Jakobe 3 - Tshwa Bible

A lirimi.

¹ Vamakabye va mina, a linyingi la nwina ngha mu nga xuvi a kuva vagonzisi, na mu tiva lezaku hina lava hi nga vagonzisi hi ta amukela a kulamulwa ka hombe. Mat. 23:8

² Hakuva hontlhe ha khubeka hi zilo zinyingi; loku munhu a nga khubeki hi kuwulawula, yaloye i munhu a mbheleleko, loyi a zi kotako ku khoma ni miri wakwe wontihe hi matomu. 1 Tih. 8:46; Mat. 12:37

³ Loku hi enghenisa matomu milonwini ya mahaxi, kasi ma fela ku hi ingisa, ha fambisa ha wona a mimiri ya wona yontlhe. Tis. 32:9

⁴ Langutani, ni mataru kambe, hambu lezi ma nga ya hombe, ma kukuletwa hi timheho leti ta ntamu, ma fambiswa hi lemi yi tsongwani ni kwihi a nduna yi ranzako kona.

⁵ Hizalezo ni lirimi, xirwana xi tsongwani, kanilezi la ti kukumukisa hi zilo za hombe. Langutani, a nzilwana wu tsongwani wa hisa a khwati ga hombe. Tis. 73:8, 9

⁶ Na lona lirimi i nzilo; a lirimi i tiko ga kubiha xikari ka ziro za hina; li nyenyezisa a miri wontihe, li dzivela a ndlela yontlhe ya kuhanya ka hina, lona wutsumbu li dzivelwa hi nzilo wa Gehena. Mat. 15:19; Mar. 7:15

⁷ A tixaka tontlhe ta zihari ni tinyanyani, ni ta zikokakoka, ni zihari za lomu bimbini, za gonziswa, ina zi fuywa hi vanhu,

⁸ kanilezi a lirimi, a ku na munhu a li kotako; xilo xa kubiha xi nga hluliwiko, li tele hi wutsulu gi dayako.

⁹ Ha khesa ha lona a Hosi ni Dadani; kambe hi rukatela ha lona vanhu lava va mahilweko hi mufananiso wa Nungungulu.

¹⁰ Ku huma hi ka nomu walowo wa munwe a kukhesa ni kurukatela. Vamakabye va mina, a zi faneli a kuva lezi zilo zi hi nghaho.

¹¹ Xana a hlowo ya humesa a mati yo nanziha ni yo bava wutshamu ginwe ke?

¹² Vamakabye va mina, xana a nkuwu wu nga pswala maoliva ke, kutani a vina wu pswala makuwu ke? Hambu ni hlowo yo dzunga a yi hunzuki yi humesa mati yo nanziha.

A wutlhari gi tako hi le hehla.

¹³ Himani a tlharihileko a tivako xikari ka nwina ke? Ngha a kombisa a mitiro yakwe hi mahanyela yakwe yo saseka na hi ni kurula ka wutlhari. Gal. 6:4

¹⁴ Kanilezi loku mu hi ni xiluse xa mona ni kuhambana timbilwini ta nwina, mu nga ti kulisi, mu hembela zinene. Rom. 2:17, 23; 13:13

¹⁵ A wutlhari ga kunghaho a giti hi le hehla, kanilezi ga misava, ga mahanyela, ga madimoni. Fil. 3:19; Juda 19

¹⁶ Hakuva laha ku nga ni xiluse ni kuhambana, hi kona ku nga ni pfilupfilu ni mitiro yontlhe ya kubiha. 1 Kor. 3:3

¹⁷ Kanilezi a wutlhari legi gi tako hi le hehla, a kusangula gi basile, kambe gi na ni kurula, gi nene, ga ingisa, gi tele hi wuxinji ni mihanzu yo saseka, a gi na kukanakana ni kuxengetela. 1 Kor. 2:6; 1 Ped. 1:22

¹⁸ A mihanzu ya kululama yi byaliwa kuruleni hi vona lava va mahako kurula. Hos. 10:12; Mat. 5:9; Fil. 1:11