Hosea 13 - Tshwa Bible

Nungungulu hi yena yece a nga muvuneteli wa Israeli.

¹ Laha Efraime a nga wulawula a kuchava ku wa hi kona. I ti tlakusile lomu tikweni ga Israeli, kanilezi laha a nga ti rwexa nanzu ha Baali, i lofa.

² Makunu va simamisa ku onha, va ti mahela a zifananiso zi chululweko hi siliva yabye, zi nga zifananiso za vanungungulu va kupima kabye; zontlhe lezi hi mitiro ya vafuli. Va wulawula ha zona, vaku: Lava va phahlelako ngha va pswopswa marole.

³ Hikwalaho va ta kota a hunguva ya mixo, ni nzhokati leʼyi tlhatlhekako hi kuhatlisa, vaku khwatsi i mungu wu kukuletwako hi xipupuri lomu wuhulelweni, ni kukotisa i musi wu humako hi lomu chimeleni.

⁴ Kasike mina nzi Jehova a Nungungulu wa wena kusukela kuhumeni ka wena a tikweni ga Gipite; u nga ta tiva munwani nungungulu ahandle ka mina, ahandle ka mina a ku na muhanyisi.

⁵ Nzi ku tivile lomu xiwuleni, a tikweni gi womileko.

⁶ Va xurile wuriselweni gabye; loku va xurile a timbilu tabye ti lo kukumuka, va nzi rivala. Deut. 8:12; 32:15

⁷ Hikwalaho a ka vona nzi khwatsi nzi nghala; nzi ta va xiyelela lomu tindleleni khwatsi nzi yingwe.

⁸ Nzi ta wela hehla kabye khwatsi nzi urso gi tekelweko a vana va gona, nzi hanzula a pambani wa timbilu tabye; nzi va khadamula laho kukotisa nghala; a zivanza zi ta va hanzula. 2 Sam. 17:8; Jer. 5:6

⁹ A kulobyiswa ka wena Israeli, kuta hilezi u nzi vukeleko, mina loyi nzi nga muvuni wa wena.

¹⁰ Yi kwihi a hosi ya wena, leyi yi faneleko ku ku ponisa mitini ya wena yontlhe? Ni Valamuli va wena lava u ngaku kabye: Nzihe a hosi ni tihosana, va kwihi ke?

¹¹ Nzi ku nyikile a hosi zangeni ya mina, nzi ta yi susa hi khulo ga mina.

¹² A xigoho xa Efraime xi hlengeletelwe, a xionho xakwe xi hlayisiwa.

¹³ A kubayiseka ka wasati a lunwako ku ta wela hehla kakwe. Yena i nʼwana loyi a nga xipumbu, hakuva a nga humi kubelekiweni hi xikhati xa kona. 2 Tih. 19:3; Isa. 37:3

¹⁴ Nzi ta va tirula ntanwini wa Xeoli, nzi va tlhatlhisa kufeni. Kufa, yi kwihi mitungu ya wena ke? Xeole, ku kwihi kulovisa ka wena ke? A nzi na kuhunzuluka kupimeni ka mina.

¹⁵ Hambu loku Efraime a pswala mihanzu xikari ka vanakulobye, ku tata a mheho ya Mutsuwuka-gambo, yi nga mheho ya Jehova yi tako hi le xiwuleni; a hlowo yakwe yi ta woma, ni xibuka xakwe xi tapswha. Ku ta phangiwa a tshomba yontlhe ya zibya za lisima.

¹⁶ Samaria i ta tsayiswa hikuva a vukeleko a Nungungulu wakwe. Va ta dawa hi supado; a zihlangana zabye zi ta pswhandlaselwa, ni vavasati vabye lava va nga ni tinyimba va ta hanzulelwa.