Jakobe 2 - Tshwa Bible

A kuva ni xihlawulela.

¹ Vamakabye va mina, a kukholweni ka nwina hi Hosi ya hina Jesu Kristu, a Hosi ya kungangamela, mu nga hlawuli vanhu. Deut. 1:17; Mat. 22:16; 1 Kor. 2:8

² Hakuva loku kuta munhu mutlhanganweni wa nwina, loyi a nga ni phera ya nzalama, a ambeleko tinguwo to saseka; kuta kambe a munhu a vumalako, a ambeleko tinguwo ti nga ni chaka;

³ mu khatalela loyi a ambeleko tinguwo to saseka, muku kakwe: Tshama laha mahlweni; mu wuya muku ngalo ka loyi a vumalako: Wena yima lahaya, kutani muku: Tshama lahasi mikonzweni ya mina.

⁴ Xana a mu mahi xihlawulela xikari ka nwina ke, muva Valamuli va nga ni maalakanyo ya kubiha ke?

⁵ Ingisani, vamakabye va mina va ranzekako; Xana Nungungulu a nga hlawulangi lava va vumalako hi za tiko, lezaku vava lava va fumileko kukholweni, ni kuva zigatshomba ya mufumo lowu a wu tsumbisileko vona lava va mu ranzako ke? Ekso. 20:6; Joh. 7:48; Kuv. 2:9

⁶ Kanilezi nwina mu kanyisa loyi a vumalako. Xana lava ya fumileko a hi vona va mu xanisako ke, a hi vona va mu kokoviselako tihubyeni ke? Miti. 13:50; 17:6

⁷ Xana a va rukateli a vito legi gi nene mu vitanwako ha gona ke?

⁸ Kanilezi mu maha khwatsi loku mu tatisa a nayo wa wuhosi, kota lezi Mitsalo yi nge ngalo: U ta ranza wakelene na wena kota lezi u ti ranzako wena. Levi 19:18; Mat. 22:39

⁹ Kanilezi ma onha loku mu hi ni kuhlawula vanhu, ma koniwa hi nayo lezaku mu vahambunyeti.

¹⁰ Hakuva loku munhu a hlayisa nayo wontihe, kanilezi a khunguvanyeka hi mhaka yinwe, i na ni nanzu ka wona wontihe. Deut. 27:26; Mat. 5:19

¹¹ Hakuva loyi a ngaku ngalo: U nga bhayi, i ngalo kambe: U nga dayi. Makunu loku u nga bhayi, kanilezi u daya, wena u muhambunyeti wa nayo. Ekso. 20:13

¹² Wulawuleni, mu maha kota zi faneleko vanhu lava va ta nga lamulwa hi nayo wa kutlhatlheka.

¹³ Hakuva loyi a nga mahangiko wuxinji a nga ta mahelwa wuxinji kulamuleni; kanilezi a wuxinji gi ta ti kulisa hehla ka kulamula. Mav. 21:13; Mat. 6:15

A kukholwa ku kombiswa hi mitiro.

¹⁴ Vamakabye va mina, xana zi vuna yini loku munhu aku i na ni kukholwa, kanilezi a nga hi na mitiro? A kukholwa ka kunghaho ku nga mu hanyisa ke? Mat. 7:26; Xip. 1:23

¹⁵ Loku a nakuloni kutani makwenu a hi ni wuna, va vumala kuga ka masiku ni masiku, Lu. 3:11

¹⁶ zonake munwe wa nwina aku kabye: Fambani hi kurula, mu kufumela, mu xura, na mu nga va nyikangi lezi zi lavekako mirini, zi vuna yini lezo ke?

¹⁷ Lezo ni kukholwa, loku ku nga hi na mitiro, ku file a wutsumbu ga kona.

¹⁸ Kanilezi munwani i taku ngalo: Wena u na ni kukholwa, mina nzi na ni mitiro. Nzi kombe a kukholwa ka wena na ku hi hava mitiro, mina nzi ta ku komba a kukholwa ka mina hi mitiro ya mina.

¹⁹ Wa kholwa lezaku Nungungulu munwe, hizona lezo; a madimoni na wonawu ma kholwa ma rurumela. Mat. 8:29; Miti. 19:15

²⁰ Xipumbu nzi wena, hikuyini u nga ranziko a ku tiva lezaku a kukholwa loku ku nga hava mitiro a ku vuni nchumu ke?

²¹ A kokwani wa hina Abrahama, a nga hlayelwangi kululama hi mitiro ke, laha a nga nyikela Isaka a nʼwana wakwe hehla ka alati? Gen. 22:9

²² Wa zi wona lezaku a kukholwa ku lo tira zinwe ni mitiro yakwe; a kukholwa ku lo mbheleliswa hi mitiro. Maheb. 11:17

²³ Hizalezo wu lo tatiseka a mutsalo lowu wu nge ngalo: Abrahama i lo kholwa ka Nungungulu, ku lo hlayelwa ka yena lezaku kululama; i lo vitanwa lezaku i xaka ga Nungungulu. Gen. 15:6; Isa. 41:8; Rom. 4:3

²⁴ Ma zi wona lezaku a munhu i hlayelwa kululama hi mitiro yakwe, na ku nga hi kukholwa koce.

²⁵ Hizalezo na Rahabi, a xibhayi, a nga hlayelwangi kululama hi mitiro ke, lezi a nga amukela a tihloli, a ti fambisa hi yinwani ndlela? Jox. 2:1

²⁶ Hakuva kota lezi wu fileko a miri lowu wu nga hava moya, hizalezo ni kukholwa loku ku nga hava mitiro ku file.