Jakobe 4 - Tshwa Bible

A kuva ni wuxaka ni tiko.

¹ Kuta hi kwihi a kulwa ni kukanetisana xikari ka nwina ke? Xana a ku humi kumbilukeleni loku ku lwako zirweni za nwina ke? Rom. 7:23; Gal. 5:17

² Mu tele hi kumbilukela, kanilezi a mu na nchumu; ma daya, mu navela, kanilezi a mu na ku zi kuma; ma kanetisana ni ku holova, kanilezi a mu na nchumu, hakuva a mu kombeli.

³ Nwina ma kombela, kanilezi a mu amukeliswi; hakuva mu kombela hi kubiha, kasi ma fela ku zi hangalasa kunaveleni ka nwina. Isa. 1:15; Jer. 11:11; Mika 3:4

⁴ Nwina zibhayi, a mu zi tivi lezaku a wuxaka ni tiko mbulala ka Nungungulu ke? Hikwalaho kani hi wihi a nga ni wuxaka ni tiko i ti maha nala wa Nungungulu. Joh. 17:14; 1 Joh. 2:15

⁵ Kutani mu alakanya lezaku a Mitsalo yi wula mahala ke? Wa wu navela hi xiluse a moya lowu a wu mahileko lezaku wu tshama ka hina. Ekso. 34:14

⁶ Kanilezi yena wa hi engetela tipswalo, hikwalaho a mutsalo wu ngalo: Nungungulu wa ala a vamatshanza, kanilezi a nyika tipswalo ka lava va ti koramisako. Mav. 3:34; 1 Ped. 5:5

⁷ Hikwalaho ti koramiseni ka Nungungulu; alani Satani, zonake i ta suka ka nwina. Efe. 6:11; 1 Ped. 5:9

⁸ Tshinelani ka Nungungulu, na yena i ta tshinela ka nwina. Hlambani mandla, nwina vaonhi; mu basisa timbilu ta nwina, nwina va timbilu timbiri. 2 Kro. 15:2; Isa. 1:16; 1 Ped. 1:22

⁹ Xanisekani, muba nkosi, mu rila; ngha kuhleka ka nwina ku hunzulwa kuva xirilo, ni kutsaka ka nwina ku hunzulwa kuva hlomulo. Mat. 5:4

¹⁰ Ti koramiseni mahlweni ka Hosi, yona yi ta mu kulisa. Joba 22:29; Mat. 23:12; 1 Ped. 5:6

¹¹ Mu nga hlevani, vamakabye. Loyi a hlevako makabye, kutani a lamula makabye, yena i hleva nayo, a lamula nayo; kanilezi loku u lamula nayo, a ku mumahi wa nayo, kanilezi u mulamuli wa wona. Mat. 7:1; Rom. 2:1; Efe. 4:31

¹² Munwe ntsena a nga muyimisi wa milayo ni mulamuli; hi yena loyi a zi kotako ku hanyisa ni ku daya. Kanilezi hi wena mani loyi u lamulako a wakelene wa wena ke? Mat. 10:28; Rom. 14:4

¹³ Ma nga zwani nwina lava mu wulako muku: Inyamutlha kutani manziko hi taya mutini wo kari, hi ya tshama lembe kona, hi xavisa, hi bhinzula;

¹⁴ kasi lezo a mu zi tivi za manziko. Xini a wutomi ga nwina ke? Hakuva nwina mu hunguva, leyi yi wonekako xikhatanyana, yi nyamalala. Joba 7:7; Tis. 102:3

¹⁵ Kasi lezo mu fanele ku wula muku: Loku Hosi yi zi ranza, na hi kari hi hanya, hi ta maha zo kari ni zo kari. Miti. 18:21; Maheb. 6:3

¹⁶ Kanilezi makunu mo bhuma matshanzeni ya nwina; a kubhuma kontlhe ka kunghaho ku bihile. 1 Kor. 5:6

¹⁷ Loyi a tivako ku maha zinene, a nga zi mahi, i na ni xionho. Lu. 12:47; Joh. 9:41