Isaya 16 - Tshwa Bible

¹ Rumelani a tiyivu ta nzuvo ka mufumeli wa tiko, Ti suka le Sela ngomama ni xiwula, Tiya xitsungeni xa nhwana wa le Zioni.

² Hakuva a vanhwana va le Moabi vata mapelweni ya le Amoni, Vaku khwatsi zinyanyani zi ha-ngalakako, Ni mavinyani ma humesilweko zisakeni.

³ Vaku: Hihe wusungukati, tshanza nongameto; Maha nzhuti wa wena wuku khwatsi munyama laha hlikanhini; Fihla vahlongolweko, u nga nyikeli lava va tsutsumako.

⁴ A vahlongolweko va le Moabi a va luvele ka wena, Uva wuchavelo gabye nghoheni ya muhlaseli. Haxuva a muxanisi i ta gumelwa, a kuphanga ku ta fuva, Ni vatsimbeketi va ta suka lomu tikweni.

⁵ Zonake a xitshamu xa wuhosi xa wena xi ta tiyiswa hi wumbilu; Hehla ka xona ku ta tshama mulamuli lomu tabernakelini ga Davida, Loyi a ta nga tshanza nongameto, a hatlisako ku maha kululama. Jer. 23:5; 33:15

⁶ Hi zwile hi matshanza ya Moabi, lezaku i na ni matshanza nguvu; A kutikulisa kakwe, ni xikaha xakwe, ni zanga: A kutikukumuxa kakwe ka mahala.

⁷ Hikwalaho Moabi i ta rilela Moabi, vontlhe va ta rila; A zikeketselo za mauva za Kir-haresete mu ta zi rilela, Mu xaniseka nguvu.

⁸ Hakuva a masimu ya le Hexboni ni zivina za le Sibna zi chomile, Lezi a mihanzu ya zona yi nga wisile a tihosi ta vamatiko, Lezi zi nga wa chikela le Jazera, ni le xiwuleni, Ni maravi ya kona ma navileko kala tlhatuko wa bimbi.

⁹ Hikwalaho zinwe na Jazera nzi ta rilela a xivina xa le Sibna; Nzi ta ku tsakamisa hi mihloti ya mina, wena Hexboni na Eleale; Hakuva a huwa ya mutshoveli yi wele hehla ka mihanzu ya wena ya ximumu ni kutshovela ka wena.

¹⁰ A litsako ni kubhuma zi susilwe masinwini ma nonileko, Lomu zivineni a ku na tisimu ni guwa ga litsako. A vakami va nga ta ha kamela vinya lomu zigowolweni, Nzi miyetile a guwa gabye ga ku elula.

¹¹ Lomu nzeni ka mina ka kowutana kota xitende hi kota ya Moabi, Ni mbilu ya mina hi kota ya Kir-harese.

¹² Hambu lezo Moabi a ti karatako wutshanwini gi tlakukileko, A enghena tempeleni yakwe ku ya kombela, Cima a nga ta kuma nchumu.

¹³ Leyi hi mhaka yi nga sina yi wulilwe hi Jehova xungetano na Moabi,

¹⁴ Kanilezi makunu Jehova i wulile aku: Ku ta hunza malembe manharu ma fananako ni malembe ya xitiri, zonake a wukulu ga Moabi ni xidlemo xakwe xa hombe zi ta tsongahatiwa; ni misalela ya kona yi tava yitsongwani, yi nga ha khatalwi.