Isaya 17 - Tshwa Bible

Xiprofeto xungetano ni Damasku.

¹ Langutani, Damasku a nga ha ta kuva muti, Kanilezi i tava nhulu ya marumbi. Jer. 49:23; Am. 1:3

² A miti ya Aroera yi tsikilwe, Yi tava wuriselo ga mitlhambi, Leyi yi ta nga zumba kona, yi nga chaviswi hi nchumu.

³ A khokhola gi ta susiwa ka Efraime, Ni wuhosi le Damasku ni misalela ya Siria; Zi ta fanana ni wukulu ga vana va ka Israeli, ku wula Jehova wa tiyimpi.

⁴ A masiku lawo a wukulu ga Jakobe gi ta hungulwa, Ni kukuluka ka miri wakwe ku ta wonza.

⁵ Ku ta fanana ni loku a mutshoveli a hlengeletela mavele, A tshovela a zipupu hi canja gakwe; Ku taku khwatsi hi loku ku kutsulwa zipupu lomu nkoveni wa Refaime.

⁶ Kasike a misalela yi tava kona khwatsi hi ku jujiwa ka sinya ya oliva, A mihanzu mimbiri kutani minharu ya sala ka ravi gi tlakukileko nguvu, Hambu mune kutani ntlhanu lomu maravini ma chelileko nguvu, Ku wula Jehova, Nungungulu wa ka Israeli.

⁷ A ka siku lego a vanhu va ta cuwuka ka Mumahi wabye, Ni mahlo yabye ma ta khatalela loyi wa ku Basa wa ka Israeli.

⁸ Va nga ta cuwuka maganzelweni lawa ma mahilweko hi mandla yabye; Ge, hambu ku khatalela a mitiro ya titiho tabye, A zifananiso za Axtarte kutani za gambo.

⁹ A ka siku lego a makhokhola yabye ma ta fanana ni marumbi ma nga lomu khwatini, ni lomu hehla ka zitsunga, lawa ma tsikilweko laha a vana va Israeli va nga enghena, ku tava xiwula.

¹⁰ Hakuva u tsikile Nungungulu wa kuhanyiswa ka wena, A ku alakanyangi a ribye ga khokhola ga wena, Hikwalaho u ta rima a masimu ya zibyalo zo saseka, U sima kona a zibyalo za le matikweni.

¹¹ Kunene, a siku legi u zi byalako zi hatla zi kula, Ni mixo a timbewu ta wena ti pfepfa; Kanilezi a kutshovela ku nyamalala hi siku ga hlomulo ni kubayiseka ka hombe.

¹² Yowe, a kudzuma ka matiko laʼmanyingi, Lawa ma mabako guwa khwatsi i guwa ga mabimbi. A kuvuma ka matiko, ma vumako khwatsi i guwa ga mati yo tala.

¹³ A mifumo yi ta maha guwa khwatsi i guwa ga mati manyingi. Kanilezi Nungungulu i ta yi kawuka, yi tsutsumela kule; Yi ta hangalaswa yiku khwatsi i mungu wa zitsunga wu hangalaswako hi mheho. Kukotisa tsutsungwani mahlweni ka bhubhutsa.

¹⁴ Ni laha gambyeni ku tava ni chavo. Hi mahlweni ka kutsuwuka ka gambo a ya ha hi kona! Lexo hi xiavelo xa vona lava va hi phangako, Ni tshomba ya lava va hi hlaselako. 2 Tih. 19:35; Isa. 37:36