Hosea 5 - Tshwa Bible

A zihambunyeto za Israeli.

¹ Zwanani a mhaka leyi nwina vapristi, ingisani nwina va yindlu ya ka Israeli, mu kangatela ndleve nwina va yindlu ya hosi, hakuva a lamulelo lowu ngwa nwina; hakuva nwina mu ti mahile a ziyo le Mizpa ni likoka li anekilweko hehla ka Tabora. 1 Tih. 12:32

² A vahluwuki va yile mahlweni kutlhabyeni kabye, kanilezi mina nzi ta kawuka vona vontlhe.

³ Nza mu tiva Efraime, na Israeli a nga nzi fihlalelangi; hakuva wa bhaya ni lezi wena Efraime, na Israeli i ti nyenyezisile.

⁴ A va zi koti ku tlhelela ka Nungungulu wabye hi kota ya zimaho zabye; hakuva a moya wa wubhayi wu lomu nzeni kabye, Jehova a va mu tivi.

⁵ A matshanza ya Israeli ma kustumunya ma mu vukela; hikwalaho Israeli na Efraime va ta khunguvanyeka zigohweni zabye; Juda kambe i ta khunguvanyeka navo.

⁶ Va ta hlota Jehova ni mitlhambi yabye ya tiyivu ni ya tihomu, kanilezi va nga ta mu kuma; i humele xikari kabye.

⁷ A va tsumbekangi ka Jehova, hakuva va belekile a vanana va wubhayi. A hweti leyi ya yiswa yi ta va lovisa zinwe ni ziavelo zabye.

⁸ Banani a khombela le Gibea, muba mpunzu le Rama; kanyulukani le Betavene, a nala wata Benjamini!

⁹ Efraime i ta maha marumbi hi siku ga kutsayiswa; nzi tivisile a tixaka ta ka Israeli a zinene za lezi zi ta ngata.

¹⁰ A tihosana ta ka Juda ti khwatsi hi lava va tlulako a mimbhingano; nzi ta chulula a zanga ya mina hehla ka vona kota mati. Deut. 19:14; 27:17

¹¹ Efraime i tsimbeketilwe, i tshovekile kulamuleni; hakuva i wa lanzela a zileletelo lezi zi mu tsakisako.

¹² Hikwalaho a ka Efraime nzi ku khwatsi nzi sumba, a ka yindlu ya Juda nzi ku khwatsi nzi kubola ka marambu.

¹³ Laha Efraime a nga wona wubabyi gakwe, ni laha Juda a nga wona xilonza xakwe, zonake Efraime i loya le Assiria, a ya rumela ka hosi Jareba. Kanilezi na yenawu a nga zi koti ku mu chuma, a nga zi koti ku holisa xilonza xa wena. 2 Tih. 15:19; 16:7

¹⁴ Hakuva ka Efraime nzi ta fanana ni nghala, nzi fanana ni xinghalana a ka yindlu ya ka Juda. Mina wutsumbu nzi ta hanzula nzi ti fambela; nzi ta rwala a pfimba, ku nga hi kona a to nzi wutlela wona.

¹⁵ Nzi ta tlhela nzi ya tshama wutshanweni ga mina, kala va wulela zionho zabye, va hlota a nghohe ya mina. Hlomulweni wabye va ta nzi hlotisisa.