Isaya 34 - Tshwa Bible

A tsayiselelo ya Edome.

¹ Tshinelani nwina matiko, mu ingisela; Ingisani nwina vanhu! A misava ngha yi ingisa, ni zontlhe zi nga ka yona, A misava ni zontlhe zi humako ka yona!

² Hakuva Jehova i zangarele wontlhe matiko, A khulo gakwe gi le hehla ka tiyimpi tontlhe ta wona; I va mbhetisile, i va nyikele kudaweni.

³ A vadelweko vabye va ta hoxiwa, A zirumbi zabye za nuha, Ni nkhata wabye wa khulungela zitsunga.

⁴ A xidlemo xontlhe xa le tilweni xi ta nyunguluka, Ni matilo ma ta songiwa kukotisa a papilo, A zidlemo zontlhe za wona zi tawa khwatsi ku tlhatlheka ka matluka ya vina, Kukotisa matluka ma wunileko ya nkuwu.

⁵ Hakuva a supado ya mina yi popilwe le tilweni, Langutani, yi ta relela hehla ka Edome, A ku ya lamula a tiko legi gi rukateleko.

⁶ A supado ya Jehova yi tele hi nkhata; yi womelele mafura; Hi nkhata wa tiyivana ni timhongo, Ni mafura ya tiswa ta tihamba; Hakuva Jehova i na ni kutlhabyiwa le Bozra, Ni kuhihirita ka hombe tikweni ga Edome.

⁷ Ku dawa ni tinyari, ni tikuzi ni tihonwana; A tiko gabye gi ta popiwa hi nkhata, Ni misava yi ta nyuka hi mafura.

⁸ Hakuva i siku ga kuphota ka Jehova, Ni lembe ga ku tlhelisela mhakeni ya Zioni.

⁹ A micongo ya le Edome yi ta hunzuka yiva phiriwa, Ni tshuri wa kona wu hunzuka wuva sulufa, A tiko ga kona gi ta hunzuka giva phiriwa gi vurako.

¹⁰ Gi nga ta timeka wusiku ni hlikanhi; A musi wa kona wu ta tuvika kala kupinzuka. Ku ta hunza xizukulwana ni xizukulwana na kona ku hi xiwula; Cima a ku na munhu a ta nga hunza ha kona.

¹¹ Kanilezi a masekwa ni tinungu zi ta tshama kona, A zihuhuluhuhu ni zikunguwa zi ta akela kona; I ta tshambuluta a lingoti la pfilupfilu hehla ka gona, Zinwe ni xiringaniso xa lobyiselelo.

¹² A ka vahombe vabye ku nga ta sala ni munwe a kuva hosi, Ni tihosana tabye tontlhe ti nga tava nchumu.

¹³ Ku ta mila mizwa lomu ziluvelweni za kona, A mahlehlo ni zigetlwani zi ta mila lomu makhokholeni; Gi tava wuakelo ga mahlolwa ni timbhuwu.

¹⁴ A zivanza zi ta tlhangana kona ni timhisi, Ni vamabhongwe va ta vitanana kona; A xigono xa wusiku xi ta tshama kona xi kuma wuhumulelo. Mat. 12:43; Kuv. 18:2

¹⁵ Hi laho xileveleve xi ta nga maha a ngule ya xona, xi tsiketa manza, Ma tlhotlhora, xi wundla a vana va xona; A makoti ma tlhangana lomu, a mikuku ni mimbhaha.

¹⁶ Hlotani lomu bhukwini ga Jehova, mu gonza: A xi kona ni xinwe xi ta nga vumaleka, A xi kona xi ta nga vumala munghana wa xona; Hakuva a nomu wa Jehova wu wulile lezo, Ni Moya wakwe wu zi tsombanyisile.

¹⁷ Hakuva i zi hlahluvile, A canja gakwe gi zi avele a tiko, Gi gi pimile hi lingoti; Zi ta gi fumela kala kupinzuka, A xizukulwana ni xizukulwana xi ta tshama lomo.