Isaya 42 - Tshwa Bible

A kuwonekela ka Vamatiko.

¹ Languta a nanza ga mina, legi nzi gi yimelako, A hlawulilweko wa mina loyi muhefemulo wa mina wu xalalako ha yena; Nzi vekile moya wa mina hehla kakwe, I ta humesela kululama ka vamatiko. Mat. 3:17; 17:5

² A nga ta kanyuluka, a nga ta tlakusa gezu gakwe; Gi nga ta zwiwa maphangweni.

³ A nga ta tshova a lihlanga li fufekeleko, A nga ta tima a kandiya yi tuvikako musi; I ta kanela a kululama ka zinene.

⁴ A nga ta mbheta ntamu, ge ni ku karata, Kala loku a yimisile kululama laha misaveni; A matiko ya le bimbini ma ta langutela nayo wakwe.

⁵ I wuta lezo Nungungulu Jehova, Loyi a vangileko tilo, a gi andlala, Loyi a anekileko misava ni lezi zi milako ka yona; Loyi a nyikileko kuhanya ka vanhu va nga ka yona, A nyika moya ka tava va famba-fambako ka yona. Neh. 9:6; Joba 33:4

⁶ Mina Jehova nzi ku vitanele kululama, Nzi ta ku khoma hi canja ga wena nzi ku hlayisa; Nzi ta ku yimisa a kuva xivumelwano ni tiko, Ni kuwonekela ka vamatiko;

⁷ Lezaku u vulula a mahlo ya zikhumu, U tlhatlhisa tiperesu lomu paxweni. Ni ku humesa wukhumbini lava va tshamileko munyameni,

⁸ Nzi Jehova, hi gona vito ga mina lego; Nzi nga ta nyikela ka munwani a wukulu ga mina. Hambu ni wudzunzo ga mina ka zifananiso. Ekso. 6:3

⁹ Langutani, lezi nzi zi wulileko zi mahekile, Makunu nza mu tivisa lezi za ziswa; Nzi mu byela na zi nga se ku chikela. A lisimu tiswa.

¹⁰ Yimbelelani a lisimu tiswa ka Jehova, Mu mu dumisa kusukela magunweni ya misava; Nwina lava mu yako bimbini, ni zontlhe zi nga ka gona, A matiko ya le bimbini ni lava va akileko ka wona.

¹¹ Ngha a xiwula ni miti ya xona zi tlakusa magezu, Na nwina zimitana za vaKedare; Lava va akileko le Sela ngha va yimbelela, A va kanyuluka hehla ka zitsunga.

¹² A va kulise Jehova, Va tlhatlhambutela wudumo gakwe matikweni ya le bimbini.

¹³ Jehova wa huma kota nhenha, Wa ti vuxa khwatsi hi munhu a yako yimpini; I kanyuluka, aba huwa, A kombisa ntamu wakwe ka valala vakwe.

¹⁴ Aku: Kale na nzi ti miyelele, Nzi rutisa, nzi ti khoma; Makunu nzi ta rila khwatsi hi wasati loyi a lunwako, Nzi ta hefemuteka, nziva ni mahika.

¹⁵ Nzi ta lovisa zitsunga ni miganga, Nzi womisa byanyi gontlhe ka zona; A micongo yi ta maha misava yi womileko, Nzi womisa mativa.

¹⁶ Nzi ta fambisa a zikhumu a ndleleni zi nga yi tiviko, Nzi zi rangela mipfutleni zi nga yi tiviko; Nzi ta hunzula munyama wu maha kuwonekela mahlweni kabye, Ni matlhelo ma byekeleko ma ta lulametwa. Lezi zilo nzi ta zi maha, nzi nga ta zi tsika.

¹⁷ Kanilezi lava va tsumbako zifananiso zi vatlilweko, Lava va nge ngalo ka zifananiso zi wumbilweko: Nwina mu vanungungulu va hina, Va ta tlhelela nzhako vave ni tingana. Tis. 97:7; Isa. 1:29

A wukhumu ga nanza ga Jehova.

¹⁸ Nwina timbeveve ingisani, Na nwina zikhumu cuwukani kasi ma fela ku wona!

¹⁹ A xikhumu himani, loku ku nga hi nanza ga mina, Himani a mbeveve yo fana ni tsukano wa mina lowu nzi nga wu ruma? Himani xikhumu ku hunza loyi a ranzekako ka Nungungulu? Himani a nga xikhumu ku fanana ni nanza ga Jehova?

²⁰ U wonile a zilo zo tala, kanilezi a ku zi khataleli; A tindleve, ti vululekile, kanilezi a ku ingisi nchumu. Mat. 13:13; Rom. 2:21

²¹ Zi mu xalalisile Jehova hi kota ya kululama kakwe A ku kulisa a nayo wu kheseka.

²² Kanilezi a tiko legi gi phangilwe, gi na ni wusweti; Va vekelwe maziyo marinzini, va hoxiwa paxweni; Va khomilwe, a va na mutlhatlhisi, Va wutliwa, a nga kona a wulako, aku: Tlhelisa!

²³ Himani xikari ka nwina a ta nga zizwa A xiyisisa a mhaka leyi xikhatini xi tako, a yi ingisa?

²⁴ Himani a nyikeleko Jakobe a kuva a phangiwa, Na Israeli mandleni ya vaphangi ke? A hi Jehova loyi hi mu onheleko ke? Loyi va alileko ku famba tindleleni takwe, Va nga ingisi nayo wakwe.

²⁵ Hikwalaho i chulule a zanga yakwe hehla kabye, Ni kuleva ka yimpi. A nzilo wa yona wu va renzelekele, kanilezi a va wu pimangi; Wu va hisile, kanilezi a va wu khatalelangi. Jer. 7:20; Ezek. 20:8; Hos. 5:10