Isaya 10 - Tshwa Bible

¹ Khombo ka vona lava va yimisako milayo yi nga lulamangiko, Lava va tsalako mapapilo yo tsimbeketa;

² Kasi ku onha a mhaka ya lava va vumalako, Va yivela a zisiwana za tiko ga mina, Lezaku a tinoni tiva pfimba wabye, Va wutlela lava va felweko hi vapswali.

³ Mu ta maha yini hi siku ga tsayiselelo, Laha a bhubhutsa gi tako hi le kule? Mu ta chavela ka mani kasi ku vuniwa ke? A titshomba ta nwina mu ta ti veka kwihi?

⁴ Mu ta zi kota ku korama xikari ka tiperesu ntsena, Hambu kuwa lahasi ka zirumbi za va delweko. Hambu lezo, a zanga yakwe a yi rengangi, Ni canja gakwe ga ha nawulukile.

Nungungulu a lamula maAssiria.

⁵ Khombo ka Assiria, a limhika la zanga ya mina! Loyi a welelako khulo ga mina khwatsi i nhonga.

⁶ Nza mu ruma a ku yalwa ni tiko gi bihileko, Nzi mu leletele a ku ya vukela a vanhu lava nzi va zangareleko, A ku va phanga ni ku wutla zilo zabye, Ni ku va kanzihelele khwatsi hi nzhope ya lomu maphangweni.

⁷ Ahemba, yena a nga sungwi hi lezo, A mbilwini yakwe a nga alakanyi lezo; Kanilezi a mbilu yakwe yi xuva ku lovisa, Ni ku hihirita matiko ya ku tala.

⁸ Hakuva i ngalo: A tinduna tontlhe ta mina a hi tihosi ke?

⁹ Kasi a ku mahekangi ka Kalno khwatsi hi Karkemixe ke? Hamate a nge khwatsi hi Arpade ke? Samaria a gi khwatsi hi Damaseku ke?

¹⁰ Khwatsi hilezi a canja ga mina gi tekileko a mifumo ya zifananiso, Lezi zi hunzako a zifananiso za Jerusalema ni Samaria,

¹¹ Nzi nga ta zi kota ku maha ka Jerusalema ni zifananiso za gona, Khwatsi hilezi nzi nga maha ka Samaria ni zifananiso za gona ke?

¹² Kanilezi loku a Hosi yi mahile wontihe ntiro wa yona hehla ka xitsunga xa Zioni ni le Jerusalema, nzi ta tsayisa a hosi ya le Assiria hi kota ya kutikulisa ka mbilu ya yona, ni matshanza ya mahlo ya yona, 2 Tih. 19:35

¹³ Hakuva yi ngalo: Nzi mahile lezo hi ntamu wa canja ga mina Ni wutlhari ga mina, hakuva nzi na ni kupima. Nzi susile mimbhingano ya matiko, Nzi wutlile mabako ya wona, Khwatsi hi nhenha nzi wisile hasi lava va nga hi zitshanwini za wuhosi.

¹⁴ A canja ga mina gi thumbile a titshomba ta matiko khwatsi hi loku ku thumbiwa zisaka, Nzi wungeletela a misava yontlhe Ko fana ni ku wungeletela a manza ma tsikilweko; Ku wa nga hi kona ni munwe a nga tshambuluta tipapa, Kutani ku vulula nomu, kutani ku keta.

¹⁵ A xihloka xi nga ti dzunza ka loyi a tsemako ha xona ke? Ni saho gi nga ti kulisa ka loyi a sahako ha gona ke? A ku khwatsi hi loku a nhonga yi wa ta tsekatsekisa a woko ga loyi a yi tlakusako, Ni loku a xigomba xi wa ta tlakusa loyi a nga hiko sinya!

¹⁶ Hikwalaho Hosi Jehova wa tiyimpi I ta wonzisa a vakulukileko va Assiria; Lahasi ka wukulu ga gona ku ta vura kukotisa a kuvura ka nzilo.

¹⁷ A kuwonekela ka Israeli ku ta hunzuka ku maha nzilo, Ni Wa ku Basa wakwe i ta maha langavi, Gi ta vura gi hisa a mizwa ni zigetlwani zakwe hi siku ginwe.

¹⁸ I ta fuvisa a wukosi ga khwati ga yena, ni ga masimu yakwe, Ku mbela muhefemulo ni miri; Ku taku khwatsi hi loku a mubabyi afa hi ku mbhela ntamu,

¹⁹ A tisinya leti ti salako khwatini gakwe ti tava titsongwani, Lezaku ni xihlangi xi ta zi tiva ku tsala a ntsengo wa tona.

²⁰ A xikhatini lexo a misalela ya va ka Israeli, Ni lava va ponileko va yindlu ya ka Jakobe, Va nga ta ha khigela ka loyi a va bileko; Kanilezi va ta tsumba Jehova, Loyi a Basileko wa ka Israeli.

²¹ A misalela yi ta hunzuluka, A misalela ya Jakobe yi ta tlhelela ka Nungungulu wa ntamu.

²² Hakuva hambu loku a vanhu va wena, Israeli, Va ku khwatsi i seke ga bimbi, Misalela yabye ntsena yi ta nga wuya. A kulobyiswa ku tiyisilwe, ku tele hi kululama.

²³ Ni kulobyiswa loku ku tiyisilweko hi Hosi Jehova wa tiyimpi, Ku ta mahiwa misaveni yontlhe.

²⁴ Hikwalaho, a Hosi, Jehova wa tiyimpi, e ngalo: Nwina vanhu va mina mu akileko le Zioni, mu nga chavi Assiria; hambu loku a kuba hi nhonga, ni ku tlakusa a xigomba xakwe ka wena, kota lezi ku nga mahiwa le Gipite.

²⁵ Hakuva ku tava xikhatanyana a tsayiselelo yi ta hunza, ni zanga ya mina yi ta va lovisa.

²⁶ Jehova wa tiyimpi i ta tlakusa a limhika lakwe hehla kabye, khwatsi hi lezi a nga maha le Midiani, le ribyeni ga Orebi; kota lezi a nga tlakusa a nhonga yakwe hehla ka bimbi, i ta yi tlakusa kambe kota lezi a nga zi maha le Gipite. Ekso. 7:19; Vala. 7:25

²⁷ A ka xikhati lexo a nzwhalo wa yena wu ta susiwa makatleni ya wena, ni muyoka wakwe wu ta susiwa nhanwini ya wena, hakuva muyoka wu ta tshoveka hi kota ya kutotiwa.

²⁸ I tile le Ayate, a tsemakanya le Migrone; Le Mikmaxe i siyile zibya zakwe.

²⁹ Va hunzile nzhelelweni xikari ka zitsunga, Ni wusiku va govela le Geba. Rama wa chava, ni Gibea wa Saule i tsutsumile.

³⁰ Kwanguluka, wena nhwana wa Galima, Ti wonele wena Laixa! Yowe, Anatote!

³¹ Madmena wa hangalaka; ni vaaki va le Gebima va hlengeleta zibya zabye.

³² Hi siku gwalegi i ta chikela le Nobe, A kombisa xibhakela ka Nhwana wa Zioni, ni ka xitsunga xa Jerusalema.

³³ Languta, a Hosi, Jehova wa tiyimpi, I ta dungurula a maravi hi kutsisa, A tisinya to leha ti kingiwa, Ni leti to tlakuka ti wisiwa hasi.

³⁴ I ta tsema hi xiketse a khwati gi khwelileko, Lebanoni i ta wiswa hi loyi wa ntamu.