Isaya 23 - Tshwa Bible

Xiprofeto xungetano na Tire.

¹ Tlhavani nkosi nwina mataru ya le Tarxixi, Hakuva gi hahlulwe, a ka ha hi na yindlu, a nga kona loyʼa enghenako; A mhaka leyi yi tivekisilwe yi sukela Kittimu. Jer. 47:4; Zak. 9:2

² Miyelani hi kuchava, nwina vaaki va le fungwini; A vamahungani va le Sidoni, lava va tsemakanyako bimbi va mu fumisile.

³ A matini ya hombe a mbewu ya Xihore, Ni lezi zi tshovelweko congweni wa Nilo zi wa hi bhinzu ga Tire; Gi wa hi ndale ya mifumo.

⁴ Zwana tingana, Sidoni, hakuva a khokhola ga bimbi gi wulile, giku: A nzi lunwangi, a nzi se ku pswala; A nzi wundlangi majaha, ge hambu ku wundla vanhwana.

⁵ Loku zi bikiwa le Gipite Va ta xaniseka hi kota ya hlokiselelo wa Tire.

⁶ Tlhatukani muya Tarxixi, tlhavani nkosi nwina vaaki va le fungwini!

⁷ Kasi a hi wona muti wa nwina wo saseka, wa kale ka matiko? Lowu a mikonzo ya wona yi nga wu yisa kule wu ya luvela kona?

⁸ Himani a nga boha xikungo xa ku vukela Tire, A mutlhateki wa zidlodlo: Loyi a vamahungani vakwe va nga hi tihosana, Ni vaxavisi vakwe va nga hi vadzunzekileko misaveni?

⁹ Hi Jehova wa tiyimpi a nga wula lezo, Lezaku a koramisa a matshanza wontihe ya wukosi; Ni ku tsongahata vontlhe va dzunzekileko va misava.

¹⁰ Khubhunyeta a tiko ga wena, nhwana Tarxixi, khwatsi hi congo wa Nilo, A ka ha hi na ntamu wu ku bohileko.

¹¹ I nawulutile a woko gakwe hehla ka bimbi, a tsekatsekisa mifumo, Jehova i nyikile zileletelo xungetano ni makhokhola ya Kanani, Lezaku ma khungumulwa.

¹² Aku: Cima u nga ta ha tsaka kambe, Wena mubulwa wu tsimbeketilweko, a nhwana Sidoni. Suka, u tlhatukela Kittimu, Leyo na konawu u nga tava na kurula.

¹³ Languta a tiko ga maKaldea! a vanhu a va ha hi kona. A maAssiria ma gi mahile a wuakelo ga zivanza za xiwula; va akile makhokhola ya gona, va khungumula ziluvelo za gona; yena i lo gi maha marumbi.

¹⁴ Tlhavani nkosi, nwina mataru ya Tarxixi, Hakuva a khokhola ga nwina gi hahlulwe.

¹⁵ A ka xikhati lexo Tire i ta rivaliwa 70 wa malembe, ku ringanisa a masiku ya hosi yinwe. Anzhako ka 70 wa malembe Tire i ta humelwa hi lezi zi yimbelelwako lomu ka lisimu la xibhayi, aku:

¹⁶ Teka xitende u tsenzeleka ni muti, Wena xibhayi nzi wena u nga rivelwe, Chulula wucenje, u yimba tisimu tinyingi. Kasi wa fela ku alakanyiwa.

¹⁷ Hakuva loku ku hunzile 70 wa malembe, Jehova i ta enzela Tire, wu ta engeta wu lava hakhelo ya wona, wu ta maha wuoswi ni matiko wontihe ya misava.

¹⁸ Kanilezi a bhinzu gakwe ni hakhelo yakwe zi ta basiselwa Jehova: zi nga ta vekiwa hambu ku hlengeletelwe wutshamu ginwe, hakuva a bhinzu gakwe gi ta lumba lava va akileko mahlweni ka Jehova, kasi vaga, va kuma kuambala ko enela.