Isaya 53 - Tshwa Bible

¹ Himani a kholilweko lezi hi nga byeliwa zona ke? A woko ga Jehova gi wonekelisilwe ka mani ke? Joh. 12:38; Rom. 10:16

² Hakuva i lo kula mahlweni kakwe ku fanana ni hluke, Aku khwatsi i mutsu lowu wu kulako misaveni yi womileko. I wa nga hi ha dzumba, ge hambu kusaseka ku kokako mahlo; Ni, laha hi nga mu wona i wa nga hi na wumbhuri go hi tsakisa.

³ I lo nyenyiwa, a aliwa hi vanhu; Munhu wa mihlomulo, a toloveleneko ni kubayiseka; I lo nyenyiwa kota loye vanhu va mu fihlelako tinghohe tabye, A hi mu hlayangi nchumu. Mar. 9:12; Joh. 7:48

⁴ Kunene i lo rwala a kubayiseka ka hina, A ti rwexa a mihlomulo ya hina, Kasi hina hi waku: Wa biwa, wa xupulwa hi Nungungulu Ni ku xanisiwa. Mat. 8:17

⁵ Kanilezi yena i tlhabyilwe hi kota ya zihambunyeto za hina, A tshobyiwa hi kota ya zigoho za hina; A xitsayiso lexi xi hi nyikako kurula xi lo wela hehla kakwe, Zonake hi hanyiswa hi timbirimbi takwe. Rom. 4:25; 1 Kor. 15:3; 1 Ped. 2:24

⁶ Hina hontlhe hi wa hambukile khwatsi hi tiyivu, Munwe ni munwani a famba hi ndlela yakwe; Kanilezi Jehova i mu rwexile a kubiha ka hina hontlhe,

⁷ I lo hlokiswa, hambu lezi a nga ti tsongahata, Na a nga vululi nomu wakwe; Khwatsi hi yivana leyi yi gulelwako kutlhabyiweni, Ni yivu leyi yi miyelako mahlweni ka mukayi, Hizalezo a nga vululangi nomu wakwe. Mat. 23:63; Joh. 1:29; Miti. 8:32

⁸ I susilwe hi kuxanisiwa ni kulamuliwa, Kanilezi a xikari ka vanhu va ka kabye himani a zi alakanyileko Lezaku i lo susiwa misaveni ya vahanyako, A biwa hi kota ya zionho za tiko ga mina?

⁹ Va lo mu lahla zinwe ni vaonhi, A kufeni kakwe i wa hi zinwe ni vanhu va fumileko, Kanilezi a nga gohangi nchumu, Ge hambu ku khohlisa hi nomu wakwe, Joh. 8:46; 2 Kor. 5:21; 1 Ped. 2:22

¹⁰ Zi lo mu xalalisa Jehova a ku muba hi kubayiseka. Loku a wutomi gakwe gi mahile a mhamba ya zionho, I ta wona a pswalo wakwe, a lehisa masiku yakwe, Ni kuranza ka Jehova ku ta vuvuma canjeni gakwe. Rom. 6:9

¹¹ I ta wona mihanzu ya kuxaniseka ka muhefemulo wakwe, a eneliswa; Hi kutiva kakwe a nanza ga mina gi lulamileko gi ta maha vanyingi va lulama, Hakuva i ta rwala zigoho zabye.

¹² Hikwalaho nzi ta mu nyika xiavelo xakwe ni vahombe, I ta avana muphango ni laʼva ntamu, Hakuva i nyikele kuhanya kakwe kufeni, A hlayiwa zinwe ni vahambunyeti, Hambu lezo a nga rwala a zionho za vanyingi, A kombelela vahambunyeti. Lu. 22:37; 23:33; Joh. 17:2, 6