Isaya 30 - Tshwa Bible

Gipite a gi zi koti ku vuna.

¹ Khombo ka vanana va hluwukileko, ku wula Jehova; Lava va lavako wusungukati, va nga gi lavi ka mina, Lava va bohako xivumelwano, a handle ka moya wa mina, Va fela ku ti engetela xionho hehla ka xionho.

² Nwina lava mu relelako muya Gipite, Na mu nga wutisangi nomu wa mina; Mu tsutsumela khokholeni ga Faro, Na mu tsumba a nzhuti wa le Gipite. Jer. 37:7; Ezek. 17:15

³ A khokhola ga Faro gi ta mu wisa tingana, Ni kutsumba ka nwina hi nzhuti wa le Gipite ku tava kukanganyiseka.

⁴ Hambu lezo a tihosana takwe ti le Zoana, Ni mitsukano yakwe yi tile le Hanesi,

⁵ Vontlhe va tava ni tingana hi vanhu va nga hiko na ntamu a ku va vuna, Va nga hiko na xivuno ni bhinzu, Kanilezi va tava tingana ni xisolo ntsena.

⁶ A xiprofeto xungetano hi zivanza za tiko ga Dzonga. Va rwexa a pfuno wabye ni titshomba tabye ka timbongola ni makameli, Vaya tsemakanya tikweni ga zikarato ni hlomulo, Laho ku tako ha kona a nghala ya pswele ni ya matsune, Zinwe ni phiri ni drako gi purumako, Kasi kuya tikweni legi gi nga zi kotiko ku va bhinzulela nchumu.

⁷ Hakuva a kuvuna ka Gipite ka mahala; Hikwalaho nzi wulako lezaku i Rahabi gi nga vuniko nchumu.

⁸ Makunu, famba u ya zi tsala lomu ka bakwa mahlweni kabye, u zi tsala ni lomu bhukwini, kasi za hlayiselwa zikhati zi tako, xiva xikombiso xa pinzukelwa.

⁹ Lezaku legi i tiko gi hluwukileko, a vanana va mawunwa, a vanana lava va alako ku ingisa milayo ya Jehova. 2 Tih. 17:14; Neh. 9:16

¹⁰ Lava va nge ngalo ka vavumbi: Mu nga vumbi; ni ka vaprofeti, vaku: Mu nga hi profeteli zinene, hi byeleni a timhaka leti ti tsakisako, profeteni zahava;

¹¹ humani ndleleni, mu hambuka; susani a Wa ku Basa wa ka Israeli mahlweni ka hina!

¹² Hikwalaho a Wa ku Basa wa ka Israeli e ngalo: Kota lezi mu kanyisako a mhaka leyi, mu tsumba kutsimbeketa ni kubiha, mu namarela ka zona,

¹³ hikwalaho a kugoha loku ku tava na nwina khwatsi i khurisi gi tlakukileko gi nga ni tifa, legi gi khungumukako hi xitshuketi.

¹⁴ Gi ta khungumuka khwatsi i mbita ya wumba loku yi pswhandlaswa ha womu, leyi ku nga saliko ni xirengele lexi munhu a nga okako ha xona a nzilo, kutani a kukha ha xona mati le hlobyeni.

¹⁵ Hakuva Hosi Jehova, a Wa ku Basa wa ka Israeli e ngalo: Loku mu tlhela ni loku mu rutisa mu ta kuma kuhanyiswa; a ntamu wa nwina mu ta wu kuma kuruleni ni kutsumbeni; kanilezi mu alile.

¹⁶ Nwina mu te ngalo: Hina hi ta hlasela na hi khilele mahaxi! Hikwalaho mu ta hlaselwa. Muku ngalo: Hi ta khilela mahaxi ya mazambo! Hikwalaho mu ta hlongolwa hi lava va nga ni mazambo. 2 Tih. 25:4

¹⁷ A va khume ga mazana va ta tsutsuma na va chaviswa hi munhu munwe, ni loku mu chaviswa hi laʼva ntlhanu, mu ta tsutsuma kala muku khwatsi mu mhanze le hehla ka xitsunga, muku khwatsi mu nghapa laha mugangeni.

Zitsumhiso za Nungungulu.

¹⁸ Hikwalaho Jehova i ta rinzela, a kala a zi kota ku mu tsetselela; i ta kuliswa kasi a fela ku mu zwela wusiwana. Hakuva Jehova hi Nungungulu a lulamileko, va katekile vontlhe va mu rinzelako.

¹⁹ Hakuva wena tiko u akileko lomu Zioni ni Jerusalema, u nga ha rili! Loku u kanyuluka i ta ku tsetselela; loku azwa gezu ga wena i ta ku hlamula.

²⁰ Kunene, a Hosi yi ta mu nyika a zakuga za hlomulo, ni mati ya kuxaniseka, kanilezi a vagonzisi va nwina va nga ta ha fihlala, mu ta wona vagonzisi va nwina hi mahlo.

²¹ Loku u hambukela tlhelo ga xinene kutani tlhelo ga xibhabha, a tindleve ta wena ti tazwa a gezu lenzhako ka wena, giku: A ndlela hi leyi, famba ha yona.

²² Zonake mu ta nyenyezisa a siliva leyi yi nameketilweko zifananisweni za nwina, ni nzalama leyi yi nameketilweko zifananisweni mu ta yi hoxa kota zilo za chaka, muku: Suka!

²³ Zonake a timbewu ta nwina leti mu nga ti byala i ta ti nisela vula, ni zibaba zi humeswako hi pfuno wa masimu zi ta nanziha zi xurisa; a xikhatini lexo a mitlhambi ya nwina yi ta gela mikoveni ya hombe. Levi 26:4; Deut. 11:14; 28:12

²⁴ A tihomu ni timbongola leti ti rimako misava ti taga foliji gi Ringilweko hi munyu, legi gi heherilweko hi foloko ni lihlelo.

²⁵ Hehla ka zitsunga zontlhe zo leha ni ka minganga yontlhe yo tlakuka ku tava kona micongo ni micongwana ya mati lawa ma khulungako, hi siku ga kudawa ka hombe, laha a makhokhola ma ta ngawa. Ezek. 39:4, 17; Kuv. 19:17

²⁶ A nweti wu ta fanana ni kuwonekela ka gambo, ni kuwonekela ka gambo ku ta engetelwa hi ka ntlhanu ni kumbiri, kukotisa kuwonekela ka ntlhanu wa masiku ni mambiri, hi siku legi Jehova a ta nga bohelela a timbanga ta tiko gakwe, a holisa a timbirimbi ta kubiwa kabye.

A kuhlula ka Hosi.

²⁷ Langutani, a vito ga Jehova gata hi le kule, Gita hi nzilo wa zanga yakwe, ni marefu ya musi wo phuma; A milomu yakwe yi tele hi zanga, Ni lirimi lakwe li fanana ni nzilo wu hisako. Ekso. 24:17; 2 Sam. 22:9; Maheb. 12:29

²⁸ Ni kuhefemula kakwe ku khwatsi i congo wu hlatako, Wu kukumuka wu chikela nhanwini ya munhu, Kasi ku hehera mifumo hi lihlelo la lobyiselelo, A milonwini ya matiko i ta veka a matomu ma hambukisako.

²⁹ Nwina mu ta yimbelela lisimu lo fanana ni leli li yimbelelwako ni wusiku mubuzweni wa kubasa; A timbilu ta nwina ti ta tsaka khwatsi hi ta lava va bako maxava loku vaya xitsungeni xa Jehova, A Ribyeni ga Israeli.

³⁰ Zonake Jehova i ta zwakalisa a gezu gakwe ga wudumo, A kombisa lezaku gi bisa kuyini a woko gakwe zangeni yakwe, Hi nzilo wu lovisako, ni bhubhutsa, ni xipupuri ni vula ya maralala. Ekso. 9:23; Jox. 10:11

³¹ Hakuva Assiria i ta rurumela hi kota ya gezu ga Jehova, Loku a biwa hi nhonga yakwe.

³² A ka zontlhe zikhati lezi a nhonga ya Jehova yi ta nga vaba, A tingomana ni zitende zi ta vuma, Na Jehova i talwa navo hi woko gi tlakusilweko.

³³ Hakuva Tofeti kale na gi longisilwe, Ina, gi longiselwe hosi; I khele ga hombe go eta, Gi tele hi nzilo ni tihunyi to tala; Na gi dzivelwa hi kuhefemula ka Jehova ku fananako ni congo wa solufa. 2 Tih. 23:10; Jer. 7:31; Kuv. 19:20