Isaya 47 - Tshwa Bible

A kuwa ka Babuloni.

¹ Chika, u tshama tshurini, Wena nhwana, nʼwana Babuloni! Tshama lahasi, a ku na xitshamu xa wuhosi, Wena nhwana wa maKaldea; Hakuva u nga ta ha vitanwa aku u nene niku u sasekile.

² Sila mapa laha xigayweni! Tlhatlha veli ya wena, U kunya nguwo ya wena u tlhatuka micongo.

³ A wumbyiri ga wena gi ta funungulwe, Ina, a tingana ta wena ti ta woniwa. Nzi ta ti photela, Nzi nga ta tsetselela munhu. Isa. 3:17; Nah. 3:5

⁴ A Mutiruli wa hina a vito gakwe hi Jehova wa tiyimpi, Loyi a Basileko wa ka Israeli.

⁵ Tshama hasi u miyela, U enghena munyameni, nhwana wa maKaldea! Hakuva u nga ta ha vitanwa aku, U Muzinza wa matiko.

⁶ Nzi wa zangarele a tiko ga mina, Nzi nyenyezisa a tshomba ya mina, Nzi va nyikela mandleni ya wena. A ku va mahelangi wuxinji; U lo binzisa nguvu a muyoka wa wena hehla ka zikhosana.

⁷ Wena u ngalo: Nzi tava muzinza kala kupinzuka. A ku khatalelangi lezi zilo, A ku alakanyangi lezaku zi ta mbhela. Kuv. 18:7

⁸ Hikwalaho zwana lezi, wena loyi u ranzako ku ti tsakisa; Wena loyi u tshamekileko: Wena loyi unge mbilwini ya wena: Hi mina nzoce, a ku na munwani, Cima nzi nga ta kuva noni, Hambu ku lahlekelwa hi vanana.

⁹ Kanilezi a makhombo laya mambiri ma ta ku humela xikanwe hi siku ginwe: U ta lahlekelwa hi vanana uva noni; Zi ta wela ka wena hi kutikisilweko, Hambu loku u hi ni mimbhulo yo tala ni wuloyi ga ntamu.

¹⁰ Hakuva u ti tsumbile kubiheni ka wena, uku: A nga kona a nzi wonako! A wutlhari ga wena ni wutivi ga wena gi ku hambukisile. Ute mbilwini ya wena: Hi mina nzoce, a nga kona munwani.

¹¹ Hikwalaho a khombo gi ta ku wela, U nga ta ku tiva lomu gi ta ngata ha kona. U ta welwa hi mhango, u nga zi koti ku ti vikela; A kulova ku ta ku wela hi xitshuketi Na u nga tivi nchumu.

¹² Yima zalezi ni wutumbe ga wena ni mimbhulo yinyingi ya wena, Leyi u yi tirileko kusukela wusweni ga wena, Kutani zi ta ku vuna ku chavisa a valala va wena.

¹³ U ti karatile hi kuya tinʼangeni tinyingi, Lava va pimako hi matilo, ni laʼva cuwukako tinyeleti, Ni lava va vumbako xikhatini xa hweti yiswa, A va ku ponise ka lezi zi ta nga humelela ka wena.

¹⁴ Langutani, va taku khwatsi i byanyi, A nzilo wu ta va hisa; Va nga ta ti ponisa ntanwini wa langavi. A hi makhala yo ti kufumeta ha wona, A hi nzilo wa ku wora.

¹⁵ Va tava tano lava u lombileko wusungukati kabye, Lava u bhinzuleko navo kusukela wusweni ga wena Va ta hangalaka vaya matshanwini yabye, A nga kona a ta nga ku ponisa!