Isaya 36 - Tshwa Bible

A zijumani xa Sennakeribe.

¹ Hi lembe ga wukhume ni mune ga kufuma ka hosi Hezekia, Sennakeribe a hosi ya le Assiria, i lo vukela yontlhe a miti ya ka Juda yi nga ni makhokhola, a yi teka. 2 Tih. 18:13; 2 Kro. 32:1

² Zonake a hosi ya le Assiria yi lo rumela Rabxake hi le Lakixe, a kuya Jerusalema ka hosi Hezekia, na hi ni yimpi ya hombe. Yena i lo yima hi laha nongeni wa tiva ga lehehla, le gonzweni kusuhani ni Simu ga Vahlazi.

³ Zonake ku lota kakwe Eliakimu a nʼwana Hilkia, a nduna ya yindlu ya hosi, na Xebna, a mutsali, na Joaha a nʼwana Asafa, a muhlayisi wa timhaka.

⁴ Rabxake i te ngalo kabye: Wulani ka Hezekia lezaku: A hosi ya hombe, yi nga hosi ya le Assiria, yi ngalo: A kutsumba ka wena kuta hi kwihi ke?

⁵ Nzi ngalo: Mihumbu ntsena, a makungu ya wena ni ntamu wa wena a kulwa na mina. Makunu u tsumba mani lezi u nzi hluwukileko?

⁶ Wena u tsumba Gipite, a lihlanga li tshobyilweko, leli li tlhavako a canja ga loyi a khigelako ka lona. Faro a hosi ya le Gipite i maha lezo ka vontlhe va mu tsumbako.

⁷ Kutani u taku ka mina: Hi tsumba Jehova, a Nungungulu wa hina; xana a hi yena loyi Hezekia a suseleleko matshamu yakwe ma tlakukileko ni maganzelo, aku ka Juda na Jerusalema: Mu ta khozela laha ka ganzelo legi basi?

⁸ Hikwalaho, zwananani makunu ni nwinyi wa mina, a hosi ya le Assiria, zonake nzi ta ku nyika 2,000 wa mahaxi, loku wena u ta zi kota ku kuma vakhileli va kona.

⁹ U nga hlulisa kuyini wena ni yinwe ya tinduna leʼti tsongwani ta hosi ya mina? U tsumba Gipite lezaku u ta kuma kona tikareta ni vakhileli va mahaxi ke?

¹⁰ Xana a nzi tangi a ku ta lovisa tiko legi hi kuranza ka Jehova ke? Hi Jehova a nzi byelileko lezaku: Famba ka tiko legiya u ya gi lovisa.

¹¹ Zonake Eliakimu na Xebna na Joaha vaku ka Rabxake: Hi nga wulawula ni malanza ya wena hi xiSiria, hakuva ha xi tiva; u nga wulawuli na hina hi xijuda kuzweni ka vanhu lava va nga laha ligingisini.

¹² Kanilezi Rabxake aku ka vona: A hosi ya mina yi nzi rumile ka hosi ya wena ni ka wena a ku ta wulawula leti timhaka ke? A nga nzi rumangi ka vanhu lava laha ligingisini aku kasi va fela kuga a macimba yabye ni kunwa mirunzo yabye zinwe na nwina?

¹³ Zonake Rabxake i lo tshinela a kanyuluka hi gezu ga hombe hi lirimi la xijuda, aku: Ingisani a gezu ga hosi ya hombe, a hosi ya le Assiria!

¹⁴ A hosi yi ngalo: Mu nga khohliswi hi Hezekia, hakuva a nga ta zi kota ku mu tlhatlhisa.

¹⁵ Mu nga kucetelwi hi Hezekia lezaku mu tsumba Jehova, loku yena aku: Hizinene, Jehova i ta hi tlhatlhisa, hambu lowu muti wu nga ta nyikelwa mandleni ya hosi ya le Assiria.

¹⁶ Mu nga ingisi Hezekia, hakuva a hosi ya le Assiria yi ngalo: Mahani kurula xikari ka mina na nwina, mu ti nyikela ka mina; zonake a munwe ni munwani i taga a mihanzu ya xivina xakwe ni nkuwu wakwe, anwa a mati ya hlowo yakwe.

¹⁷ Kala nzi ta mu teka nzi mu yisa a tikweni legi gi fananako ni ga nwina, a tikweni ga mavele ni vinya, a tikweni ga zakuga ni zivina.

¹⁸ Tlharihani, mu nga khongotelwi hi Hezekia, aku: Jehova i ta hi tlhatlhisa! Ku kona ni nungungulu munwe wa vamatiko a tlhatlhisileko tiko gakwe mandleni ya hosi ya le Assiria ke?

¹⁹ Va kwihi vanungungulu va Hamate na Arpade? va kwihi vanungungulu va Sefarvaime ke? Va tlhatlhisile a Samaria mandleni ya mina ke?

²⁰ Hi wihi xikari ka vanungungulu vontlhe va matiko a tlhatlhisileko tiko gakwe mandleni ya mina, ko kala Jehova a tlhatlhisa Jerusalema canjeni ga mina ke?

²¹ Kanilezi va lo miyela va nga mu hlamuli nchumu; hakuva a hosi yi wa leletele lezaku mu nga mu hlamuli.

²² Zonake ku lota mahlweni ka Hezekia, Eliakimu a nʼwana Hilkia, loyi a nga hi nduna ya yindlu ya hosi, na Xebna a mutsali, na Joaha a nʼwana Asafa, a muhlayisi wa timhaka, a tinguwo tabye na ti hanzulwe va ta mu byela a timhaka ta Rabxake.