Hosea 4 - Tshwa Bible

Nungungulu a holovisana ni va ka Israeli.

¹ Zwanani a mhaka ya Jehova, nwina vanana va ka Israeli, hakuva Jehova wa kecara a vaaki va tiko, hakuva lomu tikweni a ku na zinene, a ku na wuxinji, ge hambu ku tiva Nungungulu.

² Ku kona ntsena ku hlambanya mawunwa, ni kukhohlisa, ni kudaya, ni wukamba, ni wubhayi; va tira hi tihanyi, ku halatwa nkhata.

³ Hikwalaho a tiko ga rila, ni vontlhe va akileko ka gona va hlokiswa zinwe ni zihari za khwati ni tinyanyani ta tilo; ni zona zidluwani za bimbi za lova. Jer. 12:4; Zef. 1:3

⁴ Ngha ku ngavi ni munwe a kanetako, ge hambu loyi a kawukako; hakuva a vanhu va wena vo khwatsi hi lava va kanetisanako ni mupristi.

⁵ U ta khunguvanyeka ni hlikanhi, ni muprofeti i ta wawu na wena ni wusiku; nzi ta lovisa ni nyine wa wena.

⁶ A vanhu va mina va lova hi kota yo vumala wutivi. Hilezi u alako wutivi minawu nzi ta ku ala, kasi u nga have mupristi wa mina. Lezi u riveleko a nayo wa Nungungulu, minawu nzi ta rivala a vanana va wena.

⁷ Laha va nga anza vawa nzi onhela; nzi ta hunzula wudumo gabye giva tingana.

⁸ Vaga a zionho za tiko ga mina, va navela a zigoho za gona.

⁹ Hikwalaho a mupristi i ta humelela hi ndlela yinwe ni vanhu; nzi ta va tsayisa hi kota ya mahanyela yabye, nzi va chachazela a zimaho zabye.

¹⁰ Vataga, kanilezi va nga ta xura; va ta bhaya kanilezi va nga ta enzeleka, hakuva va tsikile ku ingisa Jehova. Levi 26:26; Hag. 1:8

¹¹ A wubhayi, ni vinya, ni byala zi daya a kupima.

¹² A vanhu va mina va kombela wusungukati ka timhinga tabye, a nhonga yabye yi va tlhatlhambutela; hakuva a moya wa wubhayi wu va pengisile, va bhayile va tsika Nungungulu wabye.

¹³ Va phahlela hehla ka zitsunga, va hisa libani lomu migangeni, ni lahasi ka mikuhlu ni mapoplari ni mikanyi, hakuva a minzhuti ya zona yi nene. Hikwalaho a vanhanyana va nwina va bhaya, ni vakatamwane va nwina va maha wuoswi.

¹⁴ Nzi nga ta tsayisa a vanhanyana va nwina loku va bhaya, ge hambu a vakatamwane va nwina loku va maha wuoswi, hakuva ni vavanuna va kona va famba hi tlhelo ni zibhayi, va phahlela zinwe ni vavasati vo biha. Lezo a tiko gi nga hiko na kupima giya kuloveni.

¹⁵ Loku wena Israeli u maha wubhayi, Juda ngha a nga ti kokeli nanzu. Mu ngati le Gilgale, mu ngayi le Betavene, ge hambu ku hlambanya, muku: Ha Jehova a hanyako! Deut. 6:13; 1 Tih. 12:29; Am. 5:5

¹⁶ Hakuva Israeli i na ni kanu khwatsi i thokazi ka xitlalu; makunu Jehova i ta va risa khwatsi i tiyivana wutshanwini gi anamileko.

¹⁷ Efraime i ti nyiketele zifananisweni; mu tsikeni.

¹⁸ Loku va hetile kunwa va ti nyiketela wubhayini; a vafumeli vabye va ranza zilo za tingana.

¹⁹ A xipupuri xi ta va songela lomu tipapeni ta xona; va tava ni tingana hi kota ya miphahlelo yabye.