Hosea 6 - Tshwa Bible

Va vitanwa kuhunzulukeni.

¹ Tanani hi tlhelela ka Jehova; hi yena a hi hanzuleko, i ta hi chuma; hi yena a hi lamatileko, i ta bohelela a timbanga ta hina. Deut. 32:39; 1 Sam. 2:6

² Anzhako ka masiku mambiri i ta hi hanyisa; hi siku ga manharu i ta hi vuxa, hi hanya mahlweni kakwe.

³ A hi tiveni Jehova, a hi hatliseni ku mu tiva. A kuhuma kakwe ku tiyile ku khwatsi wuronga; i tata ka hina khwatsi i vula, kukotisa a vula ya xirimo leyi yi tsakamisako misava.

⁴ Efraime, nzi ta maha yini ka wena? Juda, nzi ta maha yini ka wena? Hakuva a liranzo la nwina li khwatsi i hunguva ya mixo, ni nzhokati leyi yi tlhatlhekako hi kuhatlisa.

⁵ Hikwalaho nzi va tlhavile hi vaprofeti, nzi va dele hi timhaka ta nomu wa mina; a kulamula ka mina ku khwatsi kuwonekela loku ku humako.

⁶ Hakuva nzi ranza wuxinji, a nzi ranzi miphahlelo; ni ku tiva Nungungulu ka hunza a minyikelo ya kuhiswa. 1 Sam. 15:22; Mat. 9:13; 12:7

⁷ Kanilezi va tshovile a xivumelwano khwatsi hi Adamu; va nzi kanganyisile kwalaho.

⁸ Gileade i muti wa vona lava va mahako kubiha, wu chakisilwe hi nkhata.

⁹ Khwatsi mitlhawa ya vaphangi lawa ma xiyako vanhu, hilezo a xidlemo xa vapristi va daya vanhu lomu ndleleni yi yako Xekemi; ina, va maha wugevenga.

¹⁰ Ndlwini ya ka Israeli nzi wonile zilo zo tshisa: Efraime i maha wubhayi lomo, Israeli a ti nyenyezisa. 1 Tih. 12:28; 2 Tih. 17:7

¹¹ Na wenawu Juda, u yimiselwe a xikhati xa kutshovela, laha nzi ta nga tlhelisa a vanhu va mina hi le wukhumbini.