Isaya 22 - Tshwa Bible

A xiprofeto xa nzelelo wa muwoniso.

¹ Zi lo yiniyini makunu, lezi a vanhu va wena vontlhe va kanzihako hehla ka tiyindlu?

² Wena muti lowu wu teleko hi tihuwa, A muti wa zolonga ni litsako; A vadelweko va wena a va dawangi hi tisupado, Hambu ku fela le yimpini.

³ A vafumeli va wena vontlhe va tsutsumile zinwe, Va khomilwe na va nga hi na mawura; Vontlhe lava va kumilweko ka wena va lo maha tiperesu, Ni lava va tsutsumileko kule. 2 Tih. 25:4; Jer. 39:4

⁴ Hikwalaho nzi nge ngalo: Mu nga nzi cuwuki, kasi nza tsikwila, Mu nga ti karati mu nzi chavelela hi kota ya kulobyiswa ka nhwana wa tiko ga mina.

⁵ Hakuva i siku ga hlomulo, a siku ga ku kanzihelelwa ni pfilupfilu, Legi gi rumelweko hi Hosi Jehova wa tiyimpi le nkoveni wa miwoniso; A ligingisi li khungumulwa, a nkosi wu ya chikela le xitsungeni.

⁶ Elami i rwele a kutsu, Na hi ni tikareta ta vavanuna ni vakhileli va mahaxi; Kira i hlomile xitlhangu.

⁷ A mikova ya wena yo saseka nguvu yi ta tala hi tikareta, A vakhileli va mahaxi va xaxamele le nyangweni.

⁸ Yena i khungumule a ligingisi la Juda; hi siku lego u cuwukele a matlharini ya lomu xiluvelweni xa le khwatini. 1 Tih. 7:2; 10:17

⁹ Mu wonile lezaku a zipoxa za muti wa Davida zinyingi; mu biyele a mati ya tiva ga lahasi.

¹⁰ Mu hlayile a tiyindlu ta Jerusalema, mu khungumule tiyindlu kasi ku tiyisa ligingisi hi maribye ya tona.

¹¹ Mu kelile rinzi xikari ka tigingisi timbiri mu hlengeletela a mati ya tiva ga kale, kanilezi a mu langutelangi ka Mumahi wa gona, hambu ku khatalela loyi a nga gi wumba kaleloko.

¹² A ka siku lego Jehova wa tiyimpi i mu vitanele xirilo ni nkosi, ni ku halula tihloko ta nwina, mu ambala zilenda.

¹³ Kanilezi nwina mu lo maha migiyo ya litsako, mu lo tlhava tikavi ni tiyivu; ku giwa tinyama, ku nwiwa vinya, muku: A hi geni, hinwa, hakuva manziko hi tafa!

¹⁴ Jehova wa tiyimpi i nzi hlevele, aku: Hakunene, mu nga ta tsetselelwa loku kugoha kala mufa, ku wula Hosi Jehova wa tiyimpi.

Xeba na Eliakimu.

¹⁵ Hosi Jehova wa tiyimpi i wulile, aku: Suka, uya ka Xebna, a muhlayisi wa titshomba, loyi a hlayisako yindlu ya wukosi, uku:

¹⁶ U maha yini laha? himani u nga naye laha, lezi u ti mahelako a xilahla? U kehla a tshiza laha xitsungeni, u ti mahela wutshamu laha ribyeni!

¹⁷ Languta, Jehova i ta ku hoxa kule, khwatsi hi munhu a nga ni ntamu, i ta ku phutsela;

¹⁸ i ta ku hoxa u wumbulukela kukotisa a bhola tikweni gi anamileko; u ta fela laho, ni tikareta ta wena to saseka ti ta gumelwa kwalaho, wena u nga tingana ta yindlu ya hosi ya wena.

¹⁹ Nzi ta ku susa xikhundleni xa wena, u Suswa ntirweni wa wena.

²⁰ A ka siku lego nzi ta vitana a nanza ga mina Eliakimu, nʼwana Hilkia; 2 Tih. 18:18

²¹ nzi ta mu ambexa a nguwo ya wena, nzi mu tiyiseta hi likalu la wena, nzi ta veka kufuma ka wena canjeni gakwe. Yena i tava dadani ka vaaki va Jerusalema ni ka yindlu ya ka Juda.

²² Nzi ta mu nyika a pfhungulo ya yindlu ya ka Davida; i ta vulula, ku nga vali munhu; i ta vala, ku nga vululi munhu. Kuv. 3:7

²³ Nzi ta mu zimeka ku fanana ni phanze wutshanwini gi tiyileko; i tava xitshamu a ka yindlu ya raru wakwe.

²⁴ Va ta hayeka ka yena a wukulu gontlhe ga yindlu ya raru wakwe, ni vazukulu vakwe; a zimbitana zontlhe, kusukela ka tikopo kala ka minzheko;

²⁵ a ka siku lego, ku wula Jehova wa tiyimpi, a phanze legi gi zimekilweko wutshanwini go tiya, gi ta kunulwa giwa; ni zontlhe lezi zi nga hi hehla ka gona zi ta lobyiswa, hakuva Jehova i wulile lezo.