Hosea 12 - Tshwa Bible

¹ Efraime wa risa mheho, a lanzela mheho ya Mutsuwuka-gambo. Wa ha simamisa ku anzisa mawunwa ni lobyiselelo; va maha xivumelwano na Assiria, va rwala a mafura maya Gipite.

² Jehova wa holova na Juda, i ta tsayisa Jakobe maringano ni tindlela takwe, a mu chachazela maringano zimaho zakwe.

³ I khomile nakulobye hi xirenze na hi rumbyini ga nyine; ni laha a nga wahombe i lo pfinyana na Nungungulu. Gen. 25:26; 32:24

⁴ I lwile ni ngelosi a yi hlula, na a kari a rila a yi khongela. I lo mu kuma le Beteli, i lo wulawula na hina laho.

⁵ Jehova i Nungungulu wa tiyimpi, Jehova hi gona a vito gakwe.

⁶ Hikwalaho tlhelela ka Nungungulu wa wena, uva ni wuxinji ni kululama, u langutela Nungungulu wontihe masiku.

⁷ Kanani i na ni xikalu xa kukhohlisa mandleni yakwe, wa ranza ku kalavela.

⁸ Efraime i te ngalo: Kunene, nzi fumile, nzi ti kumele kufuma. A mitirweni ya mina va nga ta kuma nanzu ka mina hambu ni xionho. Kuv. 3:17

⁹ Kanilezi mina nzi Jehova a Nungungulu wa wena kusukela kuhumeni ka wena a tikweni ga Gipite; nzi ta ku maha u tshama kambe lomu matendeni a ku khwatsi hi masikwini ya ximuse.

¹⁰ Nzi wulawulile ni vaprofeti, nzi anzisa a miwoniso; hi ntiro wa vaprofeti nzi wulawulile hi mifananiso.

¹¹ Le Gileade va gohile, va mahile zahava; le Gilgale va phahlela hi tinkuzi. A maalati yabye ma ta maha tinhulu ta maribye lomu masinwini.

¹² Jakobe i chavele tikweni ga Arama; Israeli i tirele a sati, a risa mitlhambi kasi ku kuma sati. Gen. 27:43; 28:5

¹³ Hi muprofeti Jehova i humesile Israeli le Gipite, a vanhu va wa tsayisiwa hi muprofeti. Ekso. 12:37

¹⁴ Efraime i zangarisile nguvu Jehova; hikwalaho a milanzu yakwe ya nkhata yi tava hehla kakwe, a Hosi yakwe yi ta mu tlhelisela a tinzhukano takwe.