Jeremia 15 - Tshwa Bible

¹ Zonake Jehova i te ngalo ka mina: Hambu loku Mosi na Samueli va wa ta yima mahlweni ka mina a mbilu ya mina ngha yi nga zi koti ku kongomana ni lava vanhu. Va hlongole mahlweni ka mina, va ti fambela. Ekso. 32:11; Mitse. 14:13

² Loku va ku wutisa, vaku: Xana hi taya kwihi ke? U ta va hlamula, uku: Jehova i ngalo: Lava va yimiselweko kufa, va taya kufeni; lava va yimiselweko supado, va taya supadweni: lava va yimiselweko ndlala, va taya ndlaleni; ni lava va yimiselweko a wukhumbi, va taya wukhumbini.

³ Nzi ta va rumela mune wa makhombo, ku wula Jehova: A supado yi ta va hlasela, a timbyana ti ta va tlukula, a tinyanyani ta tilo ni zivanza za khwati zi ta va khadamula zi va lovisa. Levi 26:16; Deut. 28:26

⁴ Nzi ta va maha a xichaviso xikari ka mifumo yontlhe ya misava, hi kota ya Manase, a nʼwana Hezekia hosi ya ka Juda, hi kota ya lezi a nga zi maha lomu Jerusalema. 2 Tih. 21:1-12

⁵ Himani a to ku zwela wusiwana, O Jerusalema? Himani a to ku xanisekela? Himani a to ku yela kasi ku wutisa wutomi ga wena ke?

⁶ U nzi tsikile, ku wula Jehova, U tlhelele nzhako. Hikwalaho nzi nawulutile a canja ga mina nzi ku lovisa. Nzi karele hi ku ku tsetselela.

⁷ Nzi va heherile hi foxola le maphangweni ya tiko; A vapswali nzi va tekele a vana vabye, Nzi lovisa vanhu va mina. Hilezi va nga hunzulukangiko tindleleni tabye.

⁸ A tinoni tabye ti enzelekile ku hunza a seke ga bimbi. Nzi nehile mulovisi loyi a dayako vamamani va majaha ni nhlikanhi. Hi xitshuketi nzi rumele hehla kakwe a kuxaniseka ni kuchava.

⁹ Loye a psweleko ntlhanu wa vana ni vambiri i hohovele, i file; A gambo gakwe gi pelile kasi lezo ga hi mumu; I rwele tingana ni ku jujeka hloko. Lava va seleko nzi ta va nyikela supadweni mahlweni ka valala vabye, ku wula Jehova.

A xirilo xa Jeremia.

¹⁰ Yowe mina, mamani wa mina zanga, loyi u nzi psweleko, Mina munhu wa mazunga ni tiphika ka gontlhe tiko! A nzi se ku pembisa nchumu hi kota ya bhinzu, Ni vanhu a va nzi pembangi nchumu; Hambu zi hi tano, vontlhe va nzi rukatela. Joba 3:1; 10:18

¹¹ Jehova i lo hlamula, aku: Kunene nzi ta ku tiyiseta lezaku u humelela. Nzi ta maha nala wa wena a ku kombela xikhatini xa makhombo ni kuxaniseka.

¹² Xana munhu a nga zi kota ku tshova xiketse xa le Nwalungu ni suku ke?

¹³ Nzi ta nyikela a nhunzu ya wena ni titshomba ta wena zi phangiwa, na zi nga xabyiwangi, hi kota ya zionho zontlhe za wena tikweni ga wena gontlhe.

¹⁴ Nzi ta ku maha u tirela valala va wena tikweni legi u nga gi tiviko; hakuva a nzilo wa zanga ya mina wu dzivelwe, lowu wu ta nga mu hisa. Deut. 32:22

¹⁵ O Jehova, wena wa zi tiva, Nzi alakanye, u nzi enzela; Nzi photele ka vaxanisi va mina. Timisela ha mina, u nga nzi susi; Tiva lezaku nzi rukiwa hi kota ya wena.

¹⁶ A timhaka ta wena nzi ti kumile, Ti lo maha kuga ka mina; Tona ti wa hi litsako ni kunengela ka mbilu ya mina, Hakuva nzi vitanwa hi vito ga wena. O Jehova Nungungulu wa tiyimpi.

¹⁷ A nzi tshamangi tlhanganweni wa vatseketseli, nzi tsaka kona; Hi kota ya canja ga wena nzi tshamile nzoce, Hakuva u nzi tatisile hi khulo. Isa. 8:11; Ezek. 3:14

¹⁸ A kubayiseka ka mina ku simamisa hikuyini, Ni mbanga ya mina yi nga chumiwi, yi ala ku hola ke? Xana a ka mina u tava a hlowo yi khohlisako, Kutani a mati lawa ma pswhako ke?

¹⁹ Hikwalaho Jehova i ngalo; Loku u tlhelela ka mina Nzi ta ku wuyisa lezaku u maha nanza ga mina. Ni loku u neha leʼza lisima, u tsika leʼzo biha, Wena u tava kota nomu wa mina. Vona va ta tlhelela ka wena, Kanilezi u nga ta tlhelela kabye.

²⁰ Nzi ta ku maha uva khurisi ga suku a ka tiko legi; Va talwa na wena, kanilezi va nga ta ku hlula; Ihakuva mina nzi zinwe na wena, Kasi ku ku ponisa, ku wula Jehova.

²¹ Nzi ta ku ponisa canjeni ga vakubiha, Nzi ku tirula mandleni ya lava va tihanyi.