Isaya 5 - Tshwa Bible

A lisimu la xivina.

¹ Nzi ta yimbelela hi xiranzwa xa mina, A Xizimba xa a ranzekako wa mina, na nzi kumbuka a xivina xakwe. A xiranzwa xa mina xi wa hi ni xivina le hehla ka xitsunga xi nonileko nguvu. Mat. 21:33; Lu. 20:9

² I lo xi rima, a susa maribye, A byala ka xona a mavina ma hlawulekako; A aka a tshala xikari ka xona, A xi vatlela a xigayo xa vinya. I lo tsumba lezaku xi ta pswala a mauva yo nanziha, Kanilezi xi lo pswala mauva yo bava.

³ Makunu, nwina vaaki va Jerusalema, Na nwina vanhu va ka Juda, Lamulani xikari ka mina ni xivina xa mina.

⁴ Xini xinwani xi nga fanele kuva xi mahilwe xivineni xa mina Lexi nzi nga xi mahangiko ke? Laha nzi nga rinzela a kuva xi pswala mauva yo nanziha, Hikuyini xi psweleko mauva yo bava ke?

⁵ Nzi ta mu byela lezi nzi ta nga maha ka xivina xa mina: Nzi ta susa libhingo la xona li hiswa, Nzi ta khungumula a tigingisi la xona, ti kanzihelelwa.

⁶ Nzi ta xi maha fusi, xi nga ta theniwa, hambu ku rimiwa; Xi ta mila zigetlwani ni mizwa; Nzi ta leletela marefu lezaku ma nga ha nisi vula hehla ka xona.

⁷ Hakuva a xivina xa Jehova wa tiyimpi hi yindlu ya ka Israeli, Ni vanhu va ka Juda xibyalo xakwe a tsakako ha xona. I wa cuwukele nongameto, kanilezi i lo kuma kuhalatiwa ka nkhata, A cuwukela kululama, kanilezi a kuma tihuwa ta kuxaniseka.

⁸ Khombo ka vona va ti wutlelelako tiyindlu, Ni lava va engetelako masimu hi masimu Kala ku nga have na wutshamu, Kasi va aka voce xikari ka tiko.

⁹ Jehova wa tiyimpi i wulile tindleveni ta mina, aku: Hizinene, a tiyindlu tinyingi ti ta hahluka, A tiyindlu to saseka ni ta hombe ti ta vumala vanhu.

¹⁰ Hakuva a khume ga tinzima ta xivina ti ta humesa a karafawu yinwe ntsena, Ni homeri ginwe ga mbewu gi ta humesa a efa ginwe ntsena.

¹¹ Khombo ka vona lavo va vinzukako ni mixo, va tsutsumela byala, Ni lava va hungatekako laha wusikwini, va hiswa hi vinya,

¹² A xitende ni xiridingoma, ni njhomani, ni khombela, ni vinya zi kumeka mibuzweni yabye; Kanilezi a va khatali hi ntiro wa Jehova, A va woni mitiro ya mandla yakwe.

¹³ Hikwalaho a vanhu va mina va ta yiswa kukhonweni hikuva va nga hi na kutiva; A vahombe vabye va hlokiswa hi ndlala, Ni zidlemo za vanhu zi womile hi tora.

¹⁴ Hikwalaho Xeole xi kulisile kunavela ka xona, Xi ahlamisile a nomu wa xona ku hunza mpimo, A vahombe va Jerusalema va ta relela kona, zinwe ni zidlemo zi mahako guwa, Ni vontlhe lava va tsakako kona.

¹⁵ A vanhu va ta koramiswa, ni tinhenha ti tsongahatiwa, Ni mahlo ya lava va ti kukumukisako ma ta koramiswa.

¹⁶ Kanilezi Jehova wa tiyimpi i ta tlakuswa hi kulamula, Na Nungungulu wa ku Basa i ta woneka na basile kululameni.

¹⁷ Zonake a tiyivana ti taga kona khwatsi hi loku ti hi wuriselweni ga tona, Ni vamatiko va taga a zipetso zi onhekileko za laʼvo fuma.

¹⁸ Khombo ka vona lavo va kokako kubiha hi tingoti ta zahava, Va koka ni zigoho khwatsi hi gota ga kareta.

¹⁹ Lava vange: A hatlise, a hatlisise a ntiro wakwe, Kasi ha fela ku wu wona; Ngha a wusungukati ga Wa ku Basa wa ka Israeli gi tshinela, Kasi ha fela ku gi tiva!

²⁰ Khombo ka lava va wulako zo biha lezaku zi sasekile, a zo saseka vaku zi bihile; Lava va mahako munyama a kuva kuwonekela, ni kuwonekela va ku maha munyama; A zo bava va zi maha zo tsombela, ni zo tsombela va zi maha zo bava.

²¹ Khombo ka lava va alakanyako lezaku va tlharihile, Lava va ti tsumbako lezaku va kunguhele.

²² Khombo ka vona lava va nga tinhenha kunwani ka vinya, Ni lava va nga ni wurena a ku xanganyeleni ka byala.

²³ Lava va yimelako a wakubiha hi kota ya ku xavelelwa, Va kona loyi a lulamileko.

²⁴ Hikwalaho khwatsi hi langavi ga nzilo gi gako tihlanga, Ni ku khwatsi hi loku gi hisa byanyi gi omileko, Zinghaho a mutsu wabye wu ta bola, Ni zitsangi zabye zi ta jujeka kukotisa tsutsungwani; Hakuva va tsikile a nayo wa Jehova wa tiyimpi, Va kanyisa a mhaka ya Wa ku Basa wa ka Israeli.

²⁵ Hikwalaho a zanga ya Jehova yi vindlukele vanhu vakwe, I nawulutile a canja gakwe a va vukela, a vaba, A zitsunga zi lo tsekatseka, ni zirumbi zabye ziku khwatsi wulongo lomu maphangweni. Hambulezo, a zanga yakwe a yi rengangi, Ni canja gakwe ga ha nawulukile.

²⁶ A mifumo yi nga kule i ta yi tlakusela a nghapa, I ta va bela miloti lezaku va suka magemeta-musi ya misava; Vona va tata hi kutsutsuma.

²⁷ A ku na munhu wo rereka, ge hambu wo khunguvanyeka xikari kabye; A nga kona a ta nga khudzehela, hambu ni ku etlela; A mabhandi yabye ma nga ta tlhatlheka, Ge, hambu a tingoti ta zilato zabye ti nga ta phewuka.

²⁸ A tigalala tabye ta kariha, ni mawura yabye wontihe ma kondlilwe, A makhanzo ya mahaxi yabye ma fanana ni maribye, Ni tinghonghwani ta tikareta tabye ti khwatsi xipupuri.

²⁹ A kudzuma kabye ku fanana ni ka pswele ga nghala, Va dzuma khwatsi tinghalana; Ina, va dzuma loku va khoma a pfimba wabye, va wu yisa kule, Ku hava loyi a nga wu tlhatlhisako.

³⁰ A ka siku lego va ta dzuma hehla ka vanhu khwatsi hi kugobhoza ka bimbi, Ni loyi a langutelako misaveni, i ta wona munyama ni hlomulo, A tilo gi pfupeliswa hi munyama.