Jeremia 14 - Tshwa Bible

Xiprofeto xungetano ni xihala.

¹ A gezu ga Jehova gi ngata ka Jeremia xungetano ni ku kala vula.

² Juda wa rila, a miti yakwe yi mbhelile ntamu, Va tshama hasi na va ambele zilenda; A huwa ya zwala hi le Jerusalema.

³ A vahombe va kona va rumele laʼva tsongwani a ku ya lava mati, Loku vata tihlobyeni a va kumi mati, Va tlhela nitifuko tabye ta maphanga. Vazwa tingana vaku goo! na va fenengeta tihloko tabye.

⁴ A varimi va wiswa tingana, va fenengeta tihloko tabye, Hakuva misava yi khayekile, Hi kota yo kala vula laha tikweni. Joeli 1:11

⁵ Hambu ni yona mhuti lomu khwatini, Yi tsika a ximhutana xa ha pswalwako Hi kuvumaleka ka byanyi.

⁶ A timangwa leti ti ngo pswhe le migangeni Ti gavatana ku fana ni makhanga; A mahlo ya tona ma hlulekile Hi ku vumaleka ka lihunga.

⁷ Hambu loku a zionho za hina zi hi ranisa, O Jehova, hi vune hi kota ya vito ga wena. Hakuva hi hluwukile kanyingi, hi ku onhela.

⁸ Wena loyi u nga kutsumba ka Israeli, Muhanyisi wakwe xikhatini xa zikarato, Hikuyini uku khwatsi u wamatiko tikweni, Kota muenzi loyi a hambukako kasi kuxwa wusiku ginwe ke?

⁹ Hikuyini uku khwatsi u munhu a dzukisilweko, U kota nhenha yi nga zi kotiko ku hanyisa ke? Kasi u kona laha xikari ka hina, O Jehova, Hi vitanwa hi vito ga wena; U nga hi tsiki!

¹⁰ Jehova i wula hi tiko legi, aku: Va ranza ku pepetseka kota lezi, A va ti khomangi kufambeni ka bye; Hikwalaho Jehova a nga xalaliswi ha vona; Makunu i ta alakanya a kusoholoka kabye, a tsayisa zionho zabye.

¹¹ Zonake Jehova i te ngalo ka mi na: U nga kombeleli legi tiko ku hiwa zo saseka. Jer. 7:16; 11:14

¹² Loku va yila, nzi nga tazwa a kurila kabye; loku va nyikela a muphahlo wa kuhiswa ni wa zakuga, nzi nga ta wu tsakela; kanilezi nzi ta va lovisa hi supado, ni ndlala, ni ntungu. Mav. 1:28; Isa. 1:15

¹³ Zonake nzi te ngalo: Ha, Hosi Jehova, a vaprofeti va wula kabye, vaku: Mu nga ta wona supado, hambu kuva ni ndlala; kanilezi nzi ta mu nyika a kurula ku tiyileko a wutshanwini legi.

¹⁴ Jehova i lo nzi hlamula, aku: A vaprofeti va profeta mawunwa vitweni ga mina. A nzi va rumangi, a nzi va layangi; a nzi wulawulangi nchumu kabye. Va profeta ka nwina a miwoniso ya mawunwa ni kuvumba, a zilo za mahala za kukhohlakala ka timbilu tabye.

¹⁵ Hikwalaho Jehova i wula lezo xungetano ni vaprofeti lava va profetako hi vito ga mina, na nzi nga va rumangi, lava va nge ngalo: A supado ni ndlala zi nga tava kona a tikweni legi, aku: A vaprofeti lavo va ta lobyiswa hi supado ni ndlala.

¹⁶ A vanhu lavo va nga profeta kabye va ta hoxwa maruweni ya Jerusalema hi kota ya ndlala ni supado, ku nga tava kona wo va lahla: vona ni vasati vabye, ni vana vabye va xinuna ni va xisati; hakuva mina nzi ta chulula kubiha kabye hehla kabye.

¹⁷ U ta va byela, uku: A mahlo ya mina ma chilila mihloti a wusiku ni mumu, a yi yimi; Hakuva a nhwana wa vanhu va mina I panzekile hi mbanga ya hombe, ni khoro gi tshisako.

¹⁸ Loku nziya masinwini ku kona lava va delweko hi supado, Ni loku nzi enghena mutini nzi wona lava va swodokako hi ndlala: Ina, hi wumbiri gabye a muprofeti ni mupristi va nzulanzula na va nga ku tivi laha va yako kona.

¹⁹ Xana Juda u mu tsikele magumo ke? Kutani u ngava u swirekile mbilu hi Zioni ke? Hikuyini u hi bileko lezaku hi nga zi koti ku chumiwa ke? Hi wa lavelele kurula, kanilezi a ku tangi kusasa; Hi lavelele xikhati xo chumiwa, kasi kuchava ku kona!

²⁰ Hina ha tiva a kubiha ka hina, O Jehova, Ni zigoho za vararu va hina; Hakuva hina hi ku onhele.

²¹ Hi kota ya vito ga wena, u nga swireki ha hina, U nga wisi tingana a xitshamu xa wena xa wukosi; Alakanya a xivumelwano xa wena na hina, u nga xi tshovi.

²² Xana xi kona a xifananiso xikari ka vamatiko xi zi kotako ku nisa vula ke? Kutani tilo gi nga zi kota ku nisa vula ha goce ke? Xana a hi wena ke, Jehova Nungungulu wa hina? Hikwalaho hi ta ku rinzela, hakuva hi wena u mahileko zontlhe lezi.