Jeremia 16 - Tshwa Bible

¹ A gezu ga Jehova gi lota ka mina, giku:

² U nga dzuki u teka sati, hambu kuva ni varisanyana ni vanhanyana a wutshanwini legi.

³ Hakuva Jehova i ngalo xungetano hi vana va xinuna ni va xisati va belekelweko ka legi wutshamu, ni xungetano ni vanyine lava va va psweleko, ni xungetano ni vararu lava va va belekileko tikweni legi:

⁴ Hakuva va tafa hi kufa ku chavisekako; va nga ta rilelwa, hambu ku lahliwa; va ta ku khwatsi i koho misaveni. Va ta dawa hi supado ni ndlala; a zirumbi zabye zi ta giwa hi tinyanyani ta tilo ni zihari za khwati.

⁵ Hakuva Jehova i ngalo: U nga engheni ndlwini ya zirilo, u ngayi kona ku hlaluka navo, hambu ku va xanisekela; hakuva nzi susile a kurula ka mina tikweni legi, ku wula Jehova, ina, ni tipswalo ni wuxinji.

⁶ A vahombe ni vanana va tafa hi wumbiri gabye tikweni legi, na va nga lahliwi; a vanhu va nga ta va rilela, hambu ku ti tlhavela ni ku halula tihloko. Levi 19:28; Deut. 14:1; Mika 1:16

⁷ Kambe a nga kona a to phameliwa wuswa ga xirilo, kasi ku mu miyeta hi kota ya ku felwa; kambe a nga ta hiwa a gombe go mu chavelela hi kota ya raru wakwe kutani nyine wakwe.

⁸ Kambe u nga dzuki u enghena ndlwini ya mubuzo, u tshama uga ni kunwa zinwe navo.

⁹ Hakuva Jehova wa tiyimpi, a Nungungulu wa Israeli, i ngalo: Languta, a wutshanwini legi nzi ta miyeta a magezu ya litsako ni kunengela, ni ya muteki ni mutekiwa, a kuwoneni ka nwina a ka masiku laya.

¹⁰ Loku u tivisile lava vanhu tontlhe leti timhaka, na vaku: Hikuyini Jehova a wulako hehla ka hina hi khombo legi ga hombe ke? hi kwihi kubiha ka hina, kutani kugoha loku hi onheleko ha kona Jehova a Nungungulu wa hina ke?

¹¹ Zonake u taku kabye: A vararu va nwina va nzi tsikile, ku wula Jehova, va lanzela a vanwani vanungungulu, va va tirela ni ku va khozela; va nzi tsikile, a va gongangi a nayo wa mina.

¹² Kasike nwina mu mahile zo biha ni ku hunza a vararu va nwina; hakuva munwe ni munwani wa nwina i te hutsetse kunonoheni ka mbilu yakwe yo biha, lezaku mu nga nzi ingisi.

¹³ Hikwalaho nzi ta mu hlongola tikweni legi, muya ka tiko legi mu nga gi tiviko, nwina hambu vararu va nwina; mu ta ya tirela kona a vanwani vanungungulu a mumu ni wusiku, hakuva nzi nga ta mu zwela wuxinji. Deut. 4:27—28:36, 64

¹⁴ A masiku mata, ku wula Jehova, laha ku ta nga kala ku nga ha wuliwi kambe ku: Jehova wa hanya, loyi a humesileko a vanana va ka Israeli hi le tikweni ga Gipite;

¹⁵ kanilezi va taku: Jehova wa hanya, loyi a humesileko a vanana va ka Israeli hi le tikweni ga Nwalungu, ni le matikweni wontihe lawo a nga va hlongolele kona. Nzi ta va wuyisa kambe tikweni gabye legi nzi nga nyika vararu vabye.

¹⁶ Nzi ta vitana a vakukuti vo hlaya, ku wula Jehova, va ta va kukuta; zonake nzi ta vitana a vahloti vo tala, va ta va hlota zitsungeni zontlhe, ni ka yontlhe miganga, ni ka yontlhe a mikovotlo ya maribye. Hab. 1:14

¹⁷ Hakuva a mahlo ya mina ma te tshonono tindleleni tabye tontlhe; a va fihlalangi mahlweni ka mina, ni zionho zabye a zi fihleki kuwoneni ka mina. Joba 34:21; Maheb. 4:13

¹⁸ Hi kuranga nzi ta va tlhelisela kambiri a kugoha kabye ni zionho zabye; hakuva va nyenyezisile a tiko ga mina hi zirumbi za manyala yabye, na va tatisile a tshomba ya mina hi manyalataniso yabye.

¹⁹ O Jehova, ntamu wa mina ni khokhola ga mina, Ni wuponelo ga mina sikwini ga kuxaniseka, A matiko ma tata ka wena hi le magunweni ya misava, maku: A vadadani va gile tshomba ya mawunwa ntsena, A zifananiso za hava, zi nga vuniko nchumu. Isa. 2:2; Zak. 8:20

²⁰ Xana munhu wa zi kota a ku ti mahela vanungungulu ke? Kasi vona a hi vanungungulu.

²¹ Hikwalaho nzi ta va tivisa, Makunu nzi ta va maha va tiva a canja ga mina ni ntamu wa mina; Va ta tiva a vito ga mina lezaku hi Jehova.