Hosea 11 - Tshwa Bible

Nungungulu a lamula Israeli hi liranzo.

¹ Laha Israeli a nga wa hi nwanana, nzi lo mu ranza, nzi vitana a nʼwana wa mina a huma le Gipite. Ekso. 3:8; Mat. 2:15

² Kanilezi va lo fularela lava va nga vitana; va lo phahlela ka vaBaali, va hisela zifananiso a tibani.

³ Kasike hi mina nzi nga dedisa Efraime, nzi va angarela mawokweni ya mina; kanilezi a va zi tivangi lezaku nzi va chumile. Ekso. 15:26; Deut. 1:31

⁴ Nzi lo va koka hi tingoti ta wuxinji, ni magota ya liranzo; nzi lo rula muyoka wa tinhamu tabye, nzi va phamela.

⁵ Efraime a nga ta tlhelela tikweni ga Gipite, kanilezi i ta fumelwa hi hosi ya maAssiria, hakuva va alile ku tlhelela ka mina.

⁶ A supado yi ta daya lomu mitini yakwe, yi tshova a zikwinyaro za yona, yi va hihirita hi kota ya xikungo xabye wutsumbu.

⁷ A vanhu va mina va bohile xifungo xo nzi fularela, hambu loku va vitanwa a kuya ka loyi a nga hehla, a nga kona ni munwe a mu tlakuselako a mbilu yakwe.

⁸ Nzi nga ku tsikisa kuyini, wena Efraime? Nzi nga ku nyikelisa kuyini, wena Israeli? Nzi nga ku mahisa kuyini a ku ku fananisa na Adma, ni ku maha u fanana na Zeboime? A mbilu ya mina yi hunzulukile nzeni ka mina, a kuhawukela ka mina ku vukile.

⁹ Nzi nga ta humesa a kutshisa ka zanga ya mina, nzi nga ta tlhela nzi lovisa Efraime. Hakuva nzi Nungungulu, a nzi munhu; nzi Loyi wo Basa a nga xikari ka nwina, nzi nga ta enghena mutini hi zanga. Mitse. 23:19; 1 Sam. 15:29

¹⁰ Va ta lanzela Jehova loyi a ta nga dzumadzuma khwatsi i nghala. Hakuva i ta dzuma, a vanana va tata kakwe hi kururumela, na va huma hi Mupela-gambo.

¹¹ Vata hi le Gipite na va rurumela kukotisa xinyanyani, ni kukotisa a tuva na va huma hi le tikweni ga Assiria. Zonake nzi ta va maha va tshama tindlwini tabye, ku wula Jehova. A kungakholeki ka Israeli.

¹² Efraime i nzi ranzele hi mawunwa, ni yindlu ya ka Israeli hi kukhohlisa. Kanilezi Juda wa ha hluwuka Loyi wo Basa a tsumbekileko.