakelwa hi vito ga mina hi kota ya miloro yabye, leyi munwe ni munwani a byelako a muakelwane, kotisa lezi a vakoko vabye va nga rivala a vito ga mina hi kota ya Baali. Vala. 3:7; 8:33

²⁸ A muprofeti loyi a nga ni noro, a wu hlawute; kanilezi loyi a nga ni mhaka ya mina, ngha a kanela yona hi kutsumbeka. Hikuyini mu patsako a mungu ni mavele ke? ku wula Jehova.

²⁹ Xana a mhaka ya mina a yi koti nzilo ke? ku wula Jehova; a yi fani ni hamela leyi yi panzako maribye ke? Maheb. 4:12

³⁰ Hikwalaho nza vukela a vaprofeti, ku wula Jehova, lava va yivako a timhaka ta mina, a munwe ni munwani ka xaka gakwe.

³¹ Nza vukela a vaprofeti, ku wula Jehova, lava va kanetako hi tirimi tabye, na vaku: Jehova i ngalo.

³² Ina, nza vukela lava va profetako miloro ya mawunwa, ku wula Jehova, loku va yi hlawutela va hambukisa a vanhu va mina hi mawunwa yabye ni kubyabyatsa kabye. Kasi mina a nzi va rumangi, hambu ni ku va laya; a va vuni nchumu ka lava vanhu, ku wula Jehova.

³³ Loku vanhu lava, kutani muprofeti, kutani mupristi, va ku wutisa vaku: Hi wihi a nzhwalo wa Jehova ke? zonake u ta va hlamula, uku: Hi nwina a nzhwalo wa kona! Nzi ta mu chokola, ku wula Jehova.

³⁴ A muprofeti, kutani mupristi, kutani munhu loyi a to wula, aku: Nzhwalo wa Jehova, inaloyi nzi ta mu tsayisa zinwe ni yindlu yakwe.

³⁵ Munwe ni munwani i ta wutisa muakelwane kutani makabye, aku: Jehova i hlamule yini ke? kutani, Xini a wulileko Jehova ke?

³⁶ A nzhwalo wa Jehova mu nga ta ha wu kumbuka kambe; hakuva a mhaka ya munwe ni munwani yi tava nzhwalo wakwe; kota lezi mu soholotileko a timhaka ta Nungungulu a hanyako, ta Jehova wa tiyimpi a Nungungulu wa hina.

³⁷ U ta wula ka muprofeti, uku: Jehova i ku hlamule yini? kutani, Xini a wulileko Jehova ke?

³⁸ Kanilezi loku nwina muku: A nzhwalo wa Jehova, hikwalaho Jehova i taku: Lezi mu wulako a mhaka leyi yaku: A nzhwalo wa Jehova, kasi nzi mu layile nziku: Mu nga ha wuli kambe, muku: A nzhwalo wa Jehova;

³⁹ hikwalaho mina nzi ta mu rivakelelwa magumo, nzi mu hlongola mahlweni ka mina, nwina ni muti lowu nzi nga wu nyika nwina ni ka vararu va nwina.

⁴⁰ Nzi ta mu rwexa a nzhukano wa pinzukelwa, ni tingana ti nga gumelwiko, leti ti nga hiko na ku rivalwa.