Isaya 4 - Tshwa Bible

¹ A siku lego a ntlhanu wa vavasati ni vambiri va ta khomelela ka nuna munwe, vaku: Hi taga kuga ka hina, hi ambala tinguwo ta hina venyi, ntsena hi vumele lezaku hi vitanwa hi vito ga wena, kasi ku susa tingana ta hina.

A wukosi ga Zioni.

² A ka siku lego a hluke ga Jehova gi tava gi bombisilwe gi ngangamela, a mihanzu ya misava yi tava yi nene ni ya wumbhuri a ka lava va ponileko va ka Israeli. Ekso. 19:5; Lu. 10:20; Kuv. 13:8

³ Zi ta maheka lezaku loyi a seleko le Zioni, ni loyi a seleko le Jerusalema, va ta hlayiwa kota va basileko, vontlhelele lava va tsalilweko bhukwini ga vahanyako le Jerusalema,

⁴ laha a Hosi yi ta ngava yi hlazile a chaka ga vanhwana va Zioni, ni ku susa a nkhata wu nga xikari ka Jerusalema hi moya wa kulamula ni moya wa kuhisa.

⁵ Hehla ka gontlhe a wuakelo ga xitsunga xa Zioni, ni hehla ka gotsovanyano wakwe, Jehova i ta vanga a refu ni musi laha hlikanhini, ni langavi ga nzilo laha wusikwini, hakuva hehla ka kungangamela kontlhe ku ta andlaliwa a xikhubhunyeto.

⁶ Ku tava kona a tenda gi vikelako a kuhisa ka gambo ni hlikanhi, giva wuchavelo ni wuponelo xikhatini xa bhubhutsa ni vula.