Isaya 57 - Tshwa Bible

¹ Loyi a lulamileko wafa, Kanilezi a ku na munhu zi mu henyako mbilu; A vakhongeli va susiwa, Kanilezi a nga kona a zi khatalelako. Loyi a lulamileko a susiwa mahlweni ka leʼzo biha

² A enghena kuruleni; Lava va fambileko hi kululamileko va ta humula mibhedini yabye.

³ Kanilezi nwina vana va zitumbe za xisati, tshinelani laha, Nwina pswalo wa zirembi ni zibhayi! Mat. 12:39; 16:4

⁴ Mu hleka mani? Mu ahlamela mani milomu? Mu humesela mani tirimi? Xana a mu vana va kuonha, a pswalo wa mawunwa ke?

⁵ Nwina lava mu vurako lahasi ka mikanyi, A hasi ka sinya yinwe ni yinwani yi hlukako; Nwina lava mu dayako vanana lomu mikoveni, Ni lomo timhakweni ta maribye. Levi 18:21; 1 Tih. 14:23

⁶ A xiavelo xa wena hi maribye yo retemuka ya nkova, Hi yona a tshomba ya wena leyo. Hi wona lawo u ma phahlelako hi vinya, Ni xinyikiwo xa mapa. Nzi ta xalaliswa hi lezo zilo ke?

⁷ U andlele a sango ga wena xitsungeni xi tlakukileko, Hi laho kambe u kanzihileko a ku ya phahlela hi timhamba.

⁸ U vekile a xialakanyiso xa wena lenzhako ka tivati ni timhanze, Hakuva na u hi kule na mina u ti funungule ka munwani, U kanzihile mubhedini wa wena, u wu anamisa, U lo zwanana navo, u ranza mubhedi wabye ni ka xihi xikhati.

⁹ U yile le hosini ni mafura, U anzisa mafura ya wena yo nuhela; U rumile kule a mitsukano ya wena, U yi rumela ni le Xeoli.

¹⁰ U wa karele hi ku famba nguvu, Kanilezi a ku na nga wula, uku: A zi vuni nchumu! U kumile ntamu wuswa, a ku rerekangi.

¹¹ U wa dzukiswa hi mani, u chava mani ko kala u nga tsumbeki, Lezi u nga kala u nzi alakanya hambu ku nzi khatalela ke? Kasi a ku nzi chavi, hilezi nzi miyeleko xikhati xo leha ke?

¹² Nzi ta tlhatlhambutela a kululama ka wena, Ni mitiro ya wena yi nga ta ku vuna nchumu.

¹³ Loku u rila ngha a xidlemo xa zifananiso za wena xi ku ponisa! Kanilezi a mheho yi ta zi kukuleta zontlhe, A moya wu ta zi yisa kule. Kanilezi loyi a nzi tsumbako i taga tshomba ya tiko, A xitsunga xa mina xa kubasa xi ta mu lumba.

Lava va koramileko va tangaliswa.

¹⁴ Aku: Bhoxani ndlela, ecanyetani misava, Basisani ndlela, Mu susa zikhunguvanyiso lomu ndleleni ya vanhu va mina.

¹⁵ Hakuva Loyi a Tlakukileko a nga le hehla-hehla, Loyi a tshamako kala kupinzuka, Loyi a vitwako A Basileko, i ngalo: Nzi tshama wutshanwini gi tlakukileko, ga kubasa, Nzi tshama kambe zinwe ni loyi a ti solisako, A nga ni moya wa ku ti koramisa; Kasi ku vuxa a mimoya ya lava va ti koramisako, Nzi vuxa timbilu ta lava va ti Solisako. Tis. 34:18; Lu. 1:48

¹⁶ Hakuva nzi nga ta ranisa kala kupinzuka, Ge hambu ku zangara xontlhe xikhati; Yi nga dzuka yi mbhelelwa hi ntamu a mimoya leyi nzi yi vangileko.

¹⁷ Nzi mu zangarele nzi muba Hi kota ya xionho xakwe xa likungo; Nzi lo ti fihla zangeni ya mina, Na yena a su hutsetse a famba hi ndlela ya kuranza ka mbilu yakwe.

¹⁸ Nzi wonile tindlela takwe, Kanilezi makunu nzi ta mu hanyisa; Nzi ta mu rangela nzi mu chavelela ni lava a rilako navo.

¹⁹ Nzi ta veka kukhesa milonwini ya vanhu: Kurula ka loyi a nga le kule, Ni kurula ka loyi a nga kusuhani! Ku wula Jehova: Nzi ta mu hanyisa. Efe. 2:17; Maheb. 13:15

²⁰ Kanilezi a vakubiha va fanana ni bimbi legi gi vindlukileko, Legi gi nga zi kotiko ku rula, Legi a mabyandlati ya gona ma vuxako phiriwa ni fenze.

²¹ A vakubiha a va na kurula, Ku wula Jehova.