Isaya 21 - Tshwa Bible

Xiprofeto xungetano na Babuloni.

¹ A xiprofeto xungetano ni xiwula xa bimbi. Khwatsi xipupuri xi hunzako le Dzongeni, Zinghaho wata hi le xiwuleni, a tikweni ga ku tshisa.

² Nzi wonisilwe a muwoniso wo tshisa nguvu; A mukanganyisi wa kanganyisa, ni muphangi wa phanga. Kanziha, O Elami; vimbezela, O Media; Nzi miyetile a miketo yontlhe.

³ Hikwalaho a xiwunu xa mina xa bayisa; A kubayiseka ku nzi khomile khwatsi hi kubayiseka ka wasati a lunwako. Nza xaniseka laha kaku a nzi zi koti ku ingisa, Ni ku dzukiswa laha kaku a nzi zi koti ku wona.

⁴ A mbilu ya mina ya gavatana, nzi rurumela hi kuchava; A wusiku legi nzi nga gi navela, gi hunzukile gi tshisa.

⁵ Va longisa meza, va andlala masango, vaga, vanwa; Sukani mu yima, nwina tihosana, mu tota zitlhangu.

⁶ Hakuva a Hosi yi nzi byelile, yiku: Famba, u ya veka murinzeli; I ta wula lezi a zi wonako.

⁷ Loku a wona a muboko ni vakhileli va mahaxi va fambako hi mipatswa, A muboko wa timbongola ni muboko wa makameli, I fanele ku ingisela, a cuwukisisa nguvu.

⁸ Zonake i lo kanyuluka khwatsi i nghala, aku: Hosi, nzi yimile laha tshaleni gontlhe siku, Nzi lavelela laha wusiku ginwani ni ginwani.

⁹ Hi nga wona, wata muboko wa vavanuna, ni mipatswa ya vakhileli va mahaxi. A engeta, aku: Gi wile, a Babuloni gi wile; Zontlhe zifananiso za vanungungulu va gona zi khungumulelwa. Jer. 51:8; Kuv. 14:8; 18:2

¹⁰ Yowe tiko ganga, u hulilweko liranzabyeni ku fanana ni mavele; Lezi nzi zi zwileko ka Jehova wa tiyimpi, a Nungungulu wa Israeli, Nzi zi tlhatlhambutele ka nwina.

Xiprofeto xungetano na Duma.

¹¹ Va kanyuluka ka mina hi le Seire, vaku: Murinzeli, yoyini ya wusiku? Murinzeli, yoyini ya wusiku?

¹² A murinzeli a hlamula, aku: A wuronga gata, ni wusiku kambe. Loku mu lava ku wutisa, wutisani; Tlhelani muta. Xiprofeto xungetano ni Arabia.

¹³ Mu ta gova le khwatini ga Arabia, Nwina vaenzi va le Dedani.

¹⁴ Nehani mati ka yena loyi a nga ni tora, Nwina vaaki va le Tema, tlhangavetani lava va tsutsumako, mu va phamela zakuga.

¹⁵ Hakuva va lo tsutsuma va chava tisupado, A tisupado ti hlomulweko, ni mawura ma kondlilweko, Ni nyenganyenga ya yimpi.

¹⁶ Hakuva a Hosi yi te ngalo ka mina: Ka ha sele lembe ginwe, legi gi fananako ni lembe ga xitiri, zonake gontlhe wukulu ga Kedare gi ta mbhela;

¹⁷ ni misalela ya vamawura va tinhenha xikari ka vana va Kedare yi tava yitsongwani. Hakuva Jehova a Nungungulu wa Israeli i wulile lezo.