Isaya 41 - Tshwa Bible

A Hosi ya matiko.

¹ Miyelani nwina matiko ya le bimbini, mu nzi ingisela! A matiko a mave ni ntamu muswa; A ma tshinele ma wulawula, A hi yeni zinwe hubyeni

² Himani a vuxileko munhu hi Mutsuwuka-gambo, Loyi a hlulako ni kwihi a yako kona? A wuya a mu nyika matiko ni ku khozisa tihosi? Himani a hunzulako tisupado ta tona tiva ntshuri, Ni mawura yabye ma maha mungu wu kukuletwako hi mheho?

³ Wa va hlongolisa, a hunza na tsakile A ndleleni leyi a nga kala a nga fambi ha yona.

⁴ Himani a mahileko lezi zilo a zi mbhelelisa? Hi yena loyi a vitanileko a zizukulwana za vanhu hi le kusanguleni; Mina Jehova, a wo ranga ni wo gumesa, nzi mina yena. Kuv. 1:8, 17; 22:73

⁵ A matiko ya le bimbini ma lo zi wona, ma chava; Ni magemeta-musi ya misava ma lo rurumela. Va lo tshinela, vata;

⁶ Va vunetelana; A munwe ni munwani a byela makabye, aku: Tiya hlana!

⁷ A muvatli i tiyiseta mufuli wa nzalama; Loyi a bethako hi kono a tiyiseta loye a bako a xigalanyunzo. A dzunza a muri wo zariyeta ha wona, aku: Wu nene! Zonake a tiyisa a xifananiso hi tikhokho kasi xi nga tsekatseka.

A Mutiruli wa Israeli.

⁸ Kanilezi wena Israeli, nanza ga mina, Wena Jakobe loyi nzi ku hlawuleko, U nga pswalo wa Abrahama a xaka ga mina. Ekso. 19:5; Lu. 1:54; Jak. 2:23

⁹ Wena loyi nzi ku tekileko magemeta-musi ya misava, Nzi ku vitanileko magunweni ya kona, Nzi ku byelile, nziku: Wena u nanza ga mina, Nzi ku hlawule, a nzi ku tsikangi.

¹⁰ U nga chavi, hakuva nzi na wena; U nga mbheli ntamu, hakuva nzi Nungungulu wa wena! Nzi ta ku tiyisa, nzi ku vunetela; Nzi ta ku seketela hi canja ga mina ga xinene ga kululama.

¹¹ Languta, vontlhe lava va ku zangareleko va tawa tingana, va hakaseka; Lava va holovako na wena va nga ta kuva nchumu, va ta lobyiswa.

¹² Lava va nga ku vukela u ta va lava u nga va kumi; Lava va lwako na wena va ta woneka kota va nga hiko va nchumu, ya lova.

¹³ Hakuva hi mina Jehova Nungungulu wa wena loyi nzi khomako a canja ga wena ga xinene, Nziku: U nga chavi, nzi ta ku vunetela. Deut. 31:6; Jox. 1:9

¹⁴ U nga chavi wena xiwungwani, Jakobe, Na nwina misalela ya Israeli; Nzi ta ku vunetela, ku wula Jehova; A Mutiruli wa wena hi Loyi wa ku Basa wa ka Israeli.

¹⁵ Languta, nzi ta ku maha uva lisumba liswa lo kariha, Lo hula ha lona li nga ni meno; U ta faya zitsunga, u zi chinza, A miganga u ta yi maha yiku khwatsi i mungu.

¹⁶ U ta zi checheta, ni mheho yi ta zi kukuleta, A xipupuri xi zi hangalasa; Kanilezi wena u ta tsakela Jehova, U ti kulisa hi Loyi wa ku Basa wa ka Israeli.

¹⁷ Lava va tsimbeketilweko ni vavumali va lava mati va nga ma kumi, A tirimi tabye ti womile hi tora; Kanilezi mina Jehova nzi ta vazwa, Mina Nungungulu wa ka Israeli nzi nga ta va tsika.

¹⁸ Nzi ta velisa micongo lomu migangeni ya xikwakwa, Ni zibuka lomu mikoveni. A ziwula zi ta maha milambo Ni ligwangwa li ta humesa xibuka za mati.

¹⁹ Lomu xiwuleni nzi ta milisa tisedare, ni tisinya ta akakia, ni mirta, ni kuhlu, Lomu ligwangweni ku tava ni kipres, ni pinyero, ni seringa;

²⁰ Kasi vanhu va zi wona, va tiva, Va xiyisisa va pima lezaku i canja ga Nungungulu gi mahileko lezo, Ni lezaku Loyi a Basileko wa ka Israeli i zi vangile.

²¹ Tlhatihambutelani a timhaka ta nwina, ku wula Jehova; Humesani wumboni ga nwina, ku wula Hosi ya Jakobe.

²² A va gi humese, hi byeliwa leʼzi ta nga maheka. Hi kombiseni lezi mu nga vumba kale, kasi ha fela ku zi tiva, Hi wona loku zi mahekile. Kambe mu ta hi byela lezi zi ta nga humelela,

²³ Mu hi tivisa lezi zi ta ngata anzhako ka lezi, Kasi ha fela ku zi tiva lezaku mu vanungungulu. Ina, hi nga mahani nchumu wo saseka kutani wo biha, Kasi hontlhe ha fela ku hlamaliswa.

²⁴ Langutani, nwina a mu va nchumu, Ni mitiro ya nwina a yi nyawuli; Manyalataniso loyi a mu hlawulako.

²⁵ Nzi vuxile munwe hi le Nwalungu, i sina a tile, Ku tile hi le Mutsuwuka-gambo munwe loyi a vitanako vito ga mina; Loyi a ta nga kanzihela vafumeli kota nzhope, Khwatsi hi muwumbi a kanzihelako a wumba.

²⁶ Himani a nga zi kanela hi kusanguleni kasi hi fela ku zi tiva; Loye a nga zi wula kale, kasi hiku: U wulile zona! A ku na munhu a zi vumbileko, ge ni ku hi tivisa; I hava ni munwe a ngazwa a magezu ya nwina.

²⁷ Hi mina wo ranga nzi byelileko Zioni, nziku: Hi valavo, hi valavo! Nzi ta nyika Jerusalema munwe a kanetako mahungu yo saseka.

²⁸ Laha na nzi cuwuka a nzi woni munhu, A gi kona sungukati xikari kabye, Loyi a zi kotako ku hlamula loku nzi wutisa.

²⁹ Langutani, vontlhe a va vuni nchumu, A mitiro yabye a yi nyawuli; A zifananiso zabye zi wumbelweko i moya wa hava ntsena.