Isaya 51 - Tshwa Bible

A kutlhatlhiswa ku tshinele.

¹ Nzi ingiseni nwina lava mu hlotako kululama, Nwina lava mu lavako Jehova. Cuwukani ka ribye legi mu tekilweko ka gona, Ni ka mugodi lowu mu humesilweko ka wona.

² Cuwukani ka Abrahama a dadani wa nwina, Na Sara loye a mu psweleko; Hakuva laha a nga hi yece nzi mu vitanile, Nzi mu katekisa, ni ku mu anzisa. Gen. 12:1; Jox. 24:3; Ezek. 33:24

³ Hakuva Jehova i ta zwela wusiwana Zioni, I ta zwela wusiwana a marumbi yakwe wontihe; A xiwula xakwe i ta xi maha xi fanana ni Edeni, Ni mapanya yakwe ma ta fanana ni simu ga Jehova. Ku tava kona kutsaka ni migiyo lomo, A zigingi ni magezu ya wucenje. Tis. 102:25; Lu. 21:33

⁴ Ingisa, wena tiko ga mina, Mu kangatela ndleve, nwina hlengeletano ya mina; Hakuva a nayo wu ta huma ka mina, Nzi maha nongameto wa mina a kuva kuwonekela ka tiko.

⁵ A kululama ka mina ku laha kusuhani, ni kuhanyisa ka mina ka hata; Zonake a mawoko ya mina ma ta lamula matiko; A matiko ya lomu bimbini ma nzi langutela, Ma tsumba woko ga mina.

⁶ Tlakusani a mahlo ya nwina le tilweni, Mu cuwuka ni laha misaveni; Hakuva a tilo gi ta nwalala khwatsi i musi, Ni misava yi ta hlakala khwatsi i nguwo; Ni lava va tshamako ka yona va tafa kota ziwunuwunwani; Kanilezi a kuhanyisa ka mina ku ta su tsoma kala kupinzuka, Ni kululama ka mina ku nga ta mbhela.

⁷ Nzi ingiseni, nwina lava mu tivako kululama, Wena tiko u nga ni nayo wa mina mbilwini ya wena; Mu nga chavi ku tseketselwa hi vanhu, Ge hambu ku dzukiswa hi xiruko zabye.

⁸ Hakuva va ta giwa hi tisumba khwatsi i nguwo, Ni ziwungwani zi ta vaga kota woya; Kanilezi a kululama ka mina ku ta su tsoma kala kupinzuka, Ni kuhanyisa ka mina ku tava ka zizukulwana ni zizukulwana.

⁹ Vuka, vuka! Ambala ntamu wena woko ga Jehova! Vuka, u kota kale, a xikhatini xa kaleloko. Xana a hi wena u nga mbhetisa Rahabi, Ni ku tlhava dragoni ke? Ekso. 14:27; 15:7, 10; Tis. 74:13

¹⁰ A hi wena u nga womisa a bimbi, a mamati ya kueta; Loyi u bhoxileko a ndlela xikari ka bimbi go eta, Va famba ha yona a vanhu va hanyisilweko ke? Ekso. 14:22, 29

¹¹ Hikwalaho a vatirulweko va Jehova va ta tlhela, Va wuya Zioni hi tisimu ta migiyo; A kutsaka ka pinzukelwa ku tava tihlokweni tabye, Va ta kuma makatekwa ni litsako, A hlomulo ni kutsikwila zi ta tsutsuma. Joh. 16:20, 22; Kuv. 21:4

¹² Hi mina wutsumbu nzi mu chavelelako. U mani wena u chavako a vanhu va ta ngafa, Ni vana va vanhu va ta nga hunzuka va fanana ni byanyi;

¹³ U rivalako Jehova a Mumahi wa wena, Loyi a andleleko matilo ni ku aka a ziseketelo za misava; U simamisa ku chava wontihe masiku hi kota ya zanga ya muxanisi Loku a xuva ku lovisa ke? Yi gumela kwihi a zanga ya mulovisi ke?

¹⁴ Loyi a bohilweko wukhumbini i ta hatla a tlhatlhiswa, A nga ta fela rinzini, ge hambu ku vumala zakuga.

¹⁵ Hakuva nzi Jehova a Nungungulu wa wena, Loyi a vindlusako a bimbi lezaku ma gobhoza a mabyandlati ya gona; A vito gakwe hi Jehova wa tiyimpi.

¹⁶ Nzi vekile a timhaka ta mina no nwini wa wena, Nzi ku fihlile nzhutini wa canja ga mina, Kasi ku andlala tilo ni ku aka ziseketelo za misava, Ni ku wula ka Zioni, aku: Wena u tiko ga mina! Deut. 18:18; Jer. 1:9

¹⁷ Vuka, vuka, suka u yima Jerusalema! Loyi u nwileko canjeni ga Jehova a gombe ga zanga yakwe, U nwile a gombe legi gi popisako, u gi heta. Jer. 25:15; Kuv. 14:10; 16:19

¹⁸ Xikari ka varisanyana lava a va psweleko a nga kona a mu rangeleko, Ge hambu ni munwe wa ku mu khoma hi canja xikari ka lava a va wundlileko.

¹⁹ A makhombo mambiri ma ku wela, himani a ku zwelako wusiwana ke? A kuhahlulwa, ni ku lobyiswa, ni ndlala, ni supado, Nzi ta ku chavelelisa kuyini?

²⁰ A vana va wena va titivele, Va etlele mahanzakanyeni ya tindlela kota mangulwe lomu ziyweni. Va popilwe hi zanga ya Jehova, ni kukawuka ka Nungungulu wa wena.

²¹ Hikwalaho zwana timhaka leti, wena loyi u hlokiswako, Wena loyi u popilweko, na ku nga hi vinya.

²² Hosi Jehova, Nungungulu wa wena. Loyi a lwelako a tiko gakwe, e ngalo: Languta, nzi susile canjeni ga wena a gombe gi popisako, U nga ta hanwa a gombe ga zanga ya mina.

²³ Kanilezi nzi ta yi veka mandleni ya vaxanisi va wena, Lava va teku ka wena: Korama, hi hunza; Zonake a hlana wa wena u wu maha a kuva misava, U ku khwatsi u ndlela ka vahunzi.