Isaya 25 - Tshwa Bible

A kuhanyisa ka Jehova.

¹ Jehova, u Nungungulu wa mina; Nzi ta ku kulisa, nzi dumisa vito ga wena, Hakuva u mahile zilo zi hlamalisako; A makungo ya kale yo tsumbeka yo tiya.

² Hakuva a muti u wu mahile a nhulu ya maribye; A muti wa makhokhola u wu ma hile marumbi; A wuakelo ga vamatiko a ga hi muti, Cima gi nga ta ha vuxiwa.

³ Hikwalaho a vanhu va ntamu va ta ku dumisa, A muti wa vamatiko laʼvo tshisa wu ta ku chava.

⁴ Hakuva wena u wuchavelo ga zisiwana, U khokhola ga lava va vumalako kuxanisekeni kabye; U wuponelo hi siku ga bhubhutsa, ni nzhuti laha munwini, Laha a moya wa laʼvo tshisa wu khwatsi xipupuri xi bhubhutselako khurisi.

⁵ U miyetile a guwa ga vamatiko, Khwatsi hi mumu loku gambo gi pfhupeliswa tikweni ga xikhwakhwa; A Xizimba xa migiyo ya va tihanyi xi gumeswa ku fanana ni mumu loku wu pfhupeliswa hi refu.

⁶ A ka xitsunga lexi Jehova wa tiyimpi i ta mahela matiko wontihe a mubuzo, Mubuzo wa zilo zi nonileko, ni vinya gi hlutilweko, Zakuga za mafura ni mongo, ni vinya go bava gi minyilweko.

⁷ Xitsungeni lexi i ta hanzula a nguwo Leyi yi khubhunyetako matiko wontihe, Ni kumba lowu wu fenengetileko yontlhe mifumo.

⁸ I ta fuvisa kufa kala ku pinzuka; Hosi Nungungulu i ta hlanguta mihloti tinghoheni tontlhe; I ta susa tingana ta vanhu vakwe misaveni yontlhe, Hakuva Jehova i wulile lezo. 1 Kor. 15:26, 54; 2 Tim. 1:10; Kuv. 7:17

⁹ A ka siku lego va taku: Langutani, loyi hi yena Nungungulu wa hina; Hi mu tsumbile, i ta hi ponisa; Hi yena Jehova, loyi hi mu rinzeleko, A hi tsakeleni kuhanyisa kakwe!

¹⁰ Hakuva a canja ga Jehova gi ta tlhatekiwa hehla ka xitsunga lexi, Kanilezi Moabi i ta kanzihelelwa laha a nga kona, Khwatsi hi byanyi gi kanzihelwako nzhopeni ya wulongo.

¹¹ I ta nawuluta mawoko yakwe xikari ka yona, Ku fanana ni xihlambeli loku xi kari xi hlambela; A kutikulisa kakwe ku ta tsongahatiwa, Zinwe ni wutlhari ga mandla yakwe.

¹² Jehova i khungumule a khokhola ga wena ga makhurisi ma tlakukileko, I gi wisile lahasi tshurini.