Jeremia 20 - Tshwa Bible

Jeremia lomu makhotsweni.

¹ Paxuri, nʼwana Immeri, a mupristi loyi a nga hi hloko lomu ndlwini ya Jehova, laha a ngazwa Jeremia na a kari a profeta leti timhaka,

² i loba Jeremia muprofeti, a mu khotsela makhotsweni ma nga hi le nyangweni ya le hehla ya Benjamini, lomu ndlwini ya Jehova. Jer. 29:26; 37:15

³ Hi manziko wa kona Paxuri i lo humesa Jeremia hi lomu makhotsweni. Zonake Jeremia aku ngalo kakwe: Jehova a nga ku chulangi vito ku u Paxuri, kanilezi u Magor-missabibi.

⁴ Hakuva Jehova i ngalo: Nzi ta ku maha xichaviso a ka wutsumbu ga wena ni ka maxaka ya wena wontihe; vona va ta dawa hi tisupado ta valala vabye, wena wutsumbu u ta zi wona: Nzi ta nyikela gontlhe Juda a canjeni ga hosi ya Babuloni, yi ta va yisa kukhonweni le Babuloni, yi va daya hi supado.

⁵ Tlhatakumbiri, nzi ta nyikela kontlhe a kufuma ka muti lowu ni mabhinzu ya kona, ni zontlhe zilo za tsengo, ni titshomba tontlhe ta tihosi ta ka Juda nzi ta zi nyikela canjeni ga valala vabye, lava va ta nga zi teka ziva muphango, va zi yisa Babuloni.

⁶ Na wena Paxuri, ni vontlhe va tshamako ndlwini ya wena mu ta yiswa kukhonweni. Wena u taya Babuloni, laho u ta fela kona, ni ku lahlelwa kona zinwe ni maxaka ya wena wontihe, lawo u nga ma profetela mawunwa,

A kuketa ka Jeremia.

⁷ O Jehova, u nzi vumelisile, nzi vumele a ku kholwiswa; Wena u ni ntamu a ku nzi hunza, u nzi hlulile. Nzi mahile xihlekiso gontlhe siku, Vontlhe va nzi tseketsela.

⁸ Hakuva hi xikhanzakanya xa zalezi nzi wulawulako, nza keta; Nziba huwa hi kutsimbeketa ni kuphangiwa. Hakuva a mhaka ya Jehova va nzi rukatela hi kota ya yona, Ni ku nzi hleka gontlhe siku.

⁹ Loku nziku: Nzi nga ta ha mu kumbuka, Hambu ku xuxa vitweni gakwe; Zonake ku kona a mbilwini ya mina a ku fanana ni nzilo wu vurako, Na wu valelwe lomu marambyini ya mina, Nzi rerekile hi ku ti khoma, a nza ha zi koti.

¹⁰ Hakuva nzi zwile vanyingi na va nzi hleva, Matlhelweni wontihe ku kona kuchava. Vaku: Mu kecareni, hi ta mu kecara. A vanghana lava nzi toloveleneko navo Va langutela a kuwa ka mina, vaku: Kutani a nga kucetelwa, zonake hi ta mu hluthula, Kasi hi ti photela ka yena.

¹¹ Kanilezi Jehova i zinwe na mina Kota a nhenha yi chavisekako; A vaxanisi va mina va ta khungu vanyeka, va nga nzi hluli; Kanilezi va ta si koyo tingana, hakuva a va mahangi hi wutlhari; Ti tava tingana ti nga mbheliko, leto ti nga hiko na ku rivalwa.

¹² Kanilezi Jehova wa tiyimpi, loyi u ringako a valulamileko, Loyi u wonako a tiswa ni timbilu; Nzi ta wona loku u nzi photela ka vona, Hakuva nzi ku tivisile a mhaka ya mina. 1 Sam. 16:7; Jer. 11:20

¹³ Yimbelelani ka Jehova, Mu mu dzunza Jehova; Hakuva wa ponisa a muhefemulo wa loyi a vumalako A mandleni ya vobiha.

¹⁴ A gi rukiwe a siku lego nzi nga pswalwa ha gona! A siku lego mamani a nga nzi beleka ngha gi nga katekisiwi! Joba 3:1; 10:18

¹⁵ Ngha a rukiwa a munhu loyi a nga bikela dadani, aku: U belekelwe a nisanyana, a mu tsakisa nguvu.

¹⁶ A munhu loye ngha a fanana ni miti Leyo Jehova a yi hahlulako na a nga yi tsetsi. Ngha yena azwa tihuwa laha mixweni, Ni huwa ya yimpi laha hlikanhini; Gen. 19:24; Lu. 17:29; Juda 7

¹⁷ Hilezi a nga kala ku nzi daya na nza hi rumbyini, Kasi mamani ava tsiza ga mina, A simamisa ava ni rumbu.

¹⁸ Nzi wa humela yini hi lomu rumbyini, Lezaku nzi ta wona mbhukutsa ni hlomulo, Laha kaku a masiku ya mina ma gumesa hi tingana ke?