Isaya 6 - Tshwa Bible

A ziwoniso xa Jehova.

¹ A ka lembe lego a ngafa hesi Uzzia, nzi wonile Jehova na tshamile xitshanwini xa hombe xa wuhosi xi tlakukileko, ni nguwo yakwe yi wa tatile a tempeli. Dan. 7:9; Mat. 25:31; Joh. 12:41

² Hehla kakwe ku wa yimile a maserafima. A ginwe ni ginwani gi wa hi ni ntlhanu wa tipapa ni linwe; hi tipapa timbiri ma lo khubhunyeta a tinghohe ta wona, hi timbiri ma khubhunyeta mikonzo, hi timbiri ma puruma ha tona.

³ A ginwe gi lo kanyuluka ka ginwani, giku: Basa, basa, basa, yena Jehova wa tiyimpi; Yontlhe misava yi tele hi kungangamela kakwe!

⁴ A ziseketelo za tinyangwa ta tempeli zi lo tsekatsekiswa hi gezu ga loyi a nga wa kanyuluka, ni yindlu yi lo tala hi musi. Ekso. 40:34; 1 Tih. 8:10; Kuv. 15:8

⁵ Zonake mina nziku: Khombo ka mina, nzi lovile! hakuva nzi munhu a nga ni milomu yi nga hlazekangiko, na nzi akile xikari ka vanhu va nga ni milomu yi nga hlazekangiko, hakuva a mahlo ya mina ma wonile a Hosi, Jehova wa tiyimpi.

⁶ Zonake a ginwe ga maserafima gi lo purumela ka mina, na gi welele a khala ga nzilo, legi gi gi tekileko hi tipharo le alatini.

⁷ Gi lo khumba a nomu wa mina ha gona, giku: Languta, a khala legi gi khumbile milomu ya wena, a zigoho za wena zi susilwe, ni kuonha ka wena ku tsetselelwe.

⁸ Zonake nzi lozwa a gezu ga Jehova, giku: Nzi ta ruma mani, himani a ta nga hi yela? Nziku: Hi mina, ruma mina.

⁹ Yena aku: Famba, u ya byela vanhu lava, uku: A kuzwa, zwanani, kanilezi mu nga zi pimi, Ni ku wona, wonani, kanilezi mu nga wonisisi. Mar. 4:12; Joh. 12:39; Miti. 28:25

¹⁰ Nonohisa a timbilu ta vanhu la va, U vala tindleve tabye, u tsunya mahlo yabye, Va ngazwi hi tindleve tabye, va nga pimi hi timbilu tabye, Kasi va nga hunzuluki va hanyiswa. Deut. 29:3; Rom. 11:8

¹¹ Zonake mina nziku: Kala rini Hosi? Yena i lo hlamula, aku: Kala a miti yi hahluka, yi nga have na vaaki, ni tiyindlu ti nga hi na munhu, ni tiko gontlhe giva rumbi,

¹² kala Jehova a susile vanhu a va yisa kule, ni tiko gontlhe giva xiwula.

¹³ Loku ku sala munwe xikari ka va khume, na yena i ta hunza xikari ka nzilo, khwatsi hi sinya ya munga ni nkanyi, hambu loku yi tsemilwe a xibho xi ta hluka xi humesa matluka. A xibho xa kona xi tava mbewu yi basileko.