Jeremia 17 - Tshwa Bible

A xionho xi tsalilweko mbilwini.

¹ A xionho xa Juda xi tsalilwe hi pena ya xiketse, yi nga ni muzwa wa daimani; xi kehlelwe timbilwini tabye, ni lomu ka timhonzo ta maganzelo ya nwina,

² a vana vabye na va alakanya a maganzelo yabye ni zifananiso zabye za Axera lahasi ka tisinya to nyuka lomu migangeni.

³ O xitsunga xa mina lomu sinwini, nzi ta nyikela a nhunzu ya wena ni titshomba ta wena akuva zi phangiwa, zinwe ni matshamu ya wena ma tlakukileko, hi kota ya zionho lezi u zi mahileko tikweni ga wena gontlhe.

⁴ Hi nanzu wa wena wutsumbu u ta lahlekelwa hi tshomba ya wena leyi nzi ku nyikileko; nzi ta ku maha u tirela a valala va wena a tikweni legi u nga gi tiviko. Hakuva mu dzivele a nzilo wa zanga ya mina lowu wu ta nga vura kala kupinzuka.

⁵ Jehova i ngalo: I rukatelwe a munhu loyi a tsumbako munhu, A mahako nyama yiva woko gakwe, A mbilu yakwe na yi hambene na Jehova.

⁶ Hakuva i ta fanana ni xihlahla xo woma lomu xiwuleni, A nga ta wona makatekwa loku mata; Kanilezi i ta tshama matshanwini ma swileko lomu xiwuleni, A tikweni ga munyu legi gi nga hiko na munhu.

⁷ I katekile a munhu loyi a tsumbako Jehova, A wihi a kutsumba kakwe ku nga Jehova.

⁸ Hakuva i ta fanana ni sinya yi byelweko kusuhi ni mati, Leyi a mitsu ya yona yi navako kala matini, Hambu kuva ni mumu a yi chavi, Kanilezi a matluka ya yona ma simama ma nyuka; A yi karateki hi lembe go kala vula, Hambu ku tsika ku phandlula mihanzu.

⁹ A mbilu yi khohlakele ku hunza zilo zontlhe, Yi bolile, yi nga tibyiwa hi mani ke? Tis. 1:3

¹⁰ Mina Jehova nzi hlota mbilu, nzi kamba a tiswa; Nzi nyika ka munwe ni munwani kota mahanyela yakwe, Kukotisa a mbhanzu wa zimaho zakwe. 1 Sam. 16:7; Rom. 2:6; Kuv. 2:23

¹¹ Khwatsi hi hwari leyi yi kuhlehelako a manza lawa yi nga ma tsikelangiko, Zinghaho ni loye a hlengeletelako a kufuma handle ka nongameto; Na hi xikari ka masiku yakwe i ta ku tsika, Ni kugumeseni kakwe i tava muhunguki.

¹² A wutshamu ga hina go basa xitshamu xa wukosi xi tlakukileko Xi vekilweko hehla kusukela kusanguleni.

¹³ Wena Jehova u kutsumba ka Israeli; Vontlhe lava va ku tsikako va taku koyo tingana. Vontlhe lava va sukako ka mina va ta tsaliwa vunyeni; Hakuva va tsikile Jehova, loyi a nga xibuka xa mati ya wutomi. Joh. 4:14

¹⁴ Nzi chume Jehova, nzi tava nzi chumilwe, Nzi hanyise, nzi tava nzi hanyisilwe; Hakuva hi wena a wudzunzo ga mina.

¹⁵ Languta, va wula ka mina, vaku: Yi kwihi a mhaka ya Jehova ke? A yi tatiseke makunu! Ezek. 12:22; 2 Ped. 3:4

¹⁶ Mina a nzi alangi a kuva murisi loyi a te ku dota hi lenzhako, A nzi navelangi a siku ga khombo; wena wa zi tiva. Lezi zi humeleko milonwini ya mina zi wa wulilwe mahlweni ka wena.

¹⁷ U ngavi ka mina lexi xi chavisako; Wena loyi u nga wuponelo ga mina sikwini ga khombo.

¹⁸ Ngha vaku koyo tingana lava va nzi xanisako, Kanilezi mina ngha nzi nga wiswi tingana; Ngha va rurumela, kanilezi mina nzi nga dzuki nzi rurumela. Va tisele a siku ga khombo, u va tshovetela kumbiri.

A sabado.

¹⁹ Jehova i te ngalo ka mina: Famba u ya yima nyangweni ya vana va tiko, leyi ku enghenako ha yona a tihosi ta ka Juda, ti humako ha yona, u yima ni ka tontlhe tinyangwa ta Jerusalema;

²⁰ uku ka vona: Ingisani a gezu ga Jehova nwina tihosi ta ka Juda, na nwina nwentlhe vaJuda, ni nwentlhe mu akileko Jerusalema, mu enghenako hi tinyangwa leti;

²¹ Jehova i ngalo: Ti woneleni, mu nga rwali mirwalo hi siku ga sabado, mu nga yi enghenisi Jerusalema hi tinyangwa ta kona.

²² Hambu ku humesa a minzhwalo lomu tindlwini ta nwina hi siku ga sabado, hambu ku tira ni wihi ntiro. Kanilezi basisani a siku ga sabado, kota lezi nzi nga laya vakoko va nwina. Ekso. 20:8; Deut. 5:12

²³ Vona a va ingisangi, hambu ku phuhunha tindleve tabye; kanilezi va lo nonohisa a tinhamu tabye, kasi va ngazwi, ni ku nga amukeli kulayiwa.

²⁴ Loku mu nzi ingisa, ku wula Jehova, lezaku mu nga enghenisi a mirwalo tinyangweni ta muti lowu hi siku ga sabado, kanilezi mu basisa a siku ga sabado, mu nga tiri a ntiro ha gona;

²⁵ zonake ku ta engheniwa hi tinyangwa ta muti lowu, a tihosi ni tihosana ti tshamileko xitshanwini xa wuhosi xa Davida, na ti khilele tikareta ni mahaxi, ti lanzelwa hi tihosana tabye, ni vanhu va ka Juda, ni vaaki va Jerusalema; ni muti lowu wu tava ni vanhu kala kupinzuka.

²⁶ Va tata hi le mitini ya Juda, ni le matlhelweni ya Jerusalema, ni le tikweni ga Benjamini, ni mikoveni, ni le zitsungeni, ni le Dzongeni, va neha minyikelo yo hiswa ni miphahlo, ni minyikelo ya mapa, ni hlakati, ni minyikelo ya ku khesa lomu ndlwini ya Jehova.

²⁷ Kanilezi loku mu nga nzi ingisi, mu nga basisi a siku ga sabado, kanilezi mu rwala a minzhwalo ni ku enghena nayo hi tinyangwa ta Jerusalema hi siku ga sabado; zonake nzi ta dzivela a nzilo tinyangweni ta wona, wu hisa tiyindlu ta wuhosi ta lomu Jerusalema, a nzilo lowu wu nga ta timiwa. Ezek. 20:47; Hos. 8:14