Isaya 9 - Tshwa Bible

A Hosana ya Kurula.

¹ Kanilezi ku nga ha tava na munyama a tikweni legi gi nga ni hlokiselelo. A xikhatini xa kaleloko Nungungulu i wisile tingana a tiko ga Zebuloni ni tiko ga Naftali, kanilezi a xikhatini xi tako i ta khesa a tiko legi gi komamako ni bimbi, le tlhatukweni ga Jordani, a Galilea ga vamatiko. Mat. 4:14

² A vanhu lava va nga fambile munyameni va wonile a kuwonekela ka hombe; Lava va akileko tikweni ga nzhuti wa kufa A kuwonekela ku woningile hehla ka vona. Lu. 1:79; Joh. 1:9

³ U anzisile a tiko, u kulisile kutsaka kabye; Va tsakile mahlweni ka wena ku khwatsi hi lava va tshovelako, Va hlalela kukotisa vanhu va avelanako muphango.

⁴ Hakuva u tshovile a muyoka wa nzhwalo wakwe Ni limhika li ngaba hlana wakwe, A nhonga ya mutsimbeketi wakwe u yi tshovile kukotisa sikwini ga Midiani,

⁵ Hakuva a zilato lezi a zi bohileko loyi a ngaya yimpini, Ni tinguwo tontlhe leti ti nga porongelwa nkhateni, Zi ta hoxiwa nzilweni zi hiswa.

⁶ Hakuva hi pswalelwe nʼwana, hi nyikilwe a nisanyana, A wuhosi gi vekilwe makatleni yakwe; Yena i ta vitanwa ku Sungukati gi Hlamalisako, Nungungulu Nyamintamu, Dadani wa Pinzukelwa, Hosi ya Kurula. Lu. 1:31; Rom. 8:32; Efe. 2:14

⁷ A kufuma kakwe ku ta enzeleka, Ni kurula ku nga ta kuva na magumo A hehla ka xitshamu xa wuhosi xa Davida ni mufumo wakwe; Kasi ku wu tiyisa ni ku wu seketela hi nongameto ni kululama, Ku sukela lezi kala kupinzuka. A kupangama ka Jehova wa tiyimpi ku ta maha lezo. A zanga ya Jehova yo vukela Israeli.

⁸ A Hosi yi rumele mhaka ka Jakobe, Yi wele hehla ka Israeli.

⁹ A vanhu vontlhe va ta yi tiva, Efraime ni vaaki va le Samaria, Lava va wulako hi matshanza ni kunonoha ka timbilu, vaku:

¹⁰ A makhurisi ya zitini ma khungumukile, Kanilezi hina hi ta ma aketa hi maribye ma vatlilweko; A mikuwu yi tsemilwe, Hi ta vekela tisedare matshanwini ya yona.

¹¹ Jehova i ta va vuxela a valala va Rezini, A vuxa ni valala vakwe khatiginwe:

¹² A maSiria hi Mutsuwuka-gambo, ni Mafilistia hi le Mupela-gambo; Va ta khadamula Israeli hi nomu wu ahlamileko. Hambulezo, a zanga yakwe a yi rengangi, Ni canja gakwe ga ha nawulukile.

¹³ Kanilezi a vanhu a va tlhelelangi ka loyi a va bako, Ge, hambu ku lava Jehova wa tiyimpi.

¹⁴ Hikwalaho Jehova i ta tsema ka Israeli a hloko ni nkila, A tsema ravi ga cinzu ni lihoka hi siku ginwe. 2 Tih. 17:3

¹⁵ A hloko hi masingalakati ni vadzunzekileko, Kanilezi a vaprofeti va profetako mawunwa i nkila.

¹⁶ Hakuva a varangeli va tiko legi va gi hambukisa, Ni lava va rangelwako ha vona va lobyiswa.

¹⁷ Hikwalaho Jehova a nga ta xalaliswa hi majaha ya gona, Ge hambu ku hawukela a zisiwana ni tinoni; Hakuva vontlhe vakhohlisi ni vaonhi, Yontlhe milomu yi wulawula wupumbu. Hambu lezo, a zanga yakwe a yi rengangi, Ni canja gakwe ga ha nawulukile.

¹⁸ Hakuva a kubiha ka hisa khwatsi i nzilo, Wu khadamula zigetlwani ni mizwa; Wu dzivela makhwati yo khwela, Kasi musi wu tlakukela hehla kukotisa marefu.

¹⁹ Hi kota ya zanga ya Jehova wa tiyimpi a tiko gi swile; Ni vanhu ve khwatsi tihunyi nzilweni; A ku na munhu a tsetselelako nakulobye.

²⁰ Va wutla hi tlhelo ga xinene, kanilezi vazwa ndlala, Vaga hi tlhelo ga xibhabha, kanilezi a va xuri; Munwe ni munwani i taga a nyama ya woko gakwe.

²¹ Manase i taga Efraime, na Efraime aga Manase; Hi wumbiri gabye va ta vukela Juda. Hambu lezo, a zanga yakwe a yi rengangi, Ni canja gakwe ga ha nawulukile.