Isaya 52 - Tshwa Bible

¹ Vuka, vuka, ambala a ntamu wa wena, O Zioni! Ambala a tinguwo: ta wena to saseka, O Jerusalema, wena muti wa kubasa; Kakuva kusukela ka lezi ku nga ta ha enghena ka wena a makhuna ni va nga hlazekangiko. Kuv. 21:27

² Ti phuhunhe a tsutsungwani, vuka u tshama xitshanwini xa wena, o Jerusalema; Tlhatlha magota ma nga nhanwini ya wena, O khumbi, nhwana Zioni!

³ Hakuva Jehova i ngalo: Mu xavisilwe mahala, mu ta tiruliwa ahandle ka mali.

⁴ Hakuva Hosi Jehova i ngalo: A vanhu va mina va relele kale vaya le Gipite va ya luvela kona; zonake a maAssiria ma lo va tsimbeketa ahandle ka nanzu. Gen. 46:6; 2 Tih. 17:5; 18:9

⁵ Makunu nzi ta maha yini, ku wula Jehova, lezi a vanhu va mina va khomilweko ahandle ka nanzu? lava va va fumelako vaba huwa, ku wula Jehova; a vito ga mina ga rukatelwa a siku ginwe ni ginwani. Mitse. 14:15; Rom. 2:24

⁶ Hikwalaho a tiko ga mina gi ta tiva a vito ga mina, hikwalaho va ta tiva hi siku gwalego lezaku hi mina loyi nzinge: Nzi mina yena.

⁷ Yi sasekisile kuyini le zitsungeni A mikonzo ya loyi a nehako a mahungu yo saseka, Loyi a wulawulako kurula; Loyi a nehako mahungu yo saseka yo tsakisa, A kanelako hi kuhanyisa; Loyi a nge ngalo ka Zioni: Nungungulu wa wena wa fuma! Nah. 1:15; Rom. 10:15

⁸ A varinzeli va wena va ta kanyuluka, va yimbelela vontlhe hi gezu ginwe, Hakuva hi mahlo yabye va ta wona a kuwuya ka Jehova le Zioni.

⁹ Giyani, mu yimbelela khatiginwe, nwina marumbi ya Jerusalema; Hakuva Jehova i chavelele a vanhu vakwe, i tlhatlhisile Jerusalema!

¹⁰ Jehova i funungule a woko gakwe ga kubasa mahlweni ka matiko wontihe, A magemeta-musi ya misava ma ta wona a kuhanyisa ka Nungungulu wa hina.

¹¹ Sukani, sukani, humani lomo! Mu nga khumbi ni xilo xinwe xi nga hlazekangiko! Humani xikari ka gona; ti basiseni! Nwina lava mu rwalako a zibya za Jehova. 2 Kor. 6:17; Kuv. 18:4

¹² Hakuva mu nga ta famba hi ku hatlisa, Ge hambu ku suka hi ku tsutsuma; Hakuva Jehova i ta mu rangela, Na Nungungulu wa ka Israeli i ta mu vikela lenzhako. Ekso. 12:33; 13:21; Deut. 16:3

A nanza ga Jehova gi xanisekako.

¹³ Langutani, a nanza ga mina gi ta humelela, I ta kuliswa, a dzunziwa, a tlakuswa hehla. Miti. 2:33; Fil. 2:9

¹⁴ Khwatsi hilezi vanyingi va nga ku hlamala, Hakuva a nghohe yakwe yi wa gohekile ku hunza tinghohe ta vanwani, Ni dzumba gakwe ku hunza madzumba ya vana va vanhu.

¹⁵ Hilezo i ta dzukisa a matiko manyingi; A tihosi ti ta su kaye mahlweni kakwe, Hakuva ti ta wona lezi ti kalako ti nga se ku byeliwa, Ti gonza lezi ti kalako ti nga se ku zizwa.