Isaya 8 - Tshwa Bible

¹ Jehova i te ngalo ka mina: Teka a bakwa ya hombe u tsala ka yona hi maletela ma wonekako, uku: Va hatlisisa ku phanga, ku tsutsumelwa wuphango.

² Zonake nzi ta teka a timboni leʼti tsumbekileko: Mupristi Uria, na Zakaria nʼwana Jeberekia. 2 Tih. 16:10

³ Nzi lo enghena ka muprofeti wa xisati, i lo xura nyimba a pswala nʼwana. Na Nungungulu aku ka mina: Mu chule vito ga Maher-xalal-hax-baz.

⁴ Hakuva a nʼwana na a nga se ku tiva ku wula, aku: Dada, hambu, Mama, a titshomba ta le Damaseku ni muphango wa le Samaria zi ta yiswa mahlweni ka hosi ya Assiria.

⁵ Jehova i lo engeta, aku ka mina:

⁶ Kota lezi a vanhu lava va alileko a mati ya le Xiloa, lawa ma khulungako khwatsi, va tsakela Rezini ni nʼwana Remalia;

⁷ hikwalaho a Hosi yi ta tisa hehla kabye a mati ya ntamu ya congo, yi nga hosi ya le Assiria ni wukosi gakwe gontlhe, i tata hi milonga yakwe yontlhe, a khulungela lontlhe livuthi la yona.

⁸ I ta enghena tikweni ga Juda kota ntalo, a kukuleta a kala a chikela mikolweni ya vanhu; a kutshambulutwa ka tipapa takwe ku ta fenengeta kuanama kontlhe ka tiko ga wena, o Immanueli!

⁹ Mahani guwa ga kulwa, nwina matiko, mu ta lobyiswa! Kangatelani ndleve, nwina lava mu nga matikweni ya le kule; hlomani mu ta hangalaswa, hlomani mu ta hangalaswa!

¹⁰ Bohani xikungo, kanilezi xi nga ta maheka. Wulawulani mhaka, kanilezi yi nga ta tiya; hakuva Nungungulu i na hina. Joba 5:12; Rom. 8:31

¹¹ Jehova i wulawulile lezo ka mina laha canja gakwe gi ngata hehla ka mina hi ntamu, a nzi leletela lezaku nzi nga fambi tindleleni ta vanhu lava, aku:

¹² Mu nga wuli, muku: I gujeguje; a ka zontlhe lezi a vanhu lava va wulako ku i gujeguje; mu nga dzuki mu chava lezi va zi chavako.

¹³ Hi Jehova wa tiyimpi mu ta nga mu chava kota loyi a basileko, ngha yena ave hlenekera ya nwina.

¹⁴ Lezo i tava wuponelo ga nwina, kanilezi a ka tiyindlu leʼtimbiri ta ka Israeli i tava xikhunguvanyiso, ni ribye legi gi ta nga va wisa, ni ka vaaki va Jerusalema i tava tlhamu ni ziyo. Lu. 2:34; Rom. 9:33; 1 Ped. 2:7

¹⁵ Vanyingi vabye va ta khunguvanyeka ka gona, vawa, va tshoveka: va ta phasiwa, va khomiwa.

¹⁶ Bohelela a wukustumunyu legi, u vala hi xifungo a nayo lowu xikari ka vapizani va mina.

¹⁷ Nzi ta rinzela Jehova, loyi a fihlelako a yindlu ya Jakobe a nghohe yakwe, nzi ta mu langutela.

¹⁸ Langutani, mina ni vanana lava Jehova a nzi nyikileko hi zikombiso ni zihlamaliso xikari ka Israeli hi ka Jehova wa tiyimpi, loyi a akileko xitsungeni xa Zioni.

¹⁹ Loku vaku ka nwina: Wutisani lava va humesako mimoya ya vafileko, ni vavumbi lava va hlevako ni ku nʼununʼuta, hlamulani, muku: A vanhu a va faneli ku wutisa a Nungungulu wabye ke? ku nga wutisiwa a vafileko a timhaka ta laʼva hanyako ke? Deut. 18:11; 1 Sam. 28:11

²⁰ A hi yeni nayweni ni wumbonini! Loku va nga wuli lezo, a tiko gi nga ha ta kuva ni wuronga ginwani.

²¹ Va ta pepetseka tikweni, va xaniseka ni kuzwa ndlala; ni loku vazwa ndlala va ta zangara, va rukatela hosi yabye ni Nungungulu wabye.

²² Va ta cuwuka hehla, va tlhela va cuwuka misaveni; kanilezi ku kona lomu a hlomulo, ni munyama, ni kuphuma ka kutsikwila; zonake va ta susumetelwa munyameni.